អាជ្ញាធរបានរារាំងក្រុមកម្មករបម្រើការងាររោងចក្រមួយក្នុងស្រុកខ្សាច់កណ្ដាល ខេត្តកណ្ដាល មិនឱ្យឡើងមកតវ៉ានៅខុទ្ទកាល័យនាយករដ្ឋមន្ត្រី ដើម្បីរកអន្តរាគមន៍ពីលោក ហ៊ុន សែន ជួយដោះស្រាយវិវាទការងារ ដែលអះអាងថា ថៅកែបានបិទទ្វារោងចក្រដោយមិនបានជូនដំណឹង និងដោះស្រាយសំណងជូនពួកគេ។
កម្មករប្រមាណ៥០០នាក់បម្រើការងារនៅរោងចក្រ អេសអ៊ីអ៊ីអេស គ្លូប៊ល (SEES GLOBAL CO.,LTD) ស្ថិតក្នុងភូមិព្រៃចាស់ ឃុំវិហារសួគ៌ នៅថ្ងៃនេះ បាននាំគ្នាដើរជាក្បួនចេញពីរោងចក្របម្រុងទៅខុទ្ទកាល័យនាយករដ្ឋមន្ត្រីដើម្បីសុំទៅលោក ហ៊ុន សែន ជួយដោះស្រាយសំណងជូនពួកគេ ប៉ុន្តែ ដើរបានប្រមាណ៤គីឡូម៉ែត្រ ត្រូវបានអាជ្ញាធរខេត្តកណ្ដាលរារាំងឱ្យត្រឡប់ទៅដោះស្រាយនៅរោងចក្រវិញ។
អភិបាលស្រុកខ្សាច់កណ្ដាល លោក ប៊ុន ផេង ដែលដឹកនាំកម្លាំងចុះរារាំង មានប្រសាសន៍ថា ការចុះឃាត់មិនឱ្យកម្មករដើរហែរក្បួនទៅដល់ខុទ្ទកាល័យនាយករដ្ឋមន្ត្រីនោះ ដោយសារបារម្ភខ្លាចប៉ះពាល់ទៅទីសារធាណៈ និងម្យ៉ាងទៀត អាជ្ញាធរស្រុក និងអ្នកពាក់ព័ន្ធផ្សេងទៀតកំពុងសម្របសម្រួលដោះស្រាយជូនកម្មករហើយ។
លោកបន្ថែមថា៖ «យើងធ្វើអីក៏ដោយ គឺធ្វើតាមនីតិវិធី និងតាមផ្លូវច្បាប់។ បើខ្ញុំនិយាយថា ខ្ញុំអត់លទ្ធភាពដោះស្រាយ អាហ្នឹងបងប្អូនធ្វើអីធ្វើចុះ។ ប៉ុន្តែ នេះខ្ញុំថា ខ្ញុំមានលទ្ធភាពច្រើនក្នុងការដោះស្រាយ។ ដូចខ្ញុំបានជម្រាបទៅសហជីពអ៊ីចឹង ខ្ញុំមានមេនៅខាងលើជួយដោះស្រាយច្រើន ហើយពួកគាត់តាំងចិត្តថា ជួយយើងដែរ»។
ខណៈអាជ្ញាធររារាំងមិនឱ្យកម្មករធ្វើដំណើរហែរក្បួនទៅខុទ្ទកាល័យនាយករដ្ឋមន្ត្រីនោះ ក៏មន្ត្រីក្រសួងការងារនិងបណ្ដុះបណ្ដាលវិជ្ជាជីវៈមួយចំនួន ចុះមកសម្របសម្រួល និងទទួលញត្តិពីក្រុមកម្មករផងដែរ។ ហើយក្រោយមានការសម្របសម្រួលពីមន្ត្រីទាំងនោះរួចមក គឺក្រុមកម្មករបានត្រឡប់ទៅតវ៉ាមុខរោងចក្រវិញ។
