លោកនាយករដ្ឋមន្ត្រី ហ៊ុន សែន បានសម្រេចបញ្ចេញថវិការដ្ឋ ៣០លានដុល្លារនៅថ្ងៃនេះ បញ្ចូលទៅក្នុងគម្រោងសាងសង់អគារមន្ទីរពេទ្យកាល់ម៉ែត្រ ដោយថា មន្ទីរពេទ្យរដ្ឋមួយនេះកំពុងប្រឈមមុខនឹងកង្វះថវិកាសម្រាប់សាងសង់ និងទិញសម្ភារសម្រាប់បំពាក់នឹងអគារថ្មី។
សេចក្ដីសម្រេចបែបនេះរបស់លោកនាយករដ្ឋមន្ត្រី ហ៊ុន សែន ត្រូវបានប្រកាសឱ្យដឹងនៅលើទំព័រហ្វេសប៊ុកផ្លូវការរបស់លោកនៅល្ងាចថ្ងៃអាទិត្យនេះ។
ទំព័រហ្វេសប៊ុកលោក ហ៊ុន សែន រៀបរាប់ថា៖ «ថ្ងៃនេះ ខ្ញុំសម្រេចបញ្ចេញថវិការដ្ឋចំនួន ៣០លានដុល្លារ ដើម្បីបន្តកសាងអគារកម្ពស់ ១២ជាន់ ដែលមន្ទីរពេទ្យបានសាងសង់បាន ១៧ភាគរយរួចមកហើយក្នុងតម្លៃ ៣៩លាន ៧សែនដុល្លារ»។
ទំព័រហ្វេសប៊ុកដដែលនេះ បានរៀបរាប់បន្តថា លោកនាយករដ្ឋមន្ត្រី ហ៊ុន សែន បានសម្រេចបែបនេះ បន្ទាប់ពីលោកបានពិនិត្យឃើញមន្ទីរពេទ្យមួយនេះប្រឈមមុខនឹងកង្វះថវិកាសម្រាប់សាងសង់ និងទិញសម្ភារសម្រាប់បំពាក់នឹងអគារថ្មី។
ក្រៅពីបញ្ចេញថវិកាជាតិសម្រាប់ជួយដល់ការសាងសង់ហើយនោះ ទំព័រហ្វេសប៊ុកដដែលនេះ បានរៀបរាប់ទៀតថា លោក ហ៊ុន សែន បានកៀរគរថវិកា ៥៣លានដុល្លារពីបណ្ដាសប្បុរសជននានា សម្រាប់យកទៅចំណាយលើការទិញសម្ភារបំពាក់នៅមន្ទីរពេទ្យមួយនេះផងដែរ៕