មេដឹកនាំអតីតបក្សប្រឆាំង លោក កឹម សុខា ជួបពិភាក្សាជាមួយអគ្គរដ្ឋទូតបារាំងនៅព្រឹកថ្ងៃនេះ ជាជំនួបដំបូងរបស់លោកជាមួយមន្ត្រីការទូតបរទេស ក្រោយពីរូបលោកត្រូវបានដោះលែងឱ្យរួចផុតពីការឃុំខ្លួនក្នុងផ្ទះ។
ប្រធានគណបក្សសង្គ្រោះជាតិ លោក កឹម សុខា វ័យ ៦៦ឆ្នាំ ត្រូវបានសាលាដំបូងរាជធានីភ្នំពេញសម្រេចកាលពីថ្ងៃម្សិលមិញនេះ អនុញ្ញាតឱ្យមានសេរីភាពក្នុងការធ្វើដំណើរ និងចាកចេញពីគេហដ្ឋានរបស់លោកហើយ ប៉ុន្តែ មិនអនុញ្ញាតឱ្យលោកធ្វើដំណើរទៅក្រៅប្រទេស និងធ្វើសកម្មភាពនយោបាយនោះឡើយ។
មួយថ្ងៃក្រោយពីត្រូវបានដោះលែង មេដឹកនាំអតីតបក្សប្រឆាំងរូបនេះ បានជួបជជែកជាមួយអ្នកស្រី Eva Nguyen Binh អគ្គរដ្ឋទូតបារាំងប្រចាំនៅកម្ពុជា នៅម៉ោងខ្ទង់ ១០កន្លះព្រឹកថ្ងៃទី១១ ខែវិច្ឆិកានេះ។
នេះគឺជាជំនួបលើកដំបូងរបស់លោក កឹម សុខា ជាមួយមន្ត្រីការរទូតបរទេសប្រចាំនៅកម្ពុជា មួយថ្ងៃក្រោយពីរូបលោកត្រូវបានអនុញ្ញាតឱ្យមានសេរីភាពធ្វើដំណើរលើសពីព្រំប្រទល់ ដែលត្រូវបានកំណត់ដោយតុលាការកាលពីឆ្នាំ២០១៨កន្លងមក។
តែយ៉ាងណា លោក កឹម សុខា មិនបានថ្លែងអ្វីទៅកាន់ក្រុមអ្នកសារព័ត៌មានដែលបានតាមដានជំនួបនេះនោះឡើយ បន្ទាប់ពីលោកបានចេញមកទទួលអគ្គរដ្ឋទូតបារាំង។
លោក កឹម សុខា ត្រូវបានសមត្ថកិច្ចរបស់រដ្ឋាភិបាលចាប់ខ្លួនទាំងយប់កាលពីឆ្នាំ២០១៧កន្លងមក ហើយបញ្ជូនទៅឃុំខ្លួននៅឯពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ នៅជិតព្រំដែនកម្ពុជា-វៀតណាម រហូតដល់លោកត្រូវបានបញ្ជូនមកដាក់ឃុំខ្លួននៅក្នុងផ្ទះកាលពីខែកញ្ញា ឆ្នាំ២០១៨៕
