គណៈកម្មាធិការសិទ្ធិមនុស្សកម្ពុជា និងរុស្សី គ្រោងចុះកិច្ចព្រមព្រៀងលើអនុស្សរណៈយោគយល់គ្នាស្ដីពីកិច្ចសហប្រតិបត្តិការលើវិស័យសិទ្ធិមនុស្ស នាថ្ងៃទី១៨ ខែឆ្នូ ឆ្នាំ២០១៩ ខាងមុខនេះ។
ក្នុងសេចក្ដីប្រកាសព៍ត៌មានចុះថ្ងៃទី១៣ ខែធ្នូ ឆ្នាំ២០១៩ ឱ្យដឹងថា គណៈកម្មាធិការសិទ្ធិមនុស្សកម្ពុជានឹងដឹកនាំគណៈប្រតិភូ គ.ស.ម.ក. ទៅបំពេញទស្សនកិច្ចនៅរុស្ស៊ី២ថ្ងៃ ចាប់ពីថ្ងៃទី១៧ ដល់១៨ ខែធ្នូ ឆ្នាំ២០១៩ ដើម្បីចុះហត្ថលេខាលើអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យសិទ្ធិមនុស្សជាមួយរុស្ស៊ី។
អ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក ជិន ម៉ាលីន បញ្ជាក់បន្ថែមថា ការចុះកិច្ចព្រមព្រៀងនេះ ដើម្បីធ្វើការចែករំលែកបទពិសោធ និងរៀនសូត្រពីគ្នាទៅវិញទៅមក រួមទាំងពង្រឹងសមត្ថភាពផ្នែកសិទ្ធិដល់មន្ត្រីរបស់ប្រទេសទាំងពីរផងដែរ។
លោក ជិន ម៉ាលីន មានប្រសាសន៍ថា៖ «ជួយកិច្ចសហការគ្នាក្នុងការផ្លាស់ប្តូរឯកសារព័ត៌មានគ្នាទៅវិញទៅមកតាមការស្នើសុំ ហើយព្រមទាំងមានការជួយគ្នា គាំទ្រគ្នា និងការពារគ្នានៅលើឆាកអន្តរជាតិ ក៏ដូចជាវេទិកាតំបន់ និងវេទិកាអន្តរជាតិពាក់ព័ន្ធនឹងសិទ្ធិមនុស្សនេះ ក្នុងការជួយការពារគ្នា និងជួយគាំទ្រគ្នាទៅវិញទៅមក។ ហើយក្រៅពីហ្នឹងគឺមានការជួយដល់ប្រជាពលរដ្ឋនៅក្នុងប្រទេសទាំងសងខាង។ ពលរដ្ឋកម្ពុជានៅរុស្ស៊ី ពលរដ្ឋរុស្ស៊ីនៅកម្ពុជាដែលទទួលរងនូវការរំលោភបំពានសិទ្ធិ»។
នាយករងអង្គការលីកាដូទទួលបន្ទុកផ្នែកឃ្លាំសិទ្ធិមនុស្ស លោក អំ សំអាត យល់ថា កម្ពុជាគួរផ្តោតកិច្ចសហប្រតិបត្តិការជាមួយប្រទេសដែលមានលទ្ធិប្រជាធិបតេយ្យចាស់ទុំដូចជាបណ្ដាប្រទេសនៅសហគមន៍អឺរ៉ុប។
លោក អំ សំអាត មានប្រសាសន៍ថា៖ «ខ្ញុំយល់ថា អានេះ វាជាការយល់ឃើញរបស់រដ្ឋាភិបាលទេ [ក្នុងការកិច្ចចុះព្រមព្រៀង] ប៉ុន្តែ បើយើងគិតពីវិស័យសិទ្ធិមនុស្សវិញ ការជំរុញភាពជឿនលឿននៃសិទ្ធិមនុស្ស គេច្រើនផ្ដោតអារម្មណ៍ទៅលើប្រទេសដែលប្រកាន់លទ្ធិប្រជាធិបតេយ្យ មានភាពចាស់ទុំ ក្នុងការផ្ដល់ជាបទពិសោធ ឬក៏កិច្ចសហប្រតិបត្តិការ ដើម្បីធ្វើយ៉ាងណាពន្លឿន និងកែលម្អបញ្ហាសិទ្ធិមនុស្សនៅក្នុងប្រទេសឱ្យបានល្អប្រសើរ»។
បើតាមលោក ជិន ម៉ាលីន ឱ្យដឹងថា នេះជាលើកទីមួយហើយ ដែលកម្ពុជា និងប្រទេសរុស្ស៊ី ចុះកិច្ចព្រមព្រៀងជាមួយគ្នាលើវិស័យសិទ្ធិមនុស្ស។