មន្ត្រីជាន់ខ្ពស់៤រូបនៃគណបក្សរាជានិយមហ៊្វុនស៊ិនប៉ិច បានទាមទារទៅថ្នាក់ដឹកនាំខ្លួន ឱ្យបកស្រាយពីមូលហេតុនៃការបញ្ឈប់ពួកគេពីតួនាទីដឹកនាំនៅក្នុងបក្ស ខណៈបក្សមួយនេះ និងគណបក្សដឹកនាំដោយលោក ញឹក ប៊ុនឆៃ បានចាប់ផ្ដើមជជែកអំពីលទ្ធភាពនៃការប្របាច់បញ្ចូលគ្នាជាថ្មី។
មន្ត្រីជាន់ខ្ពស់ ៤រូបរបស់គណបក្សហ៊្វុនស៊ិនប៉ិច មានអគ្គលេខាធិការ លោក ពេជ្រ សូដេថ្ថា អគ្គលេខាធិការរង លោក រស់ សាផន អគ្គលេខាធិការរង លោក ណុប សុធារិទ្ធ និងអ្នកស្រី កង បូរាណ នាយខុទ្ទកាល័យសម្ដេចក្រុមព្រះ នរោត្ដម រណឫទ្ធិ ត្រូវបានបញ្ឈប់ពីតួនាទីដឹកនាំរបស់បក្សកាលចាប់ពីថ្ងៃសៅរ៍សប្ដាហ៍មុន។
សេចក្ដីសម្រេចនេះ ត្រូវបានធ្វើឡើងដោយប្រធានស្តីទីគណបក្សហ៊្វុនស៊ិនប៉ិច ព្រះអង្គម្ចាស់ នរោត្ដម ចក្រាវុឌ្ឍ ដែលជាបុត្រាច្បងរបស់សម្ដេចក្រុមព្រះ នរោត្ដម រណឫទ្ធិ។
លោក ណុប សុធារិទ្ធ ដែលកាន់តំណែងអ្នកនាំពាក្យបក្សមុនសេចក្ដីសម្រេចនេះកើតឡើងនោះ បានអះអាងថា លោកពុំបានដឹងអំពីមូលហេតុនៃការបញ្ឈប់រូបលោកនោះឡើយ ហើយលោកចាត់ទុកសេចក្ដីសម្រេចនេះថា ត្រូវបានធ្វើឡើងដោយ«ខុសច្បាប់»។
លោក ណុប សុធារិទ្ធ ប្រាប់ថា៖ «ខ្ញុំយល់ឃើញថា សកម្មភាពដែលធ្វើមកលើពួកខ្ញុំនេះ ជារឿងអយុត្តិធម៌។ ខ្ញុំអត់មានប្រព្រឹត្តិកំហុសអីទេ។ ខ្ញុំសោកស្តាយដែរ នាល្ងាចថ្ងៃទី១៦ហ្នឹង ប្រធានស្តីទីគណបក្សបានយកកងកម្លាំងទៅព័ទ្ធទីស្នាក់ការបក្សហ្វុនស៊ិនប៉ិចតែម្តង»។
លោក សុធារិទ្ធ បានប្រាប់ទៀតថា ប្រការ២៤ នៃលក្ខន្តិកៈរបស់គណបក្ស បានកំណត់ថា អ្នកដែលធ្វើប្រធានស្តីទីបានលុះត្រាតែអ្នកហ្នឹងឆ្លងកាត់ពីអនុប្រធាន ហើយមានការផ្ទេរសិទ្ធឱ្យទៅជាប្រធានស្តីទីពីសំណាក់ព្រះប្រធានគណបក្សដែរ ប៉ុន្តែ លោកថា គណបក្សនេះមិនដែលមានប្រធានស្ដីទីនោះឡើយ។
