អាជ្ញាធរខេត្តសៀមរាបអះអាងថាខ្លួនកំពុងបន្តនីតិវិធីស្រាវជ្រាវរកអ្នកទទួលខុសត្រូវក្នុងហេតុការណ៍បាក់សំណង់អាគារសាលាធម្មសភា ក្នុងវត្តប្រាសាទគោកចក នាខេត្តសៀមរាបកាលពីថ្ងៃទី២ ខែធ្នូកន្លងមកនេះ។
ស្នងការនគរបាលខេត្តសៀមរាប លោក ទិត្យ ណារ៉ុង បានបញ្ជាក់ប្រាប់វីអូឌីកាលពីម្សិលមិញថា សមត្ថកិច្ចកំពុងបន្តនីតិវិធីស្រាវជ្រាវស្វែងរកអ្នកទទួលខុសត្រូវពិតប្រាកដក្នុងដំណើរការសាងសង់អគារសាលាធម្មសភា ស្ថិតក្នុងវត្តប្រាសាទគោកចក ដែលមានការបាក់រលំ បណ្តាលឱ្យមានមនុស្សស្លាប់រហូត៣នាក់។ លោក ណារ៉ុង បានបដិសេធមិនបញ្ជាក់អំពីចំនួនមនុស្សដែលកំណត់មុខសញ្ញាជាជនសង្ស័យនោះឡើយ តែលោកថាម្ចាស់សំណង់ជាចៅអធិការវត្ត និងក្រុមអ្នកម៉ៅការសុទ្ធជាអ្នកជាប់ពាក់ព័ន្ធដែលតម្រូវឱ្យមានការស្រាវជ្រាវបន្ថែម។
លោក ទិត្យ ណារ៉ុង បានអះអាងថា៖ «យើងកំពុងស្រាវជ្រាវរកអ្នកទទួលខុសត្រូវឱ្យបានពិតប្រាកដ។ ព្រះសង្ឃនៅទីនោះលោកក៏ជាអ្នកទទួលខុសត្រូវ ហើយអ្នកដែលមានកិច្ចសន្យាជាមួយលោកនោះក៏ទទួលខុសត្រូវ។ មិនមែនក្រុមជាងអ្នកម៉ៅការក៏ដូចជាក្រុមជាងដែរ អ្នកដែលមានកិច្ចសន្យាទទួលការងារពីលោក ហើយលោកក៏ជាអ្នកចាត់ចែងការងារពីលើនោះដែរ»។
ប្រធានមន្ទីរៀបចំដែនដី នគរូបនីយកម្ម សំណង់ និងសុរិយោដី ខេត្តសៀមរាប លោក ហ៊ី សាយ មានប្រសាសន៍ថាការចុះស្រាវជ្រាវអំពីមូលហេតុនៃការបាក់រលំអគារសាលាធម្មសភារបស់វត្តប្រាសាទគោកចកនាពេលកន្លងមកពុំទាន់បញ្ចប់ការធ្វើរបាយការណ៍នៅឡើយទេ។ លោកថា របាយការណ៍បឋម បញ្ជាក់ថាការរលំបាក់អគារ គឺបណ្តាលមកពីកំហុសឆ្គងបច្ចេកទេសសាងសង់ដោយប្រើជន្ទល់សុទ្ធជាឈើចាស់ៗ។
លោក ហ៊ី មានប្រសាសន៍ថា៖ «របាយការណ៍បឋម វាមកពីរន្ទាហ្នឹង វាមកពីជន្ទល់។ ជន្ទល់ជាឈើចាស់យូរហើយ ជន្ទល់ពីឈើចាស់ តែវាមិនទាន់ច្បាស់ទេ ចាំបានរបាយការណ៍ពីក្រសួងមកសិន»។
អ្នកនាំពាក្យរដ្ឋបាលខេត្តសៀមរាប លី សំរិទ្ធ បានអះអាងថា ពេលនេះក្រុមការងារថ្នាក់ខេត្តកំពុងផ្តោតការយកចិត្តទុកដាក់ស៊ើបអង្កេតលើបច្ចេកទេសនៃការសាងសង់អគារសាលាធម្មសភា របស់វត្តប្រាសាទគោកចកដែលបានបាក់រលំនាពេលកន្លងមក តែពុំទាន់មានលទ្ធផលនៅឡើយទេ។ លោកបញ្ជាក់ថា ត្បិតមានការបាក់រលំអាគារ តែសំណង់ក្នុងបរិវេណវត្តមួយនេះ មានច្បាប់ត្រឹមត្រូវ ហើយទទួលបានលិខិតអនុញ្ញាតពីអាជ្ញាធរអប្សរាថែមទៀតផង។
