ក្រុមប្រឹក្សាឃ្លាំមើលកម្ពុជា ជំរុញទៅរដ្ឋាភិបាលឱ្យដោះស្រាយបញ្ហាដីធ្លីឱ្យមានតម្លាភាពរវាងពលរដ្ឋវៀតណាមខុសច្បាប់ និងពលរដ្ឋម្ចាស់ស្រុក។
ការជំរុញនេះ ធ្វើឡើងបន្ទាប់ពីរដ្ឋាភិបាលកម្ពុជាបានសម្រេចកាត់ដីទំហំ ៤០ហិកតា នៅភូមិដំបូកកកោះ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ឱ្យប្រជាពលរដ្ឋចំនួន ៤,៥៦៣គ្រួសារដែលរស់នៅលើផ្ទះបណ្តែតទឹកលើដងទន្លេសាប បន្ទាប់ពីពួកគេត្រូវបានជម្លៀសពីរស់នៅលើផ្ទៃទឹកទន្លេសាបនៅក្នុងខេត្តនេះ។ ក្នុងចំណោមប្រជាពលរដ្ឋជាង ៤ពាន់គ្រួសារនោះ គឺមានពលរដ្ឋជនជាតិវៀតណាម ២,៣៨៧គ្រួសារ។
ក្នុងសេចក្ដីថ្លែងការណ៍របស់ខ្លួនចុះថ្ងៃទី២ ខែធ្នូនេះ ក្រុមប្រឹក្សាឃ្លាំមើលកម្ពុជាបានច្រានចោលចំពោះសេចក្ដីសម្រេចរបស់រដ្ឋាភិបាលដែលបានផ្ដល់ដី ៤០ហិកតា ឱ្យជនអន្តោប្រវេសន៍ ដោយថា រដ្ឋាភិបាលត្រូវពិនិត្យមើលឡើងវិញ ចំពោះជនអន្តោប្រវេសន៍វៀតណាមដែលទទួលបានសញ្ជាតិខ្មែរ និងជនអន្តោប្រវេសន៍រស់នៅខុសច្បាប់។
«រដ្ឋាភិបាលកម្ពុជាមិនត្រូវផ្ដល់ដីធ្លីដល់ជនអន្តោប្រវេសន៍វៀតណាមណាម្នាក់ធ្វើជាលំនៅឋានដាច់ខាត។ សម្រាប់ជនជាតិវៀតណាមដែលទទួលបានសញ្ជាតិខ្មែររួចហើយ ពួកគេត្រូវតែរកលទ្ធភាពទិញ ឬជួលផ្ទះសម្រាប់ស្នាក់នៅដោយខ្លួន(ឯង)»។
ក្រុមប្រឹក្សាឃ្លាំមើលកម្ពុជា ឱ្យដឹងថា រដ្ឋាភិបាលត្រូវបញ្ជូនជនអន្តោប្រវេសន៍វៀតណាមដែលរស់នៅកម្ពុជាដោយខុសច្បាប់ទៅប្រទេសដើមកំណើតរបស់ខ្លួន ជាជាងការសម្រេចផ្ដល់ដីឱ្យជនអន្តោប្រវេសន៍វៀតណាមទាំងនោះធ្វើជាលំនៅឋាន ហើយត្រូវយកចិត្តទុកដាក់ដោះស្រាយបញ្ហាវិវាទដីធ្លីជូនប្រជាពលរដ្ឋខ្មែរដែលត្រូវបានអ្នកមានអំណាច និងក្រុមឈ្មួញខិលខូចរំលោភបំពានដីធ្លី។
តំណាងក្រុមប្រឹក្សាឃ្លាំមើលកម្ពុជា លោក រ៉ុង ឈុន មានប្រសាសន៍ថា ការផ្ដល់ដីរបស់រដ្ឋាភិបាលឱ្យជនអន្តោប្រវេសន៍វៀតណាមស្នាក់នៅនេះ កំពុងធ្វើឱ្យប្រទេសជាតិប្រឈមនឹងហានិភ័យ ដោយសារ វៀតណាមជាប្រទេសនៅជាប់ព្រំដែនកម្ពុជា និងមានប្រវត្តិយកទឹកដីកម្ពុជានាពេលអតីតកាល។
«ក្នុងអំឡុងពេល ៣០ឆ្នាំ ទៅ ៥០ឆ្នាំខាងមុខ ពេលហ្នឹង កម្ពុជាយើងនឹងមានហានិភ័យខ្ពស់មែនទែន អាចបង្កើតរដ្ឋក្នុងរដ្ឋ។ អាហ្នឹងដែលជាបញ្ហាចោទមែនទែន»។
