លោក រ៉ាត់ រត្នមុនី បានប្រកាសដាក់ជីវិតថា លោកពុំមែនជាអ្នកផលិតខ្សែភាពយន្តឯកសារ «ម្តាយខ្ញុំលក់ខ្ញុំ» នោះឡើយ។
ការប្រកាសរបស់លោក រ៉ាត់ រ័ត្នមុនី ធ្វើឡើងក្នុងពេលជំនុំជម្រះនៅសាលាឧទ្ទរណ៍កាលពីព្រឹកមិញនេះ។
«ម្តាយខ្ញុំលក់ខ្ញុំ» ជាខ្សែភាពយន្តឯកសារដែលផលិតដោយសារព័ត៌មាន Russia Today (RT) មានរយៈពេលប្រមាណ២៨នាទី ជាភាសាអង់គ្លេស បង្ហាញអំពីការរស់នៅរបស់ពលរដ្ឋមួយចំនួនដែលមានប្រាក់ចំណូលប្រចាំថ្ងៃទាបជាង១ដុល្លារ ប្រឈមនឹងការលំបាក រហូតមានអ្នកខ្លះសម្រេចចិត្តលក់ព្រហ្មចារីយ៍កូនដើម្បីជីវភាពរស់នៅ។
ក្រោយបញ្ចប់ការផលិត ខ្សែភាពយន្តឯកសារនេះត្រូវគេយកមកផ្សព្វផ្សាយបន្តគ្នាតាមបណ្តាញសង្គមហ្វេសប៊ុក(Faebook) ដោយទទួលបានការចាប់អារម្មណ៍យ៉ាងច្រើនពីអ្នកទស្សនា។ រដ្ឋាភិបាលកម្ពុជា ថាវីដេអូដែលផ្សព្វផ្សាយនេះនាំឱ្យមានការរើងអើង និងប៉ះពាល់ដល់កិត្តិយសជាតិ ហើយសម្រចឱ្យមានការតាមចាប់ខ្លួនអ្នកបកប្រែជាជនជាតិខ្មែរ គឺលោក រ៉ាត់ រ័ត្នមុនី រហូតប្រទេសថៃតែម្តង។
លោក រ៉ាត់ រ័ត្នមុនី អ្នកបកប្រែឱ្យទូរទស្សន៍RT ក្នុងសវនាការនៅឯសាលាឧទ្ធរណ៍កាលពីព្រឹកមិញនេះ ថ្លែងបដិសេធជាថ្មីថា ខ្លួនពុំមែនជាអ្នកដឹកនាំការផលិតវីដេអូឯកសារ «ម្តាយខ្ញុំលក់ខ្ញុំ» ទេ លោកគ្រាន់ជាអ្នកធ្វើការបកប្រែភាសាឱ្យអ្នកសារព័ត៌មានរបស់រុស្ស៊ី ដោយទទួលកម្រៃ១២០ដុល្លាក្នុងមួយថ្ងៃ។ លោកបន្តថា មុនផ្តើមការងារ លោកដឹងត្រឹមថាក្រុមការងារ គេថតវីដេអូឯកសារដែលមានចំណងជើងថា «កម្ពុជាក្រោយរបបខ្មែរក្រហម» ការជ្រើសអ្នកសម្ភាសន៍ និងការសួរសំណួរទាំងឡាយ សុទ្ធជាការដឹកនាំរបស់បរទេសទាំងអស់។
លោក មុនី ថាក្រោយថតចប់ លោកក៏ទៅបំពេញការងារបន្តនៅថៃ ពុំដឹងពីការកាត់តផលិតវីដេអូ និងការដាក់ចំណងជើងរឿងថ្មីឡើយ។ លោកលើកឡើងក្នុងអង្គសវនាការនោះថា ការចោទប្រកាន់របស់ដើមបណ្តឹងទាំងឡាយថាលោកបានលួងលោម និងដឹកនាំឱ្យពួកគេសម្ដែង គឺជារឿងមិនពិត ព្រោះក្រៅពីអ្នកស្រី កែវ ម៉ាឡៃ ជាអតីតជនរងគ្រោះព្រោះទំនាស់ដីនៅតំបន់បឹងកក់ ប្រភពផ្សេងទៀតលោកពុំធ្លាប់បានស្គាល់ពីមុនមកឡើយ។