VOD មិនអាចទំនាក់ទំនងប្រធានស្តីទីគណបក្សហ្វុនស៊ិនប៉ិច ព្រះអង្គម្ចាស់ នរោត្តម ចក្រាវុឌ្ឍ ស្រាយបំភ្លឺអំពីមូលហេតុនៃការបញ្ឈប់សមាជិកជាន់ខ្ពស់របស់បក្សបាននោះទេនៅថ្ងៃនេះ ព្រោះទូរសព្ទមិនចូល។
លោក ផន ចន្ថា ដែលប្រាប់ថា ជាអគ្គលេខាធិការរងគណបក្សហ៊្វុនស៊ិនប៉ិច បានបដិសេធធ្វើការបកស្រាយបន្ថែមជុំវិញបញ្ហានេះ ដោយលោកប្រាប់ឱ្យរង់ចាំការបកស្រាយពីអ្នកនាំពាក្យថ្មីរបស់បក្ស ដែលលោកថា នឹងត្រូវបានតែងតាំងនាពេលខាងមុខ។
លោក ផន ចន្ថា ប្រាប់ថា៖«ចំណែកសំណួរក្មួយសួរមិញហ្នឹង ខ្ញុំមិនអាចឆ្លើយបានទេ ព្រោះគ្មានការអនុញ្ញាត ក៏ប៉ុន្តែ ចាំមានអ្នកគេនាំពាក្យអី អាចនឹងបកស្រាយជូនណា៎ក្មួយណា»។
សេចក្ដីសម្រេចបញ្ឈប់សមាជិកភាពមន្ត្រីជាន់ខ្ពស់បក្សនេះ បានកើតឡើងជិត ១ខែក្រោយពីសម្ដេចក្រុមព្រះ នរោត្ដម រណឫទ្ធិ និងលោក ញឹក ប៊ុនឆៃ ប្រធានគណបក្សខ្មែររួបរួមជាតិ បានផ្ដួចផ្ដើមឱ្យគណបក្សទាំងនេះច្របាច់បញ្ចូលគ្នាជាថ្មី។
គណបក្សរាជានិយមមួយនេះ ត្រូវបានបំបែកជាពីរកាលពីឆ្នាំ២០០៦ បន្ទាប់ពីលោក ញឹក ប៊ុនឆៃ ដែលកាលនោះជាអគ្គលេខាធិការបក្ស បានសម្រេចប្ដឹងសម្ដេចក្រុមព្រះ នរោត្ដម រណឫទ្ធិ ជុំវិញការចោទថា បានលក់ទីស្នាក់ការបក្សនៅរង្វល់មូលគល់ស្ពានជ្រោយចង្វាកាលពីឆ្នាំ២០០៥ ហើយយកលុយនោះដាក់ចូលហោបៅផ្ទាល់ខ្លួន។
លោក ញឹក ប៊ុនឆៃ បានឡើងដឹកនាំគណបក្សហ៊្វុនស៊ិនប៉ិចចាប់តាំងពីពេលនោះរហូតដល់ឆ្នាំ២០១៦ ខណៈដែលសម្ដេចក្រុមព្រះ នរោត្ដម រណឫទ្ធិ បានបង្កើតគណបក្សថ្មីដែលដាក់ឈ្មោះតាមព្រះនាមរបស់ព្រះអង្គ។
ក្រុមអ្នកនយោបាយដឹកនាំដោយសម្ដេចក្រុមព្រះ នរោត្ដម រណឫទ្ធិ និងលោក ញឹក ប៊ុនឆៃ បានព្យាយាមបង្រួបបង្រួមបញ្ចូលគ្នាវិញជាបន្តបន្ទាប់ ក្រោយពីគណបក្សនយោបាយទាំងពីរបាត់បង់ការគាំទ្រនៅក្នុងការបោះឆ្នោតចាប់តាំងពីឆ្នាំ២០០៨មក។ ប៉ុន្តែ សម្ព័ន្ធភាពរវាងក្រុមទាំងពីរ មិនបានស្ថិតស្ថេរយូរអង្វែងនោះឡើយ។
