លោកនាយករដ្ឋមន្រ្តី ហ៊ុន សែន នឹងធ្វើដំណើរទៅកាន់ទីក្រុងប៉េកាំង ដើម្បីចរចាកិច្ចព្រមព្រៀងពាណិជ្ជកម្មសេរីជាមួយប្រទេសចិន នៅថ្ងៃទី៣-៤ ខែធ្នូ ខាងមុខ ដោយលោករំពឹងថា កិច្ចព្រមព្រៀងនោះ នឹងអាចបញ្ចប់ក្នុងរយៈពេលដ៏ខ្លី។
ដំណើរនេះ ត្រូវបានប្រមុខរដ្ឋាភិបាលកម្ពុជា ប្រកាសឡើងនៅអំឡុងសុន្ទរកថាមួយក្នុងពិធីបើកការដ្ឋានសាងសង់ផ្លូវ៣៧ខ្សែ នៅក្រុងព្រះសីហនុ កាលពីថ្ងៃសៅរ៍ សប្តាហ៍មុន។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ លើកឡើងថា ដំណើរទស្សនកិច្ចនោះ គឺឋិតក្នុងដំណាក់កាលដំបូងក្នុងការចរចា និងពិនិត្យលទ្ធភាពបង្កើតឱ្យមានកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា និងចិន។ លោកបញ្ជាក់ថា កិច្ចចរចាពាណិជ្ជកម្មសេរី គឺធ្វើឡើងដោយរួមបញ្ចូលទាំងកិច្ចចរចាលើពាណិជ្ជកម្មផ្នែកសេវាកម្ម វិនិយោគ និងការសម្រួលពាណិជ្ជកម្មមួយចំនួនទៀត។
លោកបន្ថែមថា នៅពេលកិច្ចព្រមព្រៀងនេះសម្រេចបាន កម្ពុជានឹងបើកចំហរលំហូរទំនិញគ្រប់មុខពីប្រទេសចិន តែលើកលែងប្រភេទមុខទំនិញមួយចំនួន ដោយអាស្រ័យលើការចរចា។
លោក ស៊ាង ថៃ មានប្រសាសន៍ថា៖ «ចំពោះទំនិញ វាមានរាប់ម៉ឺនមុខ។ ដូច្នេះ គេតែងតែមានមុខទំនិញដែលលើកលែង។ ឧទាហរណ៍ ដូចជា ទំនិញដែលពាក់ព័ន្ធទៅនឹងសន្តិសុខជាតិ ពាក់ព័ន្ធនឹងវប្បធម៌ប្រពៃណីរបស់ប្រទេសមួយៗ»។
យ៉ាងណា លោកទទួលស្គាល់ថា កម្ពុជានាំចេញទំនិញទៅកាន់ប្រទេសចិន តិចជាងចិននាំទំនិញចូលមកកម្ពុជា ប៉ុន្តែ រដ្ឋាភិបាលកំពុងព្យាយាមជំរុញការផ្សព្វផ្សាយទំនិញថ្មីៗរបស់កម្ពុជាទៅកាន់ទីផ្សារប្រទេសចិន។
ពាក់ព័ន្ធកិច្ចព្រមព្រៀងពាណិជ្ជកម្មសេរីនេះ ប្រធានមជ្ឈមណ្ឌលសិក្សាចិននៃរាជបណ្ឌិតសភាកម្ពុជា លោកបណ្ឌិត គី សេរីវឌ្ឍន៍ បានលើកឡើងកាលពីថ្មីៗនេះថា វានឹងបើកចំហរសេដ្ឋកិច្ចកម្ពុជាសម្រាប់ប្រទេសចិន ដែលនឹងជំរុញកំណើននៃការនាំចេញ-នាំចូលទំនិញរវាងប្រទេសទាំងពីរ។
យ៉ាងណា លោកថា កម្ពុជាគួរធ្វើយ៉ាងណាបណ្តុះបណ្តាលធនធានមនុស្ស និងលើកទឹកចិត្តដល់វិស័យសហគ្រាសខ្នាតតូច និងមធ្យម ក្នុងការជំរុញផលិតកម្មកែច្នៃផលិតផលកសិកម្មក្នុងស្រុក សម្រាប់ការនាំចេញទៅកាន់ទីផ្សារដ៏ធំរបស់ប្រទេសមួយនេះ។
លោក គី សេរីវឌ្ឍន៍ មានបន្ថែមថា៖ «យើងជំរុញឧស្សាហកម្មអេឡិចត្រូនិច ព្រោះមានន័យថា វាគឺជាវិវឌ្ឍនៃបែបផែនពាណិជ្ជកម្មដែលប្រទេសចិនរីកចម្រើនទូទៅ។ ចឹងបន្តិចទៀតទៅ គ្រឿងអេឡិចត្រូនិចនឹងត្រូវឈប់ផលិតនៅប្រទេសចិនហើយ ត្រូវរត់មកប្រទេសអាស៊ីអាគ្នេយ៍វិញម្តង […] ចឹងយើងនឹងទាញឱ្យ លើកទឹកចិត្តឱ្យការវិនិយោគមកលើវិស័យអេឡិចត្រូនិច យកទូរសព្ទ យកទូរទស្សន៍អី មកផលិតនៅស្រុកខ្មែរ ដើម្បីជំរុញឱ្យមានកំណើន(ការនាំចេញទៅទីផ្សារចិន)»។
យោងតាមរបាយការណ៍ពីក្រសួងពាណិជ្ជកម្ម កម្ពុជានាំទំនិញទៅចិនមានទំហំទឹកប្រាក់ចំនួន ៧៥៦លានដុល្លារ ឯចិនវិញនាំទំនិញចូលកម្ពុជាមានទំហំទឹកប្រាក់ចំនួន ៥ ៥៥៣លានដុល្លារ នេះគិតត្រឹមរយៈពេល ៩ខែដំបូងឆ្នាំ២០១៩។
ដោយឡែក នៅឆ្នាំ២០១៨ ការនាំចេញរបស់កម្ពុជាទៅចិនមាន ៨៦៤លានដុល្លារ កើនពី ៧៥៣លានដុល្លារ នៅឆ្នាំ២០១៧ ឯចិនវិញនាំចូលមកកម្ពុជាបានចំនួន ៦ ១៤៤លានដុល្លារ កើនពី៥ ២៨៧លានដុល្លារ នៅឆ្នាំមុន។
ក្នុងអំឡុងដំណើរទស្សនកិច្ចផ្លូវការទៅកាន់ប្រទេសចិនកាលពីខែមករា លោកនាយករដ្ឋមន្ត្រី ហ៊ុន សែន បានអះអាងថា រូបលោកផ្ទាល់ និងប្រធានាធិបតីចិន លោក ស៊ី ជិនភីង បានប្ដេជ្ញាបង្កើនទំហំពាណិជ្ជកម្មទ្វេភាគីឲ្យដល់ចំនួន ១០ពាន់លានដុល្លារ នៅត្រឹមឆ្នាំ២០២៣ខាងមុខ៕
