អង្គការលើកលែងទោសអន្តរជាតិ ស្នើឱ្យរដ្ឋាភិបាលកម្ពុជាឈប់ដាក់សម្ពាធលើប្រទេសជិតខាងក្នុងតំបន់ ដើម្បីរុកកួនមេដឹកនាំបក្សប្រឆាំង ខណៈពួកគេប៉ុនប៉ងវិលចូលកម្ពុជាវិញឱ្យបាននៅថ្ងៃទី៩ ខែវិច្ឆិកា។
ក្នុងសេចក្តីប្រកាសព័ត៌មានចេញផ្សាយនៅថ្ងៃម្សិលមិញ អង្គការលើកលែងទោសអន្តរជាតិបានលើកឡើងថា អាជ្ញាធរកម្ពុជាគួរតែបញ្ឈប់ការដាក់សម្ពាធទៅលើរដ្ឋាភិបាលប្រទេសក្នុងតំបន់អាស៊ាន ដើម្បីរំខាន និងចាប់ឃាត់ខ្លួនថ្នាក់ដឹកនាំអតីតបក្សសង្គ្រោះជាតិ និងពលរដ្ឋកម្ពុជាដែលពាក់ព័ន្ធនឹងការគាំទ្របក្សនេះ នៅលើទឹកដីប្រទេសទាំងនោះ។
ការលើកឡើងនេះ ធ្វើឡើងបន្ទាប់ពីរដ្ឋាភិបាលកម្ពុជាស្នើទៅរដ្ឋសមាជិកអាស៊ានទាំង១០ ឱ្យចាប់ឃាត់ខ្លួនមេដឹកនាំបក្សនេះ និងអ្នកពាក់ព័ន្ធផែនការវិលចូលកម្ពុជាវិញរបស់ពួកគេ ដើម្បីផ្តួលរំលំរដ្ឋាភិបាល លោក ហ៊ុន សែន ដែលពួកខ្លួនចាត់ទុកថា ជារដ្ឋាភិបាលខុសច្បាប់។
នាយករដ្ឋមន្ត្រីថៃ លោក ប្រាយុទ្ធ ចាន់អូចា បានបញ្ជាក់នៅថ្ងៃពុធថា លោកមិនអាចអនុញ្ញាតឱ្យលោក សម រង្ស៊ី ឆ្លងកាត់ទឹកដីថៃទេ ដោយយោងលើទំនាក់ទំនងជាមួយកម្ពុជា និងគោលការណ៍អាស៊ានដែលមិនជ្រៀតជ្រែកកិច្ចការផ្ទៃក្នុងប្រទេសសមាជិកដទៃទៀត។
ក្នុងថ្ងៃដដែលនោះ អនុប្រធានអតីតបក្សនេះ គឺលោកស្រី មូរ សុខហួរ ត្រូវបានអាជ្ញាធរម៉ាឡេស៊ីបានឃាត់ខ្លួនអស់ប៉ុន្មានម៉ោងនៅក្នុងព្រលានយន្តហោះកូឡាឡំពួ បន្ទាប់ពីលោកស្រីបញ្ចប់សន្និសីទកាសែតមួយក្នុងប្រទេសឥណ្ឌូណេស៊ី ក្រោមការរំខានពីឯកអគ្គរដ្ឋទូតកម្ពុជាប្រចាំនៅក្រុងស្សាកាតា។
យោងតាមប្រភពដដែលនោះ នាយកប្រចាំតំបន់អាស៊ីអាគ្នេយ៍ និងអាស៊ីខាងកើតរបស់អង្គការលើកលែងទោសអន្តរជាតិ លោក Nicholas Bequelin បានថ្លែងថា នៅប៉ុន្មានថ្ងៃចុងក្រោយនេះ រដ្ឋាភិបាលកម្ពុជា លោក ហ៊ុន សែន បានបង្ហាញពីការព្យាយាមរួមសហការជាមួយរដ្ឋាភិបាលតំបន់ ដើម្បីបំផិតបំភ័យ និងរុកកួនលើពលរដ្ឋកម្ពុជាដែលពាក់ព័ន្ធនឹងបក្សប្រឆាំងក្រៅច្បាប់។
ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន មិនបានឆ្លើយតបចំពោះការស្នើរបស់អង្គការបរទេសខាងលើទេ ប៉ុន្តែ លោកលើកឡើងថា កម្ពុជានឹងធ្វើអ្វីគ្រប់យ៉ាងដើម្បីរក្សាសុខសន្តិភាពរបស់ប្រទេសដែលបានកសាងឡើងយ៉ាងលំបាក និងកំពុងរងការគម្រាមកំហែងពីក្រុមប្រឆាំងដែលលោកចាត់ទុកថាជាក្រុមធ្វើរដ្ឋប្រហារ។ លោក ផៃ ស៊ីផាន៖
