អតីតនាយកខុទ្ទកាល័យរបស់លោក កឹម សុខា គឺលោក មុត ចន្ថា បានច្រានចោលនូវការលើកឡើងថា មេដឹកនាំគណបក្សនេះ បានជួបសន្ទនាតាមទូរសព្ទជាមួយអតីតមេបក្សប្រឆាំង លោក សម រង្ស៊ី។
លោក មុត ចន្ថា បានបដិសេធការអះអាងរបស់ប្រធានចលនាយុវជននៃចលនាសង្រ្គោះជាតិ លោក Sok Paul Pen នៅសហរដ្ឋអាមេរិក ដែលថា លោក កឹម សុខា និងលោក សម រង្ស៉ី បានសួរសុខទុក្ខគ្នាតាមទូរសព្ទ។
លោក មុត ចន្ថា ចាត់ទុកការអះអាងនេះថា មានបំណងមិនល្អលើលោក កឹម សុខា ហើយស្នើឱ្យធ្វើការកែតម្រូវជាបន្ទាន់។
VOD មិនអាចទាក់ទងម្ចាស់គណនីហ្វេសប៊ុក Sok Paul Pen បានទេ គិតត្រឹមម៉ោងផ្សាយនេះ ប៉ុន្តែ លោកបានសរសេរលើហ្វេសប៊ុក កាលពីថ្ងៃពុធថា៖
«មានអារម្មណ៍សប្បាយ រំភើបចិត្តស្ទើរតែស្រក់ទឹកភ្នែក បន្ទាប់ពីបានទទួលដំណឹងថា លោកទាំងពីរទូរសព្ទសួរសុខទុក្ខគ្នា»។
លោក មុត ចន្ថា សុំមិនបញ្ជាក់ថា ការប្រកាសបដិសេធពីការលើកឡើងនេះនឹងប៉ះពាល់អ្វីខ្លះដល់លោក កឹម សុខា ដែលស្ថិតក្រោមការត្រួតពិនិត្យតាមផ្លូវតុលាការនៅឡើយនោះទេ ដោយជំរុញឱ្យទៅសួរមេធាវីការពាក្ដីលោក កឹម សុខា វិញ។
លោក មុត ចន្ថា ប្រាប់ថា៖ «សួរទៅមេធាវី ព្រោះគាត់ជាផលប្រយោជន៍សិទ្ធិ និងផ្លូវច្បាប់កូនក្ដីគាត់ គ្រាន់តែខ្ញុំបញ្ជាក់ថា អ្វីដែលអ្នកសរសេរហ្នឹង គឺមិនពិត គឺជាការប្រឌិត។ អាហ្នឹងជាការព្រួយបារម្ភរបស់ខ្ញុំ»។
សហមេធាវីការពាក្ដីឱ្យលោក កឹម សុខា គឺលោក ផែង ហេង មានប្រសាសន៍ថា មិនទទួលបានព័ត៌មាននេះពីកូនក្ដីនៅឡើយ ប៉ុន្តែ ថាតុលាការមិនបានហាមកូនក្ដីពីការទំនាក់ទំនងតាមទូរសព្ទទេ គ្រាន់តែហាមធ្វើសកម្មភាពនយោបាយ។
លោក ផែង ហេង ប្រាប់ថា៖ «យើងមើលដំណើររឿងសព្វថ្ងៃ វាអាស្រ័យទៅលើការបកស្រាយច្បាប់។ ដូច្នេះ សកម្មភាពណាមួយដើម្បីកុំឱ្យមានការបកស្រាយច្បាប់ទូលំទូលាយមកលើគាត់ មានតែគាត់ត្រូវប្រុងប្រយ័ត្ន ការងារណាដែលមិនគួរ យើងមិនបាច់ធ្វើ។ ជារួម ខ្ញុំក៏គិតដូចលោក ចន្ថា ដែរ។ អ៊ីចឹងថា ឯកឧត្តម កឹម សុខា គាត់មិនមានហេតុផលណាមួយត្រូវខលទៅរក ឬទាក់ទងទៅទេក្នុងកាលៈទេសៈនេះនោះ»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន សុំមិនធ្វើអត្ថាធិប្បាយករណីនេះ ជំរុញឱ្យពិនិត្យមើលពីសេចក្ដីសម្រេចរបស់តុលាការចុះថ្ងៃទី១០ ខែវិច្ឆិកា ដែលពាក់ព័ន្ធទៅនឹងការដាក់លក្ខខណ្ឌលើលោក កឹម សុខា នេះ។
សេចក្ដីសម្រេចចេញដោយសាលាដំបូង ត្រូវបានចៅក្រមស៊ើបសួរសម្រេចបន្តដាក់ឱ្យលោក កឹម សុខា ស្ថិតក្រោមការត្រួតពិនិត្យតាមផ្លូវតុលាការ ដោយមិនអនុញ្ញាតឱ្យមេបក្សប្រឆាំងរូបនេះ ចេញទៅក្រៅប្រទេស មិនត្រូវធ្វើសកម្មភាពនយោបាយ និងត្រូវឆ្លើយតបនឹងការកោះហៅពីគ្រប់សមត្ថកិច្ច។
អ្នកនាំពាក្យក្រសួងយុត្តិធម៌ លោក ជិន ម៉ាលីន ពន្យល់ថា ទំនាក់ទំនងតាមទូរសព្ទពាក់ព័ន្ធរឿងនយោបាយត្រូវហាមឃាត់។
លោក ជិន ម៉ាលីន ប្រាប់ថា៖ «ក្នុងហ្នឹង គឺចៅក្រម គេហាមមិនឱ្យធ្វើសកម្មភាពនយោបាយ។ អ៊ីចឹងទេ ក្នុងការខល ឬជជែកក្នុងចេតនានយោបាយត្រូវបានហាមប្រាម»។
ទោះជាយ៉ាងណា ក្រោយពីតុលាការបន្ធូរបន្ថយលក្ខខណ្ឌជិត ២០ថ្ងៃមកនេះ លោក កឹម សុខា បានជួបពិភាក្សាជាមួយមន្ត្រីការទូតនៃប្រទេសលោកសេរីនានា ក្នុងនោះមានតំណាងសហរដ្ឋអាមេរិក បារាំង ជប៉ុង អាល្លឺម៉ង់ អូស្ត្រាលី និងឯកអគ្គរដ្ឋទូតអឺរ៉ុបប្រចាំនៅកម្ពុជា៕