អភិបាលរងខេត្តកំពង់ឆ្នាំង លោក ស៊ុន សុវណ្ណារិទ្ធ ប្រាប់វីអូឌីនៅថ្ងៃនេះថា នៅក្នុងប្រទេសកម្ពុជា មិនមានច្បាប់តម្រូវឱ្យរដ្ឋាភិបាលផ្ដល់ដីឱ្យអន្តោប្រវេសន៍សម្រាប់ធ្វើលំនៅឋានទេ។ លោកបន្តថា រដ្ឋាភិបាលផ្ដល់ដី ៤០ហិកតា ដើម្បីបញ្ចៀសការរិះគន់ថា រដ្ឋាភិបាលរំលោភសិទ្ធិមនុស្សដែលបណ្ដោយឱ្យប្រជាពលរដ្ឋរស់នៅលើផ្ទៃទឹក មិនមានអនាម័យ មិនមានសាលារៀន និងមិនគិតអំពីបរិស្ថាននៅដងទន្លេសាប។
«យើងរៀបចំពីទឹកមកគោកនេះ ដើម្បីបរិស្ថាន ជីវៈចម្រុះនៅក្នុងទន្លេឱ្យមានភាពប្រសើរ ការគ្រប់គ្រងជនអន្តប្រវេសន៍មានប្រសិទ្ធភាព និងមានលក្ខណៈពិសេសច្រើនទៀត ដែលពាក់ព័ន្ធនឹងការនៅលើគោកនេះ វាល្អជាងនៅក្នុងទឹក។ នៅក្នុងទឹកនេះ បើយើងទុកពីមួយថ្ងៃទៅមួយថ្ងៃ ប្រជាជននៅបឹងទន្លេសាប វាចេះតែច្រើនៗទៅ អ៊ីចឹងបរិស្ថាននៅបឹងទន្លេសាប វាកាន់តែកខ្វក់ទៅៗ។ អ៊ីចឹង សូម្បីតែនៅទីនេះ ខេត្តខ្ញុំនេះ បើសិននៅខែ៣ និងខែ៤ ខាប់ដូចទឹកគ្រឿងអ៊ីចឹង ភាពកខ្វក់ អ៊ីចឹងសូម្បីតែត្រីក៏នៅមិនបានដែរ»។
អ្នកជំនាញផ្នែកច្បាប់ លោកមេធាវី សុក សំអឿន មានប្រសាសន៍ថា រដ្ឋាភិបាលមានសិទ្ធិសម្រេចក្នុងការផ្ដល់ដីដល់ជនអន្តោប្រវេសន៍ដែលរស់នៅក្នុងប្រទេសស្របច្បាប់ ប៉ុន្តែ បើសិនជនអន្តោប្រវេសន៍ទាំងអស់នោះ រស់នៅខុសច្បាប់ លោកថា រដ្ឋាភិបាលត្រូវចាប់បញ្ជូនពួកគេទៅប្រទេសកំណើតវិញ។
«បើសិនជាអន្តោប្រវេសន៍ស្របច្បាប់ ហើយជាអន្តោប្រវេសន៍ស្នាក់នៅយូរ អាហ្នឹង រដ្ឋាភិបាលមានសិទ្ធិចាត់ចែង តែបើសិនជាអន្តោប្រវេសន៍ខុសច្បាប់ អាហ្នឹង វាអត់ត្រូវវិញ ព្រោះបើសិនជាយើងធ្វើអ៊ីចឹង ដូចទទួលស្គាល់ខុសច្បាប់ទៅជាស្របច្បាប់វិញ»។
ទោះជាយ៉ាងណា ក្រុមប្រឹក្សាឃ្លាំមើលកម្ពុជាអំពាវនាវទៅរដ្ឋាភិបាលលុបចោល ចំពោះសេចក្ដីសម្រេចការផ្ដល់ដី ៤០ហិកតាដល់ជនអន្តោប្រវេសន៍វៀតណាម ដើម្បីជាការឆ្លើយតបនឹងការទាមទាររបស់ប្រជាពលរដ្ឋខ្មែរ នៅលើបណ្ដាញសង្គម។
កាលពីថ្ងៃទី២៩ ខែវិច្ឆិកា ឆ្នាំ២០១៩ រដ្ឋបាលខេត្តកំពង់ឆ្នាំបានចេញសេចក្ដីប្រកាសព័ត៌មានមួយ ដោយបកស្រាយពីការផ្ដល់ដី ៤០ហិកតា ឱ្យប្រជាពលរដ្ឋដែលរស់នៅលើផ្ទះបណ្តែតទឹកលើដងទន្លេសាប បម្លាស់ទីទៅរស់នៅលើដីគោកចំនួន ៤៥៦៣គ្រួសារ ដោយក្នុងនោះ មានទាំងខ្មែរ ខ្មែរ-អ៊ីស្លាម និងវៀតណាម៕