អគ្គលេខាធិការរងនៅគណកម្មការដោះស្រាយកូដកម្ម បាតុកម្មនៅគ្រប់មុខសញ្ញានៃក្រសួងការងារ លោក ខៀវ សាវុធ ដែលចុះមកសម្របសម្រួល និងដោះស្រាយករណីនេះដែរ មានប្រសាសន៍ថា ក្រសួងការងារនឹងដោះស្រាយបញ្ហាជូនកម្មករដោយផ្អែកតាមច្បាប់ ហើយថា មិនឱ្យកម្មករបាត់បង់ផលប្រយោជន៍ឡើយ។
លោកបន្ថែមថា៖ «យើងឃើញហើយ នៅថ្ងៃនេះក្រុមប្រឹក្សាអាជ្ញាកណ្ដាលកំពុងកោះអញ្ជើញគ្រប់ភាគីមកដោះស្រាយ។ ដោយឡែកខាងក្រសួងការងារដែលមានខ្ញុំជាតំណាង ក៏មកទទួលពាក្យប្តឹងរបស់បងប្អូនកម្មករទៅដោះស្រាយដោយផ្អែកតាមច្បាប់ គឺមិនឱ្យបាត់បង់ផលប្រយោជន៍របស់បងប្អូនកម្មករទេ។ បើយើងចង់បានល្ងាចហ្នឹង ឬស្អែក វាលំបាកបន្តិច តែដឹងថា បានដំណោះស្រាយ»។
កម្មការិនីផ្នែកដេរម្នាក់ អ្នកស្រី ភួង សុធា ប្រាប់វីអូឌីកន្លែងរារាំងថា ក្រុមកម្មករបានផ្ទុះការតវ៉ាមុខរោងចក្ររយៈពេល១០ថ្ងៃហើយ ដើម្បីរង់ចាំការដោះស្រាយពីភាគីពាក់ព័ន្ធ ប៉ុន្តែ មិនទទួលបានដំណោះស្រាយនោះទេ ទើបក្រុមកម្មករសម្រេចនាំគ្នាដើរជាក្បួនទៅរកអន្តរាគមន៍ពីលោកនាយករដ្ឋមន្ត្រី ហ៊ុន សែន។
កម្មការិនីរូបនេះអះអាងថា ថៅកែរោងចក្រជាជនជាតិកូរ៉េខាងក្បូង បានបិទទ្វារោងចក្រចាស់ទៅបង្កើតរោងចក្រថ្មី ដោយមិនបានជូនដំណឹង និងដោះស្រាយសំណងផ្សេងៗជូនកម្មករឡើយ។
អ្នកស្រីបន្ថែមថា៖ «គំនិតវា [ថៅកែរោងចក្រ] ចង់បិទរោងចក្រហ្នឹង វាទៅបើករោងចក្រថ្មី ប៉ុន្តែ វាអត់បានជូនដំណឹងកម្មករទេ កម្មចាស់ៗដឹងទេ។ ហើយវាឱ្យកម្មករចាស់ៗហ្នឹងធ្វើកិច្ចសន្យាលុបអតីតភាពការងារចាស់ៗហ្នឹង ហើយទៅចូលរោងចក្រថ្មីដោយមិនទទួលបានសំណងទេ។ ប៉ុន្តែ កម្មករចាស់មិនព្រម ក៏តវ៉ា»។
កម្មការិនីម្នាក់ផ្នែកដេរ អ្នកស្រី ចែវ យឹម ដែលអះអាងថា បម្រើការងារនៅរោងចក្រ អេសអ៊ីអ៊ីអេស គ្លូប៊ល រយៈពេល៧ឆ្នាំ ឱ្យដឹងថា កម្មករប្រមាណ៥០០នាក់បានបម្រើការងារនៅរោងចក្រនេះចន្លោះ២ឆ្នាំ ទៅ៩ឆ្នាំ ដោយបានប្រើកិច្ចសន្យាមិនកំណត់។
