អគ្គនាយកដ្ឋានពន្ធនាគារនៃក្រសួងមហាផ្ទៃ បានបដិសេធចំពោះខ្សែវីដេអូរបស់អង្គការលីកាដូ ដែលបង្ហាញពីជីវិតស្ត្រីជាម្ដាយនៅក្នុងពន្ធនាគារ ដោយចាត់ទុកវីដេអូថានេះ មិនបានឆ្លុះបញ្ចាំងពីការពិតនៃស្ថានភាពទូទៅក្នុងដំណើរការគ្រប់គ្រងពន្ធនាគារទូទាំងប្រទេសនាពេលបច្ចុប្បន្ន។
អង្គការលីកាដូ បានចេញផ្សាយវីដេអូមួយដែលមានរយៈពេល ៤នាទី ក្រោមចំណងជើងថា «ជីវិតជាម្ដាយក្នុងពន្ធនាគារ» កាលពីថ្ងៃចន្ទកន្លងមកនេះ ដោយក្នុងវីដេអូនេះ បង្ហាញអំពីផលលំបាករបស់ស្ត្រីមានផ្ទៃពោះម្នាក់ អំឡុងពេលជាប់ឃុំ និងបានសម្រាលកូនក្នុងពន្ធនាគារ។
វីដេអូ បង្ហាញនូវស្ត្រីម្នាក់ដែលអះអាងថា គាត់ត្រូវបានដាក់ឃុំ ក្រោយចាប់ខ្លួនក្រោមការចោទថា ជាប់ពាក់ព័ន្ធនឹងបទល្មើសគ្រឿងញៀន។
ស្ត្រីរូបនេះ បាននិយាយអំពីការរំលោភសិទ្ធិមនុស្សជាមូលដ្ឋានទៅលើស្ត្រីនៅក្នុងពន្ធនាគារ មានដូចជា កង្វះខាតនៃអាហារហូបចុក ទឹកស្អាត ពេលវេលានៅក្រៅបន្ទប់ឃុំឃាំង និងការការពារផ្លូវច្បាប់ ហើយជីវិតពិតរស់នៅក្នុងពន្ធនាគារ ប្រសិនបើអ្នកជាប់ឃុំគ្មានប្រាក់បង់ទេ អ្នកទាំងនោះក៏មិនទទួលបានសារៈសំខាន់មូលដ្ឋានផងដែរ។
ស្ត្រីមានផ្ទៃពោះ៖ «យើងពិបាកគ្រប់សព្វគ្រប់បែបយ៉ាង ពេលខ្ញុំទម្ងន់ គេអត់សូវមើលខ្ញុំដិតដល់ទេ។ ពេលយើងប្រាប់ថា យើងធ្លាក់ឈាមតិចតួចអីអ៊ីចឹង គេអត់យកយើងទៅពេទ្យទេ។ អេកូ ទាល់តែយើងគ្រប់ខែបានគេយកយើងទៅ។ គេអត់សូវបានមើលយើងទេ ពេលយើងនៅក្នុងហ្នឹង ឧបមា ពេលកូនកើតកូនអីអ៊ីចឹងទៅ។ ពេលវាឈឺវាអី គេអត់យកយើងទៅពេទ្យដែរ។ ឈឺធ្ងន់ធ្ងរម៉េចក៏ដោយ មានតែថ្នាំប៉ារ៉ា។ ពេលដែលខ្ញុំជិតឆ្លងទន្លេ គេនាំខ្ញុំទៅពេទ្យ គេនាំខ្ញុំទៅពេទ្យក្រៅ គេឱ្យខ្ញុំដេកតែពីរទៅបីថ្ងៃទេ។ ពេលខ្ញុំចូលមកវិញបានពីរទៅបីថ្ងៃ គេជាប់ពន្ធនាគារក្នុងហ្នឹង បានគេជួយមើលថែខ្ញុំបាន ៤ ទៅ ៥ថ្ងៃដែរ។ យើងអត់បានដេកសុខស្រួលទេ យើងត្រូវតែធ្វើការខ្លួនឯង។ បើយើងអត់ដាំស្លខ្លួនឯង អត់បានហូបទេ»។
នៅក្នុងវីដេអូនោះដែរ អង្គការការពារសិទ្ធិមនុស្សលីកាដូ បានផ្ដល់អនុសាសន៍ទៅអាជ្ញាធរ ឱ្យផ្ដល់អាទិភាពនីតិវិធីសុំនៅក្រៅឃុំចំពោះស្ត្រីមានផ្ទៃពោះ និងម្ដាយដែលមានកូនតូចនៅជាមួយ រួមទាំងអ្នកជាប់ឃុំជាអនីតិជន ដើម្បីធានាថា ការឃុំខ្លួនបណ្ដោះអាសន្នរបស់សមត្ថកិច្ច គឺធ្វើឡើងត្រឹមត្រូវ ដោយអនុលោមទៅតាមគោលការណ៍សន្មត់ថាគ្មានទោស។