មេធាវីការពារក្តី លោក រ៉ាត់ រ័ត្នមុនី លោកមេធាវី សំ ទិត្យសីហា បានលើកយក៥ចំណុចសំខាន់ៗអះអាងបញ្ជាក់ទៅប្រធានក្រុមប្រឹក្សាជំនុំជម្រះ ដើម្បីទម្លាក់ចោលបទចោទចំពោះកូនក្តីរបស់លោក។ លោក លើកឡើងថាទី១ RTបានចេញលិខិតបញ្ជាក់ទៅក្រសួងព័ត៌មានថា វីដេអូឯកសារគឺជាកម្មសិទ្ធរបស់គេ ទី២ លោក មុនី មាននាទីជាអ្នកបកប្រែ ទី៣ ដើមចោទបានត្រឹមនិយាយគ្មានមូលដ្ឋាន អត់ភស្តុតាងបញ្ជាក់ ទី៤កូនក្តីខ្លួនហ៊ានប្រកាសដាក់ជីវិតបដិសេធមិនបានធ្វើដូចការចោទ ទី៥ ជនជាប់ចោទមិនបានស្គាល់ ឬណែនាំប្រភពមុនថតឡើយ។
ដើមបណ្តឹងដែលជាប្រភពក្នុងភាពយន្តឯកសារ«ម្តាយខ្ញុំលក់ខ្ញុំ» មិនមានវត្តមាននៅក្នុងអង្គសវនាការព្រឹកមិញនេះទេ។
សាលាដំបូងរាជធានីភ្នំពេញបានសម្រេចផ្ដន្ទាទោស កាលពីថ្ងទី២៦ ខែមិថុនា ឱ្យរូបលោកជាប់ពន្ធនាគារ២ឆ្នាំ ក្រោមបទចោទ «ញុះញង់ឱ្យមានការរើសអើង»។
លោក មុនី ត្រូវប៉ូលីសថៃចាប់ឃាត់ខ្លួន នៅទីក្រុងបាងកក នាថ្ងៃទី០៧ ខែធ្នូ ឆ្នាំ២០១៨ ខណៈលោកកំពុងសុំសិទ្ធជ្រកកោននៅឯការិយាល័យសុំទិដ្ឋាការទៅប្រទេសហូឡង់។
ប្រធានក្រុមប្រឹក្សាជំនុំជម្រះបានបញ្ជាក់ទៅលោក រ៉ាត់ រ័ត្នមុនី ថាភស្តុតាងដាក់បន្ទុកលោក ទី១ គឺវីដេអូឯកសារដែលមានដាក់ឈ្មោះលោកជាអ្នកផលិត និងទី២ ដើមបណ្តឹងសុទ្ធអះអាងថា លោកជាអ្នកលួងលោមដឹកនាំឱ្យពួកគេសម្ដែងដើម្បីថត ខុសរឿងពិតដែលពួកគេជាសិស្សសាលា និងមានគ្រួសារត្រឹមត្រួវ។
មុនប្រកាសបិទសវនាការនៅសាលាឧទ្ធរណ៍រាជធានីភ្នំពេញកាលពីព្រឹកមិញនេះ លោក រ៉ាត់ រត្នមុនី បានសំណូមពរខ្លីទៅប្រធានក្រុមប្រឹក្សាជំនុំជម្រះសូមទម្លាក់ចោលបទចោទទាំងស្រុងចំពោះរូបលោក។ សាលាឧទ្ធរណ៍នឹងប្រកាសសាលដីការសំណុំរឿងលោក រ៉ាត់ រត្នមុនី នាថ្ងៃទី២៩ ខែវិច្ឆិកា ខាងមុខនេះ៕