«អ្វីដែលជាអាទិភាពរបស់កម្ពុជាគឺសន្តិភាព និងស្ថិរភាព ហើយកម្ពុជាធ្លាប់មានបទពិសោធន៍អាក្រក់បំផុតពីរឿងរដ្ឋប្រហារ ពីរឿងបះបោល។ ដូច្នេះ កម្ពុជាសម្រេចចិត្តនឹងធ្វើគ្រប់បែបយ៉ាងដើម្បីធានានូវអ្វីទៅដែលហៅថាសណ្តាប់ធ្នាប់សាធារណៈ ក៏ដូចជាការពារនិត្យានុកូលភាព (ភាពស្របច្បាប់) ជាកតាព្វកិច្ចរបស់រាជរដ្ឋាភិបាល»។
សាស្រ្តាចារ្យនយោបាយ លោក ឯម សុវណ្ណារ៉ា លើកឡើងថា កម្ពុជាមិនអាចដាក់សម្ពាធលើរដ្ឋាភិបាលប្រទេសសេរីក្នុងតំបន់អាស៊ានដូចជា ឥណ្ឌូណេស៊ី និងម៉ាឡេស៊ីនោះទេ ដោយប្រទេសទាំងនោះខ្លាចប៉ះពាល់ដល់មុខមាត់ខ្លួនលើឆាកអន្តរជាតិ ហើយអាស៊ានមានគោលការណ៍រួមមួយ គឺមិនជ្រៀតជ្រែកកិច្ចការផ្ទៃក្នុងរដ្ឋសមាជិកដទៃ។
លោកបន្ថែមថា ចំពោះប្រទេសថៃ អាចជាករណីដាច់ដោយឡែក ដោយសារកម្ពុជា និងប្រទេសក្បែរខាងមួយនេះ បានព្រមព្រៀងគ្នាបង្កើនកម្រិតទំនាក់ទំនងកិច្ចសហប្រតិបត្តិការនឹងគ្នានៅមុនពេលបោះឆ្នោតឆ្នាំ២០១៣។ លោក ឯម សុវណ្ណារ៉ា៖
«ចឹងគេអាចសហការ ឬក៏មិនសហការកម្រិតណា អាស្រ័យលើរដ្ឋាភិបាលថៃខ្លួនឯង ព្រោះថៃកំពុងតែកសាង គេហៅថា បរិយាកាសប្រជាធិបតេយ្យ ដើម្បីពិភពលោកនឹងបានដឹងដែរ ជាពិសេសសហគមន៍អឺរ៉ុបកំពុងតាមដានដែលថៃចង់បានកិច្ចព្រមព្រៀងពាណិជ្ជកម្មសេរី AFTA ឡើងវិញពីអឺរ៉ុប ដែលព្យួរក្រោយរដ្ឋប្រហារឆ្នាំ២០១៤»៕
ប្រធានផ្នែកស៊ើបអង្កេតនៃអង្គការអាដហុក លោក សឹង សែនករុណា ចាត់ទុកចំណាត់ការរបស់រដ្ឋាភិបាលចំពោះបក្សប្រឆាំងនៅប្រទេសអាស៊ានរយៈពេលចុងក្រោយនេះ មិនមែនជាវិធានការច្បាប់ ហើយកំពុងបង្ហាញពីការបែកបាក់សាមគី្គជាតិ និងការរំខានកាន់តែខ្លាំងនៅលើឆាកអន្តរជាតិ។
លោក សឹង សែនករុណា បន្ថែមថា ភាគីបក្សកាន់អំណាច និងភាគីអតីតបក្សប្រឆាំង គួរតែបញ្ចៀសការប្រឈមមុខដាក់គ្នា ហើយវិលទៅរកតុចរចាដើម្បីផលប្រយោជន៍សេដ្ឋកិច្ចជាតិ។ លោក សឹង សែនករុណា បន្ថែមថា៖
«យើងចង់ឱ្យមានការរកដំណោះស្រាយរវាងអ្នកនយោបាយពាក់ព័ន្ធទាំងអស់ហ្នឹងធ្វើយ៉ាងណាឱ្យវិលមករកស្ថានភាពមួយដែលល្អប្រសើរមកវិញ ហើយឱ្យមានការគោរពសិទ្ធិមនុស្ស និងគោលការណ៍លទ្ធិប្រជាធិបតេយ្យឱ្យបានត្រឹមត្រូវឡើងវិញ ដើម្បីបញ្ចៀសនូវការដាក់សម្ពាធផ្សេងៗពីសហគមន៍អន្តរជាតិ ហើយដើម្បីឱ្យមានការស្តារសេដ្ឋកិច្ចយើង»៕