អ្នកស្រីបន្តថា បើថៅកែរោងចក្រប្តូរទីតាំង ឬកន្លែងថ្មី ត្រូវដោះស្រាយសំណងផ្សេងៗជូនកម្មករតាមផ្លូវច្បាប់ឱ្យបានត្រឹមត្រូវជាមុនសិន។
ប្រធានរដ្ឋបាលរោងចក្រ អេសអ៊ីអ៊ីអេស គ្លូប៊ល ( SEES GLOBAL CO.,LTD) លោក ប៊ុន ណារ៉េត មិនអាចសុំការឆ្លើយតបបានទេជុំវិញបញ្ហានេះដោយទូរសព្ទចូលច្រើនដងគ្មានអ្នកទទួល ប៉ុន្តែ យ៉ាងណា តំណាងសហជីពឱ្យដឹងថា នៅម៉ោង៤រសៀលនេះ ភាគីពាក់ព័ន្ធមានតំណាងក្រសួងការងារ មន្ទីរការងារខេត្តកណ្ដាល តំណាងកម្មករ និងសហជីពកំពុងជួបប្រជុំគ្នាស្វែងរកដំណោះស្រាយ។
ប្រធានសម្ព័ន្ធសហជីពអំណាចយុវជនកម្ពុជា លោក សៀង រិទ្ធី មានប្រសាសន៍ថា តាមផ្លូវច្បាប់ ពេលរោងចក្របិទទ្វា ត្រូវដោះស្រាយសំណងជូនកម្មករចំនួន៥ចំណុចមានប្រាក់រំលឹកអតីតភាពការងារ ប្រាក់ជូនដំណឹងមុន សំណងជំងឺចិត្ត ប្រាក់បំណាច់ឆ្នាំដែលនៅសល់ និងប្រាក់ខែចុងក្រោយ។
ជុំវិញវិវាទការងារនៅ អេសអ៊ីអ៊ីអេស គ្លូប៊ល លោក សៀង រិទ្ធី យល់ឃើញថា ថៅកែរោងចក្រហាក់មានចេតនាចង់គេចវេសមិនដោះស្រាយប្រាក់អតីតភាពការងារជូនកម្មករចាស់ៗដែលយូរឆ្នាំ។ សហជីពរូបនេះបន្តថា ដើម្បីជួយសម្រួល និងពន្លឿនការដោះស្រាយជូនដល់កម្មករ រដ្ឋាភិបាលត្រូវបញ្ចេញថវិកាបុរេប្រទានមកដោះស្រាយជូនកម្មករ។
លោកបន្ថែមថា៖ «អ៊ីចឹងទេ ជាសំណូមពររបស់តំណាងសហជីព និងបងប្អូនកម្មករគឺមានតែពឹងទៅលើសម្ដេច ហ៊ុន សែន ទេ សុំឱ្យគាត់ទម្លាក់លុយបុរេប្រទាន ដើម្បីយកមកដោះស្រាយជូនបងប្អូនកម្មករជាបឋមសិន។ ហើយកិច្ចការងារទាមទារតាមផ្លូវច្បាប់ជាមួយថៅកែរោងចក្រហ្នឹង សុំឱ្យរដ្ឋាភិបាលធ្វើការងារជាបន្តតាមក្រោយទៀតចុះ»។
ប្រធានសម្ព័ន្ធសហជីពអំណាចយុវជនកម្ពុជា លោក សៀង រិទ្ធី ឱ្យដឹងថា រោងចក្រ អេសអ៊ីអ៊ីអេស គ្លូប៊ល (SEES GLOBAL CO.,LTD) កំពុងផលិតស្រោមជើង ស្រោមដៃ និងស្រោមមុខ ឱ្យផ្លាកយីហោ TNS ដែលមានកម្មករកំពុងបម្រើការងារទាំងចាស់ និងថ្មី សរុបប្រមាណ៧០០នាក់៕
