អតីតបុគ្គលិកវិទ្យុអាស៊ីសេរី បានប្រាប់ឱ្យដឹងថា សាលាឧទ្ធរណ៍បានសម្រេចលើកពេលប្រកាសសាលដីកាសំណុំរឿងរបស់ពួកគេទៅចុងខែនេះ បន្ទាប់ពីបញ្ចប់សវនាការបណ្ដឹងទាស់នៅរសៀលថ្ងៃនេះ។
អតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា ចាប់ខ្លួន និងចោទប្រកាន់ថា បានធ្វើចារកម្មឱ្យរដ្ឋបរទេស ហើយបន្ទាប់មកក៏ត្រូវបានចោទប្រកាន់មួយករណីបន្ថែមទៀត ពីបទផលិត និងកាន់កាប់រូបភាពអាសអាភាស។
សំណុំរឿងអតីតបុគ្គលិកវិទ្យុអាស៊ីសេរីទាំងពីររូបនេះ ត្រូវបានសាលាដំបូងរាជធានីភ្នំពេញសម្រេចកាលពីថ្ងៃទី០៣ ខែតុលាកន្លងមក ឱ្យបើកការស៊ើបអង្កេតឡើងវិញ ប៉ុន្តែ ពួកគេបានប្ដឹងសាលាឧទ្ធរណ៍ជំទាស់នឹងសេចក្ដីសម្រេចនេះ។
ក្រោយសវនាការនៅរសៀលថ្ងៃនេះ លោក យាង សុធារិន្ទ បានប្រាប់ថា សាលាឧទ្ធរណ៍បានសម្រេចលើកពេលប្រកាសសាលដីកាទៅប្រកាសនៅថ្ងៃទី៣០ ខែធ្នូ ឬដើមសប្ដាហ៍ក្រោយនេះ។
ប្រាប់អ្នកសារព័ត៌មាននៅក្រៅរបងតុលាការ លោក សុធារិន្ទ និយាយថា លោកចាត់ទុកការសម្រេចរបស់សាលាដំបូងកាលពីខែតុលាកន្លងមកថា មានចេតនាចង់ធ្វើបាបពួកគាត់ ព្រោះពួកគាត់ជាអតីតអ្នកយកព័ត៌មានវិទ្យុអាស៊ីសេរី។
លោក យាង សុធារិន្ទ និយាយថា៖ «អ៊ីចឹង វាជាចេតនាមួយចាប់ខ្លួនពួកខ្ញុំជាការគំរាមកំហែង ទៅលើអ្នកសារព័ត៌មាន ផ្សេងទៀតដែរ។ បើសិនជាតុលាការរកឃើញ ពួកខ្ញុំកំហុសប្រាកដណាស់នឹងប្រកាសសាលក្រមតាំងពីថ្ងៃទី៣ តុលា មិនមែនបង្កើតឱ្យមានសាលក្រមចាត់របៀប[ស៊ើបអង្កេតបន្ថែម]»។
លោក អ៊ួន ឈិន បានស្នើទៅសាលាឧទ្ធរណ៍ឱ្យច្រានចោលសេចក្តីសម្រេចរបស់សាលាដំបូងរាជធានីភ្នំពេញ ដែលតម្រូវឱ្យស៊ើបអង្កេតករណីនេះឡើងវិញ។
លោក អ៊ួន ឈិន និយាយថា៖ «សាលាឧទ្ធរណ៍នឹងទម្លាក់ចោល និងច្រានចោលសាលក្រមចាត់របៀប។ ពួកយើងនឹងមានសេរីភាពឡើងវិញ»។
លោក អ៊ួន ឈិន និងលោក យាង សុធារិន្ទ ត្រូវបានអាជ្ញាធរចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧ ហើយក្រោយមកត្រូវបញ្ជូនខ្លួនទៅដាក់ឃុំក្រោមការចោទប្រកាន់ថា បានធ្វើចារកម្មឱ្យរដ្ឋបរទេស និងផលិត និងកាន់កាប់រូបភាពអាសអាភាស។
អ្នកទាំងពីរ ត្រូវបានដោះលែងឱ្យស្ថិតនៅក្រៅឃុំបណ្ដោះអាសន្ន និងដាក់ឱ្យស្ថិតក្រោមការត្រួតពិនិត្យតាមផ្លូវតុលាការចាប់តាំងពីខែសីហាឆ្នាំមុន៕