លោក លី សំរិទ្ធ បានរៀបរាប់ថា៖ «ការបាក់រលំនេះ និយាយមួយម៉ាត់ឱ្យខ្លី ដោយសារតែវាទ្រអត់ឈ្នះ តែទ្រមិនឈ្នះ គឺបាក់ហើយ។ ប៉ុន្តែសំណង់វត្តនេះ គឺសំណង់ដែលមានច្បាប់ណា៎ ព្រោះតំបន់ហ្នឹងជាតំបន់ដែលគ្រប់គ្រងដោយអាជ្ញាធរអប្សរា»។
អ្នកនាំពាក្យអាជ្ញាធរជាតិអប្សរា លោក ឡុង កុសល្យ បានទទួលស្គាល់ថា ការសាងសង់សាលាធម្មសភា ស្ថិតក្នុងវត្តប្រាសាទគោកចក ពិតជាទទួលបានលិខិតអនុញ្ញាតពីអាជ្ញាធរអប្សរាប្រាកដមែន ប៉ុន្តែជាការអនុញ្ញាតតាមបែបបទរដ្ឋបាលប៉ុណ្ណោះ។ លោកពន្យល់ថា ការឆ្លើយតបតាមបែបបទរដ្ឋបាល គឺសំដៅលើការដាក់ឯកសារស្នើរសុំ ដើម្បីជម្រាបដល់ស្ថាប័នពាក់ពន្ធ ហើយស្ថាប័នរដ្ឋក៏តបលិខិតយល់ព្រមតាមសំណើរ គ្មានជាប់ព័ន្ធស៊ីជម្រៅនឹងបច្ចេកទេសនៃការសាងសង់អគារឡើយ។
លោក ឡុង កុសល្យ បានអះអាងថា៖ «ដោយសារតំបន់ហ្នឹង ទីតាំងហ្នឹងស្ថិតនៅក្នុងតំបន់ការពារបេតិកភ័ណ្ឌពិភពលោក ចឹងរាល់ការសាងសង់អីទាំងអស់ហ្នឹងគឺត្រូវសុំច្បាប់ជាមុន សុំការអនុញ្ញាតជាមុនពីអាជ្ញាធរជាតិអប្សរា។ ក្នុងការផ្តល់ការអនុញ្ញាត គឺយើងផ្តល់ជាលក្ខណៈបែបរដ្ឋបាល ប៉ុន្តែយើងមិនបានពិនិត្យលើប្លង់ រឺលក្ខណៈបច្ចេកទេសនៃសំណង់ហ្នឹងទេ។ ចឹងរាល់ការពិនិត្យបច្ចេកទេស រាល់ការសាងសង់អីទៀត គឺត្រូវស្ថិតនៅលើផ្នែកជំនាញ»។
ចៅអធិការវត្តប្រាសាទគោកចក ព្រះតេជគុណ ហែម គឹមសាន មិនមានព្រះថេរដីការបញ្ជាក់អំពីក្រុមការងារពាក់ព័ន្ធក្នុងការសាងសង់អគារសាលាធម្មសភារបស់វត្តនោះឡើយ ដោយលើកហេតុផលបញ្ជាក់ខ្លីត្រឹមដល់ម៉ោងឆាន់ប៉ុណ្ណោះ។
សេចក្តីប្រកាសព័ត៌មានរបស់រដ្ឋបាលខេត្តសៀមរាបបានបញ្ជាក់ថា កាលពីថ្ងៃទី០២ ខែធ្នូ អាគារសាលាធម្មសភា មានទទឹង៣០ម៉ែត្រ បណ្តោយ៤០ម៉ែត្រ និងកម្ពស់៨ម៉ែត្រ ស្ថិតក្នុងបរិវេណវត្តប្រាសាទគោកចក ភូមិវាល សង្កាត់គោកចក ក្រុងសៀមរាប ខេត្តសៀមរាប បានបាក់រលំ វេលាម៉ោងប្រមាណ៣រសៀល ខណៈកំពុងចាក់បេតុងសាងសង់តែម្តង។ ហេតុការណ៍នេះបណ្តាលឱ្យមានជនរងគ្រោះស្លាប់បាត់បង់ជីវិតចំនួន៣នាក់ និងរងរបួសធ្ងន់ស្រាលចំនួន១៣នាក់៕