តំណាងជនជាតិដើមភាគតិចពូនងនៅខេត្តមណ្ឌលគិរី បានអះអាងថា ផ្ទៃដីមួយចំនួននៃដីសហគមន៍របស់ពួកគេ បានបាត់បង់ ក្រោយពីមន្ត្រីសុរិយោដីខេត្តនេះ បានចុះវាស់វែងព្រំដីរបស់មជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ។
ក្រុមជនជាតិដើមភាគតិចពូនង បានអះអាងបែបនេះនៅក្នុងលិខិតមួយ ដែលចុះហត្ថលេខាដោយតំណាងសហគមន៍ ៤រូប ហើយត្រូវបានផ្ញើទៅប្រធានមន្ទីររៀបចំដែនដី នគរូបនីយកម្ម និងសំណង់ កាលពីថ្ងៃម្សិលមិញនេះ។
លោក គ្រើង តុលា តំណាងម្នាក់ក្នុងចំណោមតំណាង ៣រូបដែលបានចុះហត្ថលេខាលើលិខិតបដិសេធនោះ បានអះអាងថា មន្ត្រីជំនាញសុរិយោដីខេត្តមណ្ឌលគិរី បានចុះវាស់វែងដីមជ្ឈមណ្ឌលកាលពីថ្ងៃទី០៥ ខែធ្នូកន្លងមកនេះ ដោយមិនបានដាក់បញ្ចូលដីដែលអាជ្ញាធរខេត្តបានប្រគល់ឱ្យជនជាតិដើមភាគតិចកាលពីខែមីនាក្នុងឆ្នាំ២០១៩នេះនោះឡើយ។
លោក គ្រើង តុលា រៀបរាប់ថា៖ «ខ្ញុំស្នើសុំឱ្យខាងគណៈកម្មការថ្នាក់ជាតិចុះដោះស្រាយបញ្ហានេះឱ្យលឿន ដើម្បីឈានដល់ការអភិវឌ្ឍនៅលើដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំនេះតែម្ដង»។
លោកថា ការធ្វេសប្រហែសមិនធ្វើឯកសារកំណត់ព្រំដីរបស់មជ្ឈមណ្ឌលបានត្រឹមត្រូវនាពេលកន្លងមក បានធ្វើឱ្យសហគមន៍ជនជាតិដើមបាត់បង់ដីពីជាង ១០០ហិកតា មកសល់ត្រឹមប្រមាណជាង ៨៥ហិចតាម្ដងរួចមកហើយ ដូច្នេះ លោកចង់ឱ្យមន្ទីរជំនាញពង្រឹងនីតិវិធីការងាររបស់ខ្លួន រក្សាដី និងអត្តសញ្ញាណជនជាតិដើម។
ដីការបស់រដ្ឋបាលខេត្តមណ្ឌលគិរី ស្ដីពីការនិរាករណ៍កាលពីថ្ងៃទី១៨ ខែមីនា ឆ្នាំ២០១៩ បានសម្រចដកហូតដីចំនួនបីកន្លែងប្រគល់មកឱ្យជនជាតិដើមភាគតិចវិញ។ រដ្ឋបាលខេត្តបានសម្រចដកហូតដី ទំហំ ៥,០៧ហិកតាសម្រាប់សាងសង់គ្រឹះស្ថានស្រាវជ្រាវរ៉ែ ថាមពល និងប្រេងកាត ដីទំហំ២៥ម គុណ ៥០ម ទុកសាងសង់មន្ទីរឧស្សាហកម្ម និងសិប្បកម្ម និងដីទំហំ ២៥ម គុណ៥០ម៉ែត្រ សម្រាប់សាងសង់មន្ទីរមុខងារសាធារណៈ សាងសង់អគាររដ្ឋបាល ទុកជាដីរបស់មជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំវិញ។
ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តមណ្ឌលគិរី លោក ម៉ៅ ចំរើន បានបដិសេធមិនធ្វើការបកស្រាយអ្វីទាំងអស់ទាក់ទងនឹងបញ្ហានេះ ដោយអះអាងថា លោកជាប់ប្រជុំ។
អ្នកនាំពាក្យរដ្ឋបាលខេត្តមណ្ឌលគិរី លោក សុក សេរ៉ា បានថ្លែងទទួលស្គាល់ថា ដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ ពិតជាប្រឈមនឹងបញ្ហាកើតមានវិវាទច្រើនដង ហើយមានការទន្ទ្រានយកដីធ្វើជាកម្មសិទ្ធផ្ទាល់ខ្លួនប្រាកដមែន។
លោកថា ដីរបស់មជ្ឈមណ្ឌលនេះបានរួមតូច ពីទំហំដីប្រមាណ១០១ហិកតា មកនៅត្រឹមប្រមាណ៨៥ហិកតាប៉ុណ្ណោះនាបច្ចុប្បន្ន តែបញ្ហានេះជាសកម្មភាពទន្ទ្រានយកដីរស់នៅរបស់ពលរដ្ឋក្នុងតំបន់ប៉ុណ្ណោះ។
ឯការចុះវាស់វែងដីរបស់ក្រុមការងារថ្នាក់ខេត្តកាលពីពេលថ្មីៗនេះ ក៏ដើម្បីសាងឯកសារចេញប័ណ្ណកម្មសិទ្ធជូនសហគមន៍ជនជាតិដើមភាគតិចដែរ។
អ្នកនាំពាក្យរូបនេះថា ការចោទរបស់តំណាងជនជាតិដើម អាចជាការភាន់ច្រឡំ ព្រោះមិនយល់ពីបច្ចេកទេសវាស់វែងរបស់ក្រុមការងារជំនាញ។
លោក សុក សេរ៉ា បន្តថា៖ «ចាំមើលគេធ្វើឱ្យហើយសិន ព្រោះទើបតែបោះ ហើយគេកំពុងតែវាស់វែងមិនទាន់ចប់ផង ឥលូវគេយកទៅដំឡើងផែនទី ដំឡើងអី។ ចប់ គេនឹងហៅក្រសួងវប្បធម៌ ក្រសួងដែនដី និងអ្នកពាក់ព័ន្ធ ដូចជាក្រុមគណកម្មការជនជាតិដើមភាគតិចមកពិនិត្យមើល»។
តាមការបញ្ជាក់របស់លោក សុក សេរ៉ា សកម្មភាពក្រុមការងារថ្នាក់ខេត្ត ចុះកំណត់ និងវាស់វែងព្រំដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ ស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី អាចនឹងបញ្ចប់ការងាររបស់ខ្លួនត្រឹមខែមករា ដើមឆ្នាំ២០២០ខាងមុខនេះ៕