មន្ត្រីនគរបាលកម្ពុជា អះអាងថា សមត្ថកិច្ចកំពុងស៊ើបអង្កេតស្វែងរកមេខ្លោងស្ថិតនៅពីក្រោយការនាំចូលគ្រឿងញៀន និងសារធាតុគីមីផ្សំជាង១០០គីឡូក្រាម ក្រោយពីសមត្ថកិច្ចចាប់ខ្លួនជនជាតិវៀតណាម ៤នាក់កាលពីថ្ងៃម្សិលមិញនេះ។
នាយករងនៃមន្ទីរប្រឆាំងគ្រឿងញៀន លោក អ៊ិន សុង បានប្រាប់វីអូឌីនៅថ្ងៃនេះថា ជនជាតិវៀតណាម ៤នាក់ ក្នុងនោះមានស្ត្រី ២នាក់ផងដែរ ត្រូវបាននគរបាលចាប់ខ្លួននៅក្នុងផ្ទះជួលមួយ ស្ថិតក្នុងសង្កាត់បឹងកេងកង ក្រោយពីសមត្ថកិច្ចរកឃើញថ្នាំញៀនជាង៨៤គីឡូក្រាម និងសារធាតុគីមីផ្សំជាង២៨គីឡូក្រាម។
មន្ត្រីនគរបាលរូបនេះ បញ្ជាក់ថា សមត្ថកិច្ចនឹងបញ្ចប់ការកសាងសំណុំរឿង និងបញ្ជូនខ្លួនជនសង្ស័យជាជនជាតិវៀតណាមទាំង៤នាក់នោះ ទៅតុលាការថ្ងៃនេះ។
លោក អ៊ិន សុង ប្រាប់ថា៖ «សមត្ថកិច្ចយើងកំពុងតែស្រាវជ្រាវយ៉ាងញាប់ដៃញាប់ជើង ដើម្បីរកមេខ្លោងនៅពីក្រោយខ្នង។ អ៊ីចឹង យើងកំណត់បានមុខសញ្ញាអស់ហើយ។ ទម្រាំបង្ក្រាបករណីនេះបាន សមត្ថកិច្ចជំនាញយើងប្រើពេលស៊ើបអង្កេតអស់ជាច្រើនខែមកហើយ»។
សមត្ថកិច្ចកម្ពុជារូបនេះ បានអះអាងទៀតថា គ្រឿងញៀនចំនួនដ៏ច្រើនបែបនេះ ត្រូវបាននាំចេញពីតំបន់ត្រីកោណមាស ចំណុចប្រសព្វនៃប្រទេសថៃ ភូមា និងឡាវ មុននឹងនាំចូលឆ្លងកាត់ព្រំដែនកម្ពុជា-ឡាវ ស្ថិតនៅភាគឦសានប្រទេសកម្ពុជា។
លោក អ៊ិន សុង បន្តថា៖ «តាមលទ្ធផលដែលយើងធ្វើកោសល្យវិច័យ យើងពិនិត្យឃើញថា គ្រឿងញៀនប្រភេទមេតំហ្វេតាមីនហ្នឹង គឺវាមានប្រភពមកពីតំបន់ត្រីកោណមាសនេះឯង។ គ្រឿងនេះ វាឆ្លងកាត់ពីឡាវមក ហើយឆ្លងកាត់ព្រំប្រទល់ទិសឦសាននៃប្រទេសយើងហ្នឹង ចូលមកដល់ក្នុងផ្ទៃប្រទេសនេះឯង ហើយតាមការស៊ើបអង្កេតគ្រឿងញៀនមួយផ្នែកធំក៏បន្តទៅវៀតណាមផងដែរ»។
តួលេខផ្ដល់ឱ្យដោយមន្ត្រីនគរបាលរូបនេះ ឱ្យដឹងថា គិតចាប់តាំងពីខែមករា រហូតដល់ថ្ងៃទី០៤ ខែធ្នូ ឆ្នាំ២០១៩នេះ សមត្ថកិច្ចបានបង្ក្រាបករណីគ្រឿងញៀនចំនួន ៨,៩៧២ករណី ចាប់បានគ្រឿងញៀនជាងកន្លះតោន ឃាត់ខ្លួនបានជនសង្ស័យចំនួន១៨,៧៧៨នាក់ ក្នុងនោះមានស្ត្រី ១,២៤៧នាក់ ហើយមានជនបរទេសចំនួន៣៨១នាក់ ចំណោមនោះមានស្ត្រីចំនួន៦៣នាក់៕