សម្ដេចក្រុម នរោត្ដម រណឫទ្ធិ បានវិលត្រឡប់ទៅដឹកនាំគណបក្សហ៊្វុនស៊ិនប៉ិចវិញនៅឆ្នាំ២០១៥ បន្ទាប់ពីគណបក្សនេះបានបាត់បង់អាសនៈទាំងអស់នៅក្នុងការបោះឆ្នោតជាតិឆ្នាំ២០១៣។
អគ្គលេខាធិកាគណបក្សខ្មែររួបរួមជាតិ លោក សុខ វិសាល បានបញ្ជាក់ថា លោកមិនច្បាស់ទេថា ការបញ្ចប់សមាជិកភាពរបស់សមាជិកគណបក្សហ្វុនស៊ិនប៉ិចនាពេលថ្មីៗនេះ មានជាប់ទាក់ទងនឹងផែនការច្របាច់បញ្ជូលគ្នារបស់បក្សទាំងពីរនាពេលអនាគត ឬយ៉ាងណានោះ។
លោកលើកឡើងបន្តថា ការបញ្ឈប់អ្នកនយោបាយមួយចំនួនពីក្នុងជួរបក្ស ឬការលាឈប់របស់សមាជិកបក្សនានា ជារឿងធម្មតាដែលតែងកើតមានក្នុងជីវិតអ្នកនយោបាយ ពេលស្ថានភាពរបស់បក្សមានភាពប្រែប្រួល។
លោក សុខ វិសាល ប្រាប់ថា៖«អានេះក៏ជាកំណែទម្រង់មួយដែរសម្រាប់គណបក្សហហ្វុនស៊ិនប៉ិច ព្រោះការងារប្រព្រឹត្តិទៅចឹង វាមានអ្នកមិនសប្បាយចិត្ត វាមានអ្នកតវ៉ា រឺទាមទារស្អីអីចឹង។ គណបក្សប្រជាធិបតេយ្យ វាតែងតែជួបបែបហ្នឹងហើយ។ វិធានការណ៍របស់គាត់ស្របតាមលក្ខន្តិកៈរបស់គាត់ដែលយើងមិនអាចដឹងបានណា៎ក្មួយ»។
អ្នកវិភាគនយោបាយ លោកបណ្ឌិត ឡៅ ម៉ុងហៃ បានថ្លែងថា លោកពុំចាប់អារម្មណ៍ឡើយចំពោះរបត់នយោបាយថ្មីរបស់គណបក្សហ៊្វុនស៊ិនប៉ិច ហើយលោកថា សូម្បីការច្របាច់បញ្ជូលគ្នារវាងគណបក្សទាំងពីរនេះ ក៏ពុំជួយឱ្យនយោបាយប្រទេសកម្ពុជាមានភាពប្រែប្រួលផ្លាស់ប្តូរគួរឱ្យកត់សម្គាល់អ្វីឡើយ។
លោក ឡៅ ម៉ុងហៃ ប្រាប់ថា៖«ឈប់ទៅ! ចាស់ៗអស់ហើយ ឈប់ទៅ! នេះជាទស្សនៈចេញពីដួងចិត្តខ្ញុំ គឺអីចឹងឯង»៕
សេចក្ដីកែតម្រូវ៖ វីអូឌី (VOD) សូមកែតម្រូវថា លោក ផន ចន្ថា មិនមែនជាអគ្គលេខាធិការថ្មីរបស់គណបក្សហ៊្វុនស៊ិនប៉ិចនោះទេ។ លោក ផន ចន្ថា បានបញ្ជាក់ប្រាប់នៅថ្ងៃនេះថា លោកកាន់តួនាទីជាអគ្គលេខាធិការរង និងជាព្រឹទ្ធាចារ្យគណបក្សហ៊្វុនស៊ិនប៉ិច។