មេដឹកនាំអតីតបក្សប្រឆាំងអំពាវនាវទៅប្រជាពលរដ្ឋទូទាំងប្រទេស ឱ្យតស៊ូដោយអហិង្សា ដើម្បីផ្តួលរំលំលោកនាយករដ្ឋមន្ត្រី ហ៊ុន សែន បើមិនព្រមបើកផ្លូវលទ្ធិប្រជាធិបតេយ្យនៅកម្ពុជាឱ្យដំណើរការឡើងវិញ តាមការទាមទាររបស់សហភាពអឺរ៉ុប។
លោក សម រង្ស៊ី អំពាវនាវបែបនេះស្របពេលដែលសហភាពអឺរ៉ុបផ្ញើរបាយការណ៍បឋមមួយ ក្នុងដំណើរឈានទៅដល់ការព្យួរប្រព័ន្ធ EBA ពីកម្ពុជា ទៅរដ្ឋាភិបាលពិនិត្យ និងឆ្លើយតប កាលពីថ្ងៃទី១៤ ខែវិច្ឆិកានេះ។
បើតាមនីតិវិធី កម្ពុជាមានពេល ១ខែ គិតចាប់ពីថ្ងៃទទួល ដើម្បីធ្វើការពិនិត្យ និងឆ្លើយតប ហើយគណៈកម្មការអឺរ៉ុប នឹងបិទបញ្ចប់របាយការណ៍ និងធ្វើការសម្រេចចិត្តនៅខែកុម្ភៈ ឆ្នាំ២០២០។
លោក សម រង្ស៊ី លើកឡើងលើបណ្តាញសង្គមហ្វេសប៊ុកខ្លួនថា សហភាពអឺរ៉ុប បានដាក់ឱសានវាទឱ្យលោក ហ៊ុន សែន បើកផ្លូវឱ្យលទ្ធិប្រជាធិបតេយ្យដំណើរការឡើងវិញ ឱ្យបានមុនថ្ងៃ១២ ខែធ្នូ ឆ្នាំ២០១៩ នេះ។
ខ្លឹមសារលើហ្វេសប៊ុកលោក សម រង្ស៊ី រៀបរាប់ថា៖ «យើងចង់រក្សាប្រព័ន្ធអនុគ្រោះពន្ធ EBA ពីសហភាពអឺរ៉ុប ដើម្បីរក្សាឆ្នាំងបាយរបស់កម្មករប្រមាណ ៨សែននាក់។ យើងនឹងតស៊ូដើម្បីផ្តួលរំលំរបប ហ៊ុន សែន បើលោក ហ៊ុន សែន ខ្លួនឯង មិនព្រមកែខ្លួន ហើយមិនព្រមបើកផ្លូវឱ្យលទ្ធិប្រជាធិបតេយ្យដំណើរការឡើងវិញ តាមការទាមទាររបស់សហភាពអឺរ៉ុប»។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា មិនចាប់អារម្មណ៍នឹងការលើកឡើងរបស់លោក សម រង្ស៊ី ទេ ពីព្រោះការលើកឡើងនោះ គ្រាន់តែចង់បានផលចំណេញពីការគាំទ្រពីកម្មករតែប៉ុណ្ណោះ។ លោកបន្តថា ដំណាក់កាលនេះ រដ្ឋាភិបាលមានតែចាំមើលសេចក្តីសម្រេចរបស់សហភាពអឺរ៉ុបជុំវិញការព្យួរ EBA នោះ។
លោក កុយ គួង ប្រាប់ថា៖ «ដូចជាយើងអត់មានមតិអ្វីទៀតផង បើគេឱ្យរបាយការណ៍មកយើង បើយើងមានមតិទៅលើរបាយការណ៍ហ្នឹង គ្រាន់តែមើលមតិរបស់យើងទៀត ដូចអត់មានអ្វីពិភាក្សាទៀតផង ព្រោះចន្លោះពេលហ្នឹង ចន្លោះខែ១២ រហូតដល់ខែ២ ប្រហែលជាគេអាចចេញសេចក្តីសម្រេចជាក់ច្បាស់នៅក្នុងខែ១២ ក្នុងឆ្នាំ២០២០»។
អ្នកឃ្លាំមើលបញ្ហាសង្គម និងនយោបាយកម្ពុជា លោក គឹម សុខ មានប្រសាសន៍ថា ដំណាក់កាលនេះ រដ្ឋាភិបាលមិនព្រមទទួលយកតាមការទាមទាររបស់សហភាពអឺរ៉ុបទាំងអស់នោះទេ ពីព្រោះរដ្ឋាភិបាលខ្លាចចាញ់ដៃគូប្រកួតរបស់ខ្លួន។
លោក គឹម សុខ និយាយថា៖ «លោក ហ៊ុន សែន មិនហ៊ានផ្តល់ឱ្យទាំងសំណុំបែបហ្នឹងក្នុងរយៈពេលមួយខែ ឬពីរខែ ឬបីខែនោះទេ ដោយសារការរស់ឡើងវិញនៃសេរីភាពនយោបាយនៃសកម្មជន និងថ្នាក់ដឹកនាំរបស់គណបក្សសង្គ្រោះជាតិទាំងអស់ និងការរស់ឡើងវិញនៃគណបក្សសង្គ្រោះជាតិទាំងសំណុំមូល។ អញ្ចឹង មានន័យថា លោកហ៊ុន សែន ត្រូវប្រឈមនឹងគណបក្សប្រឆាំងដ៏ខ្លាំងមួយ ដែលខ្ញុំគិតថា លោក ហ៊ុន សែន មិនហ៊ានប្រថុយលេងទេ អាចនាំឱ្យគាត់បាត់អំណាចឆាប់»។
ប្រធានសមាគមរោងចក្រកាត់ដេរកម្ពុជា (GMAC) អះអាងថា ការដកហូតប្រព័ន្ធអនុគ្រោះពន្ធ EBA ពីកម្ពុជា កម្មករជាង ៧៥ម៉ឺននាក់ នឹងរងផលប៉ះពាល់ដោយផ្ទាល់ ហើយពលរដ្ឋជាង៣លានគ្រួសារ នឹងរងផលប៉ះពាល់ដោយប្រយោល។
ប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ឬហៅកាត់ថា EBA ត្រូវបានមន្ត្រីជំនាញរដ្ឋាភិបាលប៉ាន់ប្រមាណថា ជួយឱ្យកម្ពុជាចំណេញ ៧០០លានដុល្លារក្នុងមួយឆ្នាំតាមរយៈការមិនបង់ពន្ធគយលើការនាំចូលទំនិញទៅទីផ្សារសហភាពអឺរ៉ុប៕
