អតីតមេដឹកនាំបក្សប្រឆាំង លោកស្រី មូរ សុខហួរ ថាឯកអគ្គរាជទូតខ្មែរប្រចាំប្រទេសឥណ្ឌូនេស៊ី លោក ហោ ណាំបូរ៉ា គ្មានដំណេះដឹងផ្នែកការទូត ដែលការលើកឡើងនេះបន្ទាប់ពីលោក ហោ ណាំបូរ៉ា បានព្យាយាមទៅរារាំងលោកស្រីមិនឱ្យធ្វើសន្និសីទសារព័ត៌មាន។
កាលពីទី៦ ខែវិច្ឆិកា អតីតអនុប្រធានគណបក្សសង្គ្រោះជាតិដែលកំពុងនិរទេសខ្លួននៅក្រៅប្រទេស គឺលោកស្រី មូរ សុខហួរ ត្រូវបានអនុញ្ញាតឱ្យធ្វើសន្និសីទសារព័ត៌មានមួយនៅប្រទេសឥណ្ឌូនេស៊ី ដើម្បីប្រាប់ទៅអ្នកកាសែតអន្តរជាតិពីគោលបំណងនៃការធ្វើមាតុភូមិនិវត្តន៍របស់ថ្នាក់ដឹកនាំអតីតគណបក្សសង្គ្រោះជាតិមកកាន់កម្ពុជា ។
លោកស្រី មូរ សុខហួរ មានប្រសាសន៍តាមណ្តាញសង្គមហ្វេសប៊ុកខណៈលោកស្រីត្រៀមចេញពីប្រទេសឥណ្ឌូនេស៊ីកាលពីម្សិលមិញថា ក្នុងអំឡុងពេលកំពុងធ្វើសន្និសីទសាព័ត៌មាន លោក ហោ ណាំបូរ៉ា បានទៅរារាំងលោកស្រីមិនឲ្យធ្វើសន្និសីទ និងបណ្តេញលោកស្រីឲ្យប្រញាប់ត្រឡប់ទៅអាមេរិកវិញ ដោយហៅលោកស្រីថា ជាទណ្ឌិតដែលអាជ្ញាធរកម្ពុជាកំពុងបញ្ជូនសមត្ថកិច្ចមកតាមចាប់ខ្លួន។
អតីតមេដឹកនាំបក្សប្រឆាំងរូបនេះ បានចាត់ទុកសកម្មភាពរបស់ឯកអគ្គរាជទូតខ្មែរប្រចាំប្រទេសឥណ្ឌូនេស៊ីនេះថា ជាទង្វើគ្មានចំណេះដឹងផ្នែកការទូត និងធ្វើការគ្មានវិជ្ជាជីវៈត្រឹមត្រូវ។ លោកស្រី មូរ សុខហួរ៖
«គាត់នេះ [លោក ហោ ណាំបូរ៉ា] អត់ដឹងអ្វីជាការទូតផង ព្រោះយើងជាទូត យើងមានសិទ្ធិអីយកប៉ូលីសពីប្រទេសកម្ពុជាមកប្រទេសឥណ្ឌូនេស៊ី មកប្រាប់ថា មកចាប់ខ្ញុំដែលកាន់ប៉ាស្ព័រអាមេរិកកាំងនេះ។ អត់ស្គាល់អ្វីដែលហៅការទូតសោះ គួរតែទៅរៀនការទូតម្តងទៀតហើយ»។
VOD បានព្យាយាមសុំការឆ្លើយតបពីឯកអគ្គរាជទូតកម្ពុជាប្រចាំប្រទេសឥណ្ឌូនេស៊ី លោក ហោ ណាំបូរ៉ា ជុំវិញការលើកឡើងរបស់លោកស្រី មូរ សុខហួរ នេះ តែរហូតពេលផ្សាយនេះ លោកមិនទាន់មានការឆ្លើយតបទេ។ ប៉ុន្តែ យ៉ាងណា លោក ហោ ណាំបូរ៉ា បានសរសេរលើហ្វេសប៊ុករបស់លោកកាលពីម្សិលមិញថា លោកហ៊ានចេញមុខការពារកិត្តិយសជាតិគ្រប់ពេលវេលា។
កាលពីថ្ងៃ៦ ខែវិច្ឆិកានេះដែរ ឯកអគ្គរាជទូតកម្ពុជាប្រចាំនៅប្រទេសឥណ្ឌូនេស៊ីបានចេញលិខិតមួយស្នើទៅអាជ្ញាធរឥណ្ឌូនេស៊ី ចាប់ខ្លួនលោកស្រី មូរ សុខហួរ ផងដែរ ដោយចោទថា លោកស្រីជាជនល្មើសរត់គេចខ្លួនពីប្រទេសកម្ពុជាដែលសមត្ថកិច្ចកំពុងតាមចាប់ខ្លួន។
ក្នុងលិខិតដដែលនេះ ស្ថានទូតកម្ពុជាក៏បានស្នើទៅកាន់បណ្តាប្រទេសជាសមាជិកអាស៊ានទាំងអស់ឲ្យចាប់ខ្លួន និងបញ្ជូនលោកស្រី មូរ សុខហួរ មកកាន់ប្រទេសកម្ពុជាផងដែរ ក្រោមការចោទថា លោកស្រីជាប់ពាក់ព័ន្ធជាមួយក្រុមអ្នកប៉ុនប៉ងផ្តួលរំលំរដ្ឋាភិបាលស្របច្បាប់។
អ្នកស្រី មូរ សុហួរ ឲ្យដឹងថា ជុំវិញគម្រោងវិលត្រឡប់មកកម្ពុជាវិញរបស់អតីតក្រុមមេដឹកនាំបក្សប្រឆាំង គឺរដ្ឋាភិបាលបានចាប់សកម្មជនបក្សប្រឆាំងជាបន្តបន្ទាប់ក្រោមការចោទថា«រួមគំនិតក្បត់» ដោយលោកថា គិតត្រឹមថ្ងៃទី៦ វិច្ឆិកាម្សិលមិញនេះ មានចំនួនជាង៧០នាក់ហើយ៕