មន្ត្រីជាន់ខ្ពស់គណបក្សសង្គ្រោះជាតិ បានឱ្យដឹងថា អតីតមេដឹកនាំបក្សប្រឆាំង លោក សម រង្ស៊ី បានធ្វើដំណើរមកដល់ប្រទេសឥណ្ឌូនេស៊ីហើយកាលពីព្រឹកមិញនេះ ក្រោយពីពុំបានហោះហើរកាលពីថ្ងៃម្សិលមិញនេះ។
កាលពីថ្ងៃម្សិលមិញ ទីភ្នាក់ងារព័ត៌មាន Reuters បានផ្សាយថា ក្រុមហ៊ុនអាកាសចរណ៍ម៉ាឡេស៊ី បានឃាត់ខ្លួនលោក សម រង្ស៊ី ប្រធានស្តីទីនៃអតីតគណបក្សសង្គ្រោះជាតិ មិនឱ្យឡើងយន្តហោះចាកចេញពីទីក្រុងគូឡាឡាំពួ ទៅកាន់ទីក្រុងហ្សាកាតា ប្រទេសឥណ្ឌូនេស៊ីឡើយ។
បើតាម Reuters ដំណើររបស់លោក សម រង្ស៊ី ត្រូវបានហាមឃាត់បែបនេះគឺទៅតាមការណែនាំរបស់អាជ្ញាធរឥណ្ឌូណេស៊ី។
អនុប្រធានអតីតគណបក្សសង្គ្រោះជាតិ លោកស្រី មូរ សុខហួរ បានអះអាងថា លោក សម រង្ស៊ី បានធ្វើដំណើរចូលដល់ទឹកដីប្រទេសឥណ្ឌូនេស៊ីរួចរាល់ហើយកាលពីព្រឹកមិញនេះ។
ភ្ជាប់នឹងរូបថតមួយសន្លឹកដែលបង្ហាញវត្តមានរបស់លោក សម រង្ស៊ី ឈរអមជាមួយអតីតតំណាងរាស្ត្រគណបក្សសង្គ្រោះជាតិ លោក តុ វ៉ាន់ចាន់ និងលោក ម៉ែន សុថាវរិន្ទ លោកស្រី សុខហួរ បានសរសេរបញ្ជាក់ថា លោក សម រង្ស៊ី គ្រោងជួបតំណាងរាស្ត្ររបស់ប្រទេសឥណ្ឌូនេស៊ីថែមទៀតផង។ លោកស្រី មូរ សុខហួ បញ្ជាក់ប្រាប់តាមបណ្ដាញសង្គមថា៖
«លោកប្រធានស្តីទី សម រង្ស៊ី បានអញ្ជើញមកដល់ទីក្រុងហ្សាកាតានៃប្រទេសឥណ្ឌូនេស៊ីដោយមានសុវត្ថិភាព ហើយកំពុងតែជួបប្រជុំជាមួយអ្នកតំណាងរាស្ត្រនៅពេលនេះ។ ចាស៎ នៅពេលនេះ ១៤ វិច្ឆិកា»។
ទាក់ទងនឹងការផ្អាកដំណើររបស់លោក សម រង្ស៊ី កាលពីថ្ងៃម្សិលមិញ VOD មិនអាចទំនាក់ទំនងសុំការពន្យល់ពីក្រុមហ៊ុនអាកាសចរណ៍ម៉ាឡេស៊ី និងស្ថានទូតឥណ្ឌូនេស៊ីបានទេ ដោយផ្ញើសំណួរតាមរយៈសារអេឡិចត្រូនិច តែពុំទទួលបានការឆ្លើយតបឡើយ។
មុនដំណើរលោក សម រង្ស៊ី ទៅកាន់ទីក្រុងហ្សាកាតានោះ អ្នកស្រី មូរ សុខហួរ បានធ្វើដំណើរទៅម្ដងរួចមកហើយ និងបានរៀបចំសន្និសីទកាសែតនៅទីនោះកាលពីថ្ងៃទី៦ ខែវិច្ឆិកា ប៉ុន្តែ សន្និសីទកាសែតនោះត្រូវបានរារាំងពីសំណាក់អគ្គរាជទូតកម្ពុជាប្រចាំក្រុងហ្សាកាតា លោក ហោ ណាំបូរ៉ា ជាកូនប្រុសអតីតរដ្ឋមន្ត្រីការបរទេស លោក ហោ ណាំហុង។
វីអូឌីបានទំនាក់ទំនងទៅលោក ហោ ណាំបូរ៉ា ដើម្បីសាកសួរអំពីប្រតិកម្មរបស់លោកទៅនឹងវត្តមានអតីតមេដឹកនាំបក្សប្រឆាំងនៅលើទឹកដីឥណ្ឌូនេស៊ីផងដែរ ប៉ុន្តែ គ្មានការឆ្លើយតបនោះឡើយមកដល់រសៀលថ្ងៃនេះ។
ដំណើរទៅដល់ប្រទេសឥណ្ឌូនេស៊ីរបស់លោក សម រង្ស៊ី នាថ្ងៃនេះ គឺក្រោយពេលរូបលោកបានជួបប្រជុំជាមួយសមាជិករដ្ឋសភា និងរដ្ឋមន្ត្រីការបរទេសម៉ាឡេស៊ី កាលពីថ្ងៃទី១២ ខែវិច្ឆិកា តបតាមការអញ្ជើញរបស់តំណាងរាស្ត្រម៉ាឡេស៊ី៕
