មន្ត្រីសាលាខេត្តកោះកុង បានឱ្យដឹងថា សមត្ថកិច្ចខេត្តបានបញ្ជាឱ្យម្ចាស់គម្រោងអភិវឌ្ឍន៍មួយ កាយអាចម៍ដីចេញពីឆ្នេរសមុទ្រស្ថិតក្នុងភូមិស្មាច់ង៉ាម ក្នុងខេត្តកោះកុង បន្ទាប់ពីមានបញ្ជាពីលោកនាយករដ្ឋមន្ត្រី ហ៊ុន សែន កាលពីចុងសប្ដាហ៍កន្លងមកនេះ។
លោកនាយករដ្ឋមន្ត្រី ហ៊ុន សែន បានបញ្ជាឱ្យរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា និងអភិបាលខេត្តកោះកុង លោកស្រី មិថុនា ភូថង កាលពីថ្ងៃ២២ ខែធ្នូ ឱ្យពិនិត្យករណីមាននាយទាហានម្នាក់ល្មើសច្បាប់ ចាក់ដីលុបឆ្នេរសមុទ្រនៅខេត្តកោះកុងនាពេលថ្មីៗនេះ។
អ្នកនាំពាក្យសាលាខេត្តកោះកុង លោក សុខ សុទ្ធី មានប្រសាសន៍ថា សំណុំរឿងទាហានចាក់ដីលុបសមុទ្រនៅភូមិស្មាច់ង៉ាម ត្រូវបានបញ្ជូនទៅតុលាការ ដើម្បីចាត់វិធានការច្បាប់រួចហើយ។
លោក សុខ សុទ្ធី ប្រាប់ថា៖ «កាលពីថ្ងៃទី៣ ខែធ្នូ មន្ត្រីសាលាខេត្តបានសហការជាមួយមន្ត្រីតុលាការ ចុះស្រាវជ្រាវ និងរឹបអូសយកគ្រឿងចាក់មួយចំនួន។ បន្ទាប់ពីបុគ្គលឈ្មោះ ទុន ដៀប បានលុបឆ្នេរសមុទ្រដែលមានទំហំទទឹង៣ម៉ែត្រ និងបណ្ដោយជាង៤០ម៉ែត្រ»។
មន្ត្រីសម្របសម្រួលអង្គការលីកាដូ លោក ហួរ អ៊ីន មានប្រសាសន៍ថា ទាហានម្នាក់បានចាក់ដីលុបសមុទ្រ(ព្រែកកោះប៉ោល) បានមួយផ្នែក ក្រោយមកព្រះរាជអាជ្ញារងនៃអយ្យការអមសាលាដំបូងខេត្តកោះកុង លោក អ៊ុន សុវណ្ណធានី សហការជាមួយមន្ត្រីបរិស្ថានខេត្ត ចុះទប់ស្កាត់ការចាក់ដីនេះ ព្រមទាំងកោះហៅទាហានធ្វើកិច្ចសន្យាកាយយកដីដែលចាក់នោះ ចេញពីសមុទ្រវិញ។
ទោះជាយ៉ាងណា មន្ត្រីសម្របសម្រួលអង្គការលីកាដូរូបនេះ សង្កេតឃើញថា មន្ត្រីតុលាការមួយចំនួន អនុវត្តច្បាប់នៅក្នុងខេត្តកោះកុងមានស្ដង់ដារពីរ រវាងអ្នកមានអំណាច និងអ្នកគ្មានអំណាច។
លោក ហួរ អ៊ីន និយាយថា៖ «នៅកោះកុង មិនមែនមានតែករណីហ្នឹងមួយទេ ករណីកាយភ្នំ ករណីលុបព្រែកផ្សេងៗទៀត សម្រាប់អ្នកមានលុយ មានអំណាច យើងមិនដែលឃើញមានចំណាត់ការផ្លូវច្បាប់ម្ដងណាទេ ប៉ុន្តែ សម្រាប់ប្រជាពលរដ្ឋតូចតាច ទៅលើកាប់ឆ្ការទៅលើដីដែលបានវាស់វែងហើយ ក៏ត្រូវមានចំណាត់ការទៅតាមផ្លូវច្បាប់ យើងឃើញការអនុវត្តមានស្ដង់ដាពីរ រវងអ្នកមានលុយ អ្នកមានអំណាច ហើយនិងប្រជាពលរដ្ឋសាមញ្ញ ដែលមានជីវភាពក្រីក្រ»។
ព្រះរាជអាជ្ញារង នៃអយ្យការអមសាលាដំបូងខេត្តកោះកុង លោក អ៊ុន សុវណ្ណធានី សុំមិនធ្វើការបកស្រាយជុំវិញករណីនេះទេ ដោយថា ករណីនេះស្ថិតក្នុងដំណាក់កាលនៃការស៊ើបអង្កេតនៅឡើយ៕
