មេធាវីការពាក្ដីឱ្យក្រុមអ្នកគាំទ្រអតីតបក្សប្រឆាំង អះអាងថា អតីតមន្ត្រី និងសកម្មជនចំនួន ១៦នាក់នៅមិនទាន់ត្រូវបានតុលាការដោះលែងនៅឡើយ ដោយសារសំណុំរឿងរបស់ពួកគេសិ្ថតក្នុងនីតិវិធីជំនុំជម្រះ ហើយអ្នកខ្លះទៀតត្រូវបានតុលាការកាត់ទោសរួចហើយ។
លោក សំ សុគង់ មេធាវីការពាក្ដីឱ្យមន្ត្រី និងសកម្មជននៃគណបក្សសង្គ្រោះជាតិដែលត្រូវបានរំលាយចោលទៅហើយនោះ ប្រាប់វីអូឌីនៅថ្ងៃនេះថា តុលាការបានដោះលែងអ្នកគាំទ្រអតីតគណបក្សសង្គ្រោះជាតិជាង ៧០នាក់ ដែលត្រូវបានចាប់ខ្លួនក្រោមការចោទថា បាន«រួមគំនិតក្បត់» នៅក្នុងគម្រោងវិលត្រឡប់ចូលស្រុកវិញរបស់លោក សម រង្ស៊ី អតីតមេដឹកនាំគណបក្សនេះ។
មេធាវីរូបនេះ បានឱ្យដឹងទៀតថា ប៉ុន្តែ សកម្មជន និងអ្នកគាំទ្រអតីតបក្សប្រឆាំង ១៦រូបផ្សេងទៀត ដែលត្រូវបានចាប់ខ្លួនក្រោមបទចោទប្រកាន់ផ្សេងខុសពីបទចោទប្រកាន់ «រួមគំនិតក្បត់» បន្តស្ថិតនៅក្រោមការឃុំខ្លួននៅឡើយ។
«អ្នកដែលស្ថិតនៅក្នុងដៃចៅក្រមជំនុំជម្រះ យើងបានដាក់ពាក្យសុំនៅក្រៅឃុំបណ្ដោះអាសន្ន ដើម្បីឱ្យចៅក្រមជម្រះគាត់ពិចារណាពាក្យសុំ[យើង]។ ទី២ អ្នកដែលបានកាត់ទោសហើយ ហើយគាត់មានសាលក្រមហ្នឹង ខ្ញុំចង់សុំឱ្យខាងរដ្ឋាភិបាលសុំទៅព្រះមហាក្សត្រ ដើម្បីសុំលើកលែងទោសវិញ»។
លោក សំ សុគង់ បន្តថា ក្នុងចំណោមអ្នកទាំង ១៦នាក់ដែលតុលាការមិនទាន់ដោះលែងនោះ គឺនៅពោធិ៍សាត់ ៦នាក់ ភ្នំពេញ ៥នាក់ ខេត្តកំពង់ចាម ២នាក់ និងម្នាក់ៗនៅខេត្តត្បូងឃ្មុំ បន្ទាយមានជ័យ និងសៀមរាប។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាឌី សុំមិនទាន់ធ្វើអត្ថាធិប្បាយ ដោយសុំពេលសួរទៅក្រុមការងារសិន ប៉ុន្តែ នៅពេលវីអូឌីទំនាក់ទំនងម្ដងទៀត លោកមិនលើកទូរសព្ទ។
«ខ្ញុំសួរក្រុមការងារសិន»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានអះអាងថា ក្រុមអ្នកគាំទ្រអតីតបក្សប្រឆាំង ដែលត្រូវបានចាប់ខ្លួនក្រោមបទចោទប្រកាន់ «រួមគំនិតក្បត់» ត្រូវបានដោះលែងឱ្យនៅក្រៅឃុំអស់ហើយ។
លោក ជិន ម៉ាលីន ប្រាប់តាមតេឡេក្រាមថា៖ «អ្នកដែលត្រូវឃុំខ្លួនពីបទរួមគំនិតក្បត់ ត្រូវបានដោះលែងអស់ហើយ ដោយដាក់ឱ្យស្ថិតក្រោមការត្រួតពិនិត្យតាមផ្លូវតុលាការ»។
អគ្គនាយក នៃអគ្គនាយកដ្ឋានពន្ធនាគាររបស់ក្រសួងមហាផ្ទៃ លោក នុត សវនា មានប្រសាសន៍ថា សកម្មជន និងអ្នកគាំទ្រគណបក្សសង្គ្រោះជាតិជាង ៧០នាក់ហើយ ត្រូវបានដោះលែងពីពន្ធនាគារនៅទូទាំងប្រទេសចាប់តាំងពីថ្ងៃទី១៤ ខែវិច្ឆិកា នៅពេលលោកនាយករដ្ឋមន្ត្រី ហ៊ុន សែន បានបញ្ជាឱ្យដោះលែង និងបញ្ឈប់ការចាប់ខ្លួនក្រុមអ្នកគាំទ្របក្សប្រឆាំង។
លោក នុត សវនា បន្ថែមថា ក្រុមអ្នកគាំទ្រដទៃរបស់បក្សប្រឆាំងនៅមិនទាន់ត្រូវបានដោះលែងនៅឡើយទេ ដោយសារពួកគេមិនបានដាក់ពាក្យស្នើសុំនៅក្រៅឃុំ។
