លោកនាយករដ្ឋមន្ត្រី ហ៊ុន សែន ថ្លែងថា ស្ថាប័នព័ត៌មានដែលហ៊ាននិយាយពិត និងហ៊ានរិះគន់ក្នុងន័យស្ថាបនា បានជួយទប់ស្កាត់ភាពវឹកវរក្នុងសង្គម។
ថ្លែងតាមសារលិខិតផ្ញើជូនវេទិកានិពន្ធនាយកសារព័ត៌មានកម្ពុជា ចុះនៅថ្ងៃទី៥ ខែធ្នូ ឆ្នាំ២០១៩ លោកនាយករដ្ឋមន្ត្រី ហ៊ុន សែន ថារដ្ឋាភិបាលត្រូវការស្ថាប័នព័ត៌មានដែលមានថាមពលប្រកបដោយទទួលខុសត្រូវខ្ពស់ និងមានភាពស្មោះត្រង់ចំពោះវិជ្ជាជីវៈ ដែលតម្រូវឱ្យអ្នកសារព័ត៌មានទាំងអស់ត្រូវស្ដាប់សំឡេងគ្រប់ភាគីពាក់ព័ន្ធ ហ៊ាននិយាយការពិត ហ៊ានរិះគន់ក្នុងន័យស្ថាបនា និងហ៊ានទទួលយកការពិត។
លោក ហ៊ុន សែន ថាស្ថាប័នព័ត៌មានដែលហ៊ាននិយាយការពិត ហ៊ានរិះគន់នេះ បានធ្វើការឆ្លុះបញ្ចាំងឱ្យឃើញគ្រប់តថភាពសង្គម ចៀសវាងការផ្សព្វផ្សាយព័ត៌មានមួយជ្រុង ឬព័ត៌មានក្លែងក្លាយបំប៉ោងសភាពការណ៍ ញុះញង់ឱ្យមានជម្លោះផ្ទៃក្នុង រុញច្រានប្រទេសធ្លាក់ក្នុងភាពវឹកវរ អសន្តិសុខ ឬបង្កឱ្យកើតមានជម្លោះប្រដាប់អាវុធជាមួយប្រទេសជិតខាង ហើយធ្វើឱ្យអន្តរាយដល់ប្រទេសជាតិ ដើម្បីផលប្រយោជន៍ផ្ទាល់ខ្លួន។
លោក ហ៊ុន សែន លើកឡើងថា៖ «ខ្ញុំសូមអំពាវនាវដល់បងប្អូនអ្នកសារព័ត៌មានជាតិ និងអន្តរជាតិ ដែលកំពុងបំពេញបេសកកម្មលើវិស័យព័ត៌មាននៅក្នុងព្រះរាជាណាចក្រកម្ពុជា សូមយកចិត្តទុកដាក់អនុវត្តភារកិច្ចឱ្យបានត្រឹមត្រូវតាមវិជ្ជាជីវៈសារព័ត៌មាន និងខិតខំអភិវឌ្ឍសមត្ថភាពរបស់ខ្លួនបន្ថែមទៀត ទាំងសមត្ថភាពផ្នែកជំនាញបច្ចេកទេសទាំងផលិតព័ត៌មាន និងការវិភាគព័ត៌មានឱ្យបានស៊ីជម្រៅកម្រិតអន្តរជាតិ។ ដើម្បីឆ្លើយតបទៅនឹងការវិវឌ្ឍនៃបច្ចេកវិទ្យា និងការប្រកួតប្រជែងទីផ្សារឱ្យកាន់តែមានសក្ដានុពលថែមទៀត ព្រមទាំងរិះរកវិធានការទប់ស្កាត់បន្សាបរាល់ព័ត៌មានក្លែងក្លាយ ដែលកំពុងគំរាមកំហែងយ៉ាងធ្ងន់ធ្ងរលើសិទ្ធិបុគ្គលឯកជន សន្តិសុខជាតិ និងស្ថិរភាពនយោបាយក្នុងកម្ពុជា»។
អគ្គនាយកបណ្ដាញព័ត៌មាន Fresh News លោក លឹម ជាវុត្ថា សម្ដែងការគាំទ្រចំពោះសារលិខិតលោកនាយករដ្ឋមន្ត្រី ដោយថា ការផ្សព្វផ្សាយព័ត៌មានគ្រប់ជ្រុងជ្រោយនេះ វាបង្ហាញពីភាពមិនលំអៀងរបស់ខ្លួនឱ្យសាធារណជនបានដឹង។ លោកបន្តថា កន្លងមក ស្ថាប័នរបស់លោកតែងតែសុំឆ្លើយតបពីគ្រប់ភាគីពាក់ព័ន្ធ ប៉ុន្តែ ភាគីទាំងនោះមិនបានសហការជាមួយទេ។