ប៉ុន្តែ មួយថ្ងៃក្រោយថ្ងៃនៃការផ្សាយវីដេអូរបស់អង្គការលីកាដូ អគ្គនាយកដ្ឋានពន្ធនាគារបានចេញលិខិតបំភ្លឺមួយ ដោយចាត់ទុកវីដេអូរបស់អង្គការលីកាដូ ដែលបានជួបសម្ភាសជាមួយអតីតស្រ្តីជាប់ឃុំថា មិនបានឆ្លុះបញ្ចាំងពីការពិតនៃស្ថានភាពទូទៅក្នុងដំណើរការគ្រប់គ្រងពន្ធនាគារទូទាំងប្រទេសនាពេលបច្ចុប្បន្នឡើយ។
អគ្គនាយកដ្ឋានពន្ធនាគារ អះអាងថា ខ្លួនតែងតែសហការលើកកម្ពស់អភិបាលកិច្ចល្អ ការគោរពសិទ្ធិមនុស្ស និងឃ្លាំមើលចំណុចអវិជ្ជមាននានា ដើម្បីធ្វើការកែលម្អឡើងវិញ។
លិខិតបំភ្លឺថា៖ «អគ្គនាយកដ្ឋានពន្ធនាគារក្រសួងមហាផ្ទៃ ស្នើទៅអង្គការលីកាដូ ពិចារណាពិនិត្យឡើងវិញនូវអទិដ្ឋភាពជារួម និងងាកមកពិភាក្សាក្នុងនាមជាដៃគូអភិវឌ្ឍន៍ សំដៅលើកកម្ពស់ប្រសិទ្ធភាពការងារ សិទ្ធិជាមូលដ្ឋាន និងសុខុមាលភាពរបស់មន្ត្រី និងជនជាប់ឃុំ ផ្អែកលើគោលការណ៍សមភាព និងសមធម៌ ជាពិសេសសម្រាប់ជនដែលងាយរងគ្រោះ»។
នាយករងអង្គការលីកាដូ លោក អំ សំអាត អះអាងថា ការផលិតវីដេអូនេះ ជាផ្នែកមួយនៃយុទ្ធនាការ ១៦ថ្ងៃជាសាកលក្នុងការទប់ស្កាត់អំពើហិង្សាលើស្រ្តី។ លោកបន្តថា ក្នុងខឹ្លមសារនៃវីដេអូដែលអង្គការលីកាដូផលិតនេះ គឺផ្ញើសារទៅស្ត្រីផ្សេងៗទៀត កុំឱ្យប្រព្រឹត្តអ្វីខុសនឹងច្បាប់តែប៉ុណ្ណោះ។
លោក អំ សំអាត ប្រាប់ថា៖ «ចង់បង្ហាញពីផលលំបាកដែលកើតឡើងចំពោះស្ត្រី ដែលមានផ្ទៃពោះ និងស្ត្រីដែលមានកូនតូចតាមម្ដាយនៅក្នុងពន្ធនាគារថា តើជីវិតរស់នៅក្នុងពន្ធនាគារគាត់ជួបផលលំបាកអ្វីខ្លះ ដើម្បីឱ្យពលរដ្ឋពិចារណា ជាពិសេសគឺខាងស្ត្រីទាំងអស់ ពលរដ្ឋត្រូវគិតថា ថ្ងៃក្រោយគួរតែចៀសវាងថា កុំឱ្យប្រព្រឹត្តអ្វីដែលវាផ្ទុយអំពីច្បាប់ ហើយនាំឱ្យជួបផលលំបាករស់នៅក្នុងពន្ធនាគារ ថាវាមិនដូចការដែលយើងស្នាក់នៅខាងក្រៅទេ»។
របាយការណ៍របស់អង្គការលីកាដូចេញដំណាលគ្នានឹងការចេញផ្សាយវីដេអូនេះ បង្ហាញថា អង្គការនេះ បានឃ្លាំមើលនៅក្នុងពន្ធនាគារចំនួន ១៨ទីតាំង ដែលមានអ្នកជាប់ឃុំជាង ២៩០០០នាក់។
លីកាដូ លើកឡើងថា ក្នុងឆ្នាំ២០១៨ ចំនួនស្ត្រីមានផ្ទៃពោះ និងម្ដាយមានកូនតូចជាប់ជាមួយ បានជាប់ឃុំនៅក្នុងពន្ធនាគារមានចំនួនខ្ពស់បំផុត ក្នុងនោះ ស្រ្តីមានផ្ទៃពោះចំនួន ៥៥នាក់ និងម្ដាយជាប់កូនតូចចំនួន ២០៣នាក់ ដោយអ្នកជាប់ឃុំទាំងនោះពីបទល្មើសគ្រឿងញៀន៕
