លោក ហ៊ុន សែន នៅព្រឹកនេះ បានប្រាប់ឱ្យលោក សម រង្ស៊ី ជិះយន្តហោះពីប្រទេសបារាំងចូលទឹកដីកម្ពុជាដោយផ្ទាល់ មិនបាច់ត្រូវឆ្លងកាត់ប្រទេសថៃនោះទេ។
នៅក្នុងកម្មវិធីមួយនៅព្រឹកនេះ លោក ហ៊ុន សែន ថ្លែងថា លោក សម រង្ស៊ី បានពន្យារពេលនៃការចេញដំណើរពីប្រទេសបារាំងពីថ្ងៃទី៧ ទៅថ្ងៃទី៩វិញ។ លោក បន្តថា ជំហានបន្ទាប់លោក សម រង្ស៊ី នឹងប្រាប់អ្នកគាំទ្រថា មិនអាចចូលកម្ពុជាបានទេ ដោយសារតែរដ្ឋាភិបាលថៃមិនឱ្យឆ្លងកាត់។
លោក ហ៊ុន សែន បញ្ជាក់ថា បើលោក សម រង្ស៊ី ពិតជាចង់ចាប់រូបលោកមែនគួរធ្វើដំណើរតាមយន្តហោះដោយផ្ទាល់ចូលកម្ពុជា ដោយមិនចាំបាច់ត្រូវឆ្លងកាត់ប្រទេសថៃនោះទេ។លោក ហ៊ុន សែន៖
«ឥឡូវបងប្អូនគិតមើល៎! ថា មកថ្ងៃ៧ មកដល់ថៃថ្ងៃ៨ ហើយចូលកម្ពុជាថ្ងៃ៩។ ឥឡូវដូរយន្តហោះចេញថ្ងៃ៩ មកពីសាដឺហ្គោលមកសុវណ្ណភូមិបាងកក។ ចឹងបានន័យថា ម៉េចអ្នកគាំទ្រទាំងឡាយ ជឿជាក់បានអត់? តិចទៀត នឹងប្រកាសថា មិនមកទេ ដោយសារថៃមិនឱ្យចូល។ ចុះបើថៃមិនឱ្យចូលម៉េចមិនជិះយន្តហោះមកចុះនៅសៀមរាប ចុះនៅភ្នំពេញ នៅនេះតែម្តងទៅ ម៉េចក៏ចាំបាច់មកតាមហ្នឹង។»
រដ្ឋាភិបាលកម្ពុជាបានផ្ញើលិខិតទៅកាន់ប្រទេសជាសមាជិកអាស៊ាន ឱ្យប្រឆាំងមេដឹកនាំរបស់គណបក្សប្រឆាំងដែលចោទថា ប៉ុនប៉ងចូលកម្ពុជាផ្តួលរំលំរដ្ឋាភិបាល។ ទន្ទឹមនឹងនេះកម្ពុជាក៏បានហាមក្រុមហ៊ុនដឹកអ្នកដំណើរតាមយន្តហោះចំនួន៤៧ មិនឱ្យដឹកលោក សម រង្ស៊ី ចូលកម្ពុជាទេ ហើយថា បើក្រុមហ៊ុនណាហ៊ានល្មើស នឹងត្រូវមានទោសពីបទ«រួមគំនិតក្បត់ជាតិ»។
កាលពីថ្ងៃពុធម្សិលមិញ នាយករដ្ឋមន្ត្រីថៃ លោក ប្រាយុទ្ធ ចាន់អូចា បានបញ្ជាក់ហើយថា មិនអនុញ្ញាតឱ្យលោក សម រង្ស៊ី ចូលទឹកដីថៃទេ ដោយផ្អែកលើការទំនាក់ទំនងជាមួយកម្ពុជា និងគោលការណ៍របស់អាស៊ាន។