លោក លឹម ជាវុត្ថា មានប្រសាសន៍ថា៖ «វាជាការលំបាកមួយសម្រាប់ដំណឹង ប៉ុន្តែ ខ្ញុំយល់អ្វីដែលបំណងខាងវីអូឌីសួរ។ ខ្ញុំទទួលស្គាល់ថា ចំណុចខ្លះសាព័ត៌មានសម្ភាសបានតែម្ខាងទៀត ជាពិសេសភាគីក្រុមប្រឆាំងតែម្ដង យើងពិបាកនឹងទាក់ទង តាមរយៈពេលខ្លះយើងទៅហើយ គាត់លឺតែខាងយើង គាត់បិទទូរសព្ទចោល ខ្ញុំសុំនិយាយយ៉ាងខ្លី ហើយពាក្យពេចន៍ហ្នឹង ខ្ញុំធ្លាប់និយាយច្រើនលើកតាមប្រព័ន្ធផ្សព្វផ្សាយ គ្រាន់តែខាងរបស់ខ្ញុំនេះ គឺផ្សាយតែលើគណបក្សកាន់អំណាច ឬរដ្ឋាភិបាល ហើយមិនបានផ្សាយទៅលើក្រុមប្រឆាំង។ ប៉ុន្តែ សួរថា ខាងខ្ញុំខលទៅសម្ភាស គាត់ថាអញ្ចេះមួយ ថាអញ្ចេះពីរ យកសម្ដីមកវិញតែមិនដែលនិយាយចូលទេ»។
អ្នកនាំពាក្យក្រសួងព័ត៌មាន លោក ផុស សុវណ្ណ មានប្រសាសន៍ថា ក្រសួងមិនមានវិធានការអ្វីទៅលើសារព័ត៌មានដែលសរសេរប្រភពតែម្ខាងនោះទេ ប៉ុន្តែ លោកថា ការសរសេរបែបនេះ នឹងធ្វើឱ្យប្រជាពលរដ្ឋបាត់បង់ទំនុកចិត្តលើស្ថាប័នទាំងនោះ។
លោក និយាយថា៖ «អ្នកសារព័ត៌មានដែលគេមានជំនាញអាជីព គេនៅតែទទួលបានព័ត៌មានបំភ្លឺមកវិញ ប៉ុន្តែ អ្នកខ្លះគាត់ធ្លាប់និយាយមិនពិត ដល់ពេលទាក់ទង ដល់ពេលទាក់ទងទៅគេ! គេនៅតែមិនឆ្លើយតប។ អ៊ីចឹង កន្លែងហ្នឹងជាសិល្បៈមួយ យើងគិតថា ធ្វើជំនួញអ្នកណាក៏ចង់បានប្រាក់ចំណេញដែរ ប៉ុន្តែ អ្នកធ្វើជំនួញទាំងអស់មិនមែនសុទ្ធតែជោគជ័យទេ។ អាជីពសារព័ត៌មានក៏ដូចគ្នាដែរ យើងត្រូវរក្សាអតិថិជនរបស់យើងដែលគេផ្ដល់ព័ត៌មានឱ្យយើងហ្នឹង តើយើងត្រូវផ្ដល់ទំនុកចិត្តយ៉ាងម៉េចឱ្យគេ។»
នាយកប្រតិបត្តិសម្ព័ន្ធអ្នកសារព័ត៌មានកម្ពុជា លោក ម៉ៃ ទិត្យថារ៉ា សម្ដែងការគាំទ្រចំពោះអនុប្រសាសន៍លោកនាយករដ្ឋមន្ត្រី ដោយសារនេះបង្ហាញថា ប្រមុខរដ្ឋាភិបាលគាំទ្រឱ្យមានសារព័ត៌មានឯករាជ្យ ដោយហ៊ាននិយាយការពិត ដើម្បីធ្វើការស្ថាបនាពីបញ្ហាដែលកើតឡើងនៅក្នុងសង្គម។
លោក និយាយថា៖ «សម្រាប់ខ្ញុំគិតថា ជាការឆ្លើយតបការចង់បានរបស់សម្ដេច ពិតត្រឹមត្រូវមែន។ សម្ដេចគួរពិចារណាក្នុងការផ្ដល់អាជ្ញាប័ណ្ណទៅដល់ស្ថានីយ៍វិទ្យុមួយចំនួន ដែលត្រូវបានដកអាជ្ញាប័ណ្ណកន្លងមក ហើយនិងអនុញ្ញាតឱ្យស្ថានីយ៍បរទេសមួយចំនួនអាចជួលម៉ោងផ្សាយដូចកាលពីមុនបាន។»
របាយការណ៍របស់អង្គការអ្នករាយការណ៍គ្មានព្រំដែន ស្ដីពីសន្ទស្សន៍សេរីភាពសារព័ត៌មានពិភពលោកឆ្នាំ២០១៩ បានចាត់ថ្នាក់ប្រទេសកម្ពុជាក្នុងលំដាប់លេខ១៤៣ លើ១៨០ ដែលបង្ហាញថា ស្ថានភាពសេរីភាពសារព័ត៌មាននៅក្នុងប្រទេសនេះ ស្ទើរតែគ្មានភាពសេរីទាល់តែសោះ និងបានធ្លាក់ចុះជាបន្តបន្ទាប់ពី១៤២ នៅឆ្នាំ២០១៨ និង១៣៧ ក្នុងឆ្នាំ២០១៧៕