«សំណើរបស់សម្ដេចនាយក គាត់ឱ្យខាងក្រសួងយុត្តិធម៌ពិនិត្យលិទ្ធភាពមើល ដល់ពេលអ៊ីចឹងយើងបានទទួលការណែនាំមកថា ឱ្យសាម៉ីខ្លួនធ្វើលិខិតស្នើសុំនៅក្រៅឃុំ ប៉ុន្តែ ខ្ញុំឃើញករណីមួយនៅសៀមរាប ជនពិការម្នាក់នោះ គាត់នៅជាប់ឃុំនៅឡើយដោយសារគាត់មិនបានដាក់ពាក្យស្នើសុំ។ អ៊ីចឹង វាអត់បំពេញនីតិវិធីដែលតម្រូវមក។ អ៊ីចឹង យើងអត់អាចដោះលែងគាត់បាន បើគាត់ស្នើ គាត់ចេញរួចហើយ ខ្ញុំសួរទៅគាត់អត់ស្នើ»។
អ្នកគាំទ្របក្សសង្គ្រោះជាតិនៅខេត្តសៀមរាប លោក ធុន យុទ្ធ ដែលជាជនពិការផងនោះ ត្រូវបានសាលាដំបូងខេត្តសៀមរាបកាត់ទោសឱ្យជាប់ពន្ធនាគារ ១ឆ្នាំកន្លះ (១៨ខែ) កាលពីថ្ងៃ៣១ ខែតុលាកន្លងមកនេះ បន្ទាប់ពីត្រូវបានចាប់ខ្លួន និងចោទប្រកាន់ពីបទ «ញុះញង់ និងជេរប្រមាថជាសាធារណៈ» កាលពីថ្ងៃទី១៨ ខែកក្កដាកន្លងមក។
អ្នកស្រី មុំ វិត ភរិយាលោក ធុន យុទ្ធ ប្រាប់ថា អ្នកស្រីបានដាក់លិខិតស្នើសុំឱ្យដោះលែងស្វាមីតាំងពីថ្ងៃទី១៥ ខែវិច្ឆិកា ប៉ុន្តែ រហូតមកដល់ថ្ងៃនេះ ស្វាមីគាត់មិនទាន់បានដោះលែងនៅឡើយ។
អ្នកស្រី មុំ វិត និយាយថា៖ «ខ្ញុំដាក់ឯកសារអស់ហើយ តែចាំមើលអ្នកនៅភ្នំពេញគេទម្លាក់ឯកសារមកសិន។ គេថា ដោះលែងថ្ងៃណា គេនឹងតេប្រាប់»។
អ្នកនាំពាក្យសមាគមអាដហុក លោក ស៊ឹង សែនករុណា មានប្រសាសន៍ថា តុលាការគួរតែធ្វើការដោះលែងអ្នកផ្សេងៗទៀតដែលត្រូវបានសមត្ថកិច្ចឃាត់ខ្លួនកាលពីពេលកន្លងមក ពាក់ព័ន្ធនឹងរឿងនយោបាយនោះ ឱ្យមានសេរីភាពវិញ។
«រដ្ឋាភិបាលហើយនិងតុលាការ គេអាចធ្វើការជាមួយគ្នាបាន ដើម្បីធ្វើការដោះលែងអាហ្នឹង អាហ្នឹងគួរតែធ្វើការពិនិត្យទៅលើបញ្ហាហ្នឹង ដើម្បីដោះលែងឱ្យមានសេរីភាពទៅ»។
អតីតសកម្មជន និងអ្នកគាំទ្រគណបក្សសង្គ្រោះជាតិជាង ៨០នាក់ ត្រូវបានចាប់ខ្លួន និងចោទប្រកាន់ពីបទ «រួមគំនិតក្បត់» នៅក្នុងអ្វីដែលអាជ្ញាធរកម្ពុជាហៅថា «ការប៉ុនប៉ងផ្ដួលរំលំរដ្ឋាភិបាល» ប៉ុន្តែ ពួកគេត្រូវបានដោះលែងឱ្យនៅក្រៅឃុំបណ្ដោះអាសន្នវិញកាលពីថ្ងៃទី១៤ ខែវិច្ឆិកា កន្លងមក។
ការដោះលែងអតីតមន្ត្រី និងសកម្មជនជាបន្តបន្ទាប់នេះ ត្រូវបានធ្វើឡើងពីរថ្ងៃក្រោយពីសហភាពអឺរ៉ុប ប្រកាសថា បានបញ្ចប់ និងបញ្ជូនមករដ្ឋាភិបាលកម្ពុជានូវរបាយការណ៍ស៊ើបអង្កេតមួយ ដែលបង្ហាញពីកង្វល់ជុំវិញការធ្លាក់ចុះនៃការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។
សហភាពអឺរ៉ុបបានតម្រូវឱ្យរដ្ឋាភិបាលឆ្លើយតបនឹងរបាយការណ៍នេះនៅក្នុងរយៈពេល ១ខែ មុននឹងឈានទៅសម្រេចថា ព្យួរ ឬមិនព្យួរប្រព័ន្ធអនុគ្រោះពាណិជ្ជកម្ម «អ្វីគ្រប់យ៉ាងលើកលែងតែអាវុធ» (EBA) នៅខែកុម្ភៈឆ្នាំក្រោយនេះ៕