មន្ត្រីនគរបាលខេត្តស្វាយរៀង បានឱ្យដឹងថា កូនប្រុសអធិការនគរបាលក្រុងបាវិត ដែលជាប់ពាក់ព័ន្ធនឹងការបាញ់សម្លាប់ស្ត្រីម្ចាស់ហាងមួយរូបនៅក្រុងបាវិត ត្រូវបានសមត្ថកិច្ចសម្រេចបញ្ជូនទៅឃុំខ្លួនក្នុងពន្ធនាគារខេត្តនេះរួចហើយទៅតាមដីកាបង្គាប់របស់តុលាការខេត្តនេះ។
អធិការរងនគរបាលក្រុងបាវិត លោក កែវ ចិត្រា ដែលជាកូនប្រុសរបស់លោក កែវ គង់ អធិការនគរបាលក្រុងបាវិតផងនោះ ត្រូវបានសមត្ថកិច្ចចាប់ខ្លួន បន្ទាប់ពីបានបាញ់សម្លាប់ទៅលើស្ត្រីម្ចាស់ហាងឈ្មោះ សឿន ស្រីណេ កាលពីរាត្រីថ្ងៃទី២០ ខែធ្នូ ហើយស្ត្រីរូបនោះ បានស្លាប់ក្រោយពេលបញ្ជូនទៅព្យាបាលនៅឯមន្ទីរពេទ្យក្នុងប្រទេសវៀតណាម។
ស្នងការនគរបាលខេត្តស្វាយរៀង លោក កឹង ឃន បានប្រាប់វីអូឌីនៅថ្ងៃនេះថា មន្ត្រីនគរបាលដែលបាញ់ប្រហារទៅលើស្ត្រីម្ចាស់ហាងនោះ ត្រូវបានសាលាដំបូងខេត្តស្វាយរៀង សម្រេចចោទប្រកាន់ និងដាក់ឃុំខ្លួនក្នុងពន្ធនាគាររួចរាល់ហើយ។
លោក កឹង ឃន បានរៀបរាប់ថា៖ «បញ្ជូនទៅតុលាការឃុំខ្លួន ដាក់គុកហើយ។ បទចោទ គឺឃាតកម្ម មនុស្សឃាត [តើជាបទចោទ មនុស្សឃាតដោយចេតនា រឺអចេតនា?] អត់មានអចេតនាទេ អាហ្នឹង»។
ដីការបង្គាប់ឱ្យឃុំខ្លួនរបស់សាលាដំបូងខេត្តស្វាយរៀង កាលពីថ្ងៃទី២២ ខែធ្នូ ចៅក្រមស៊ើបសួរ អ្នកស្រី ឈុន ដាវី បានសម្រេចឱ្យជនសង្ស័យ កែវ ចិត្រា ស្ថិតក្រោមការត្រួតពិនិត្យពីបទ «ឃាតកម្ម និងកាន់កាប់អាវុធដោយគ្មានការអនុញ្ញាត»។
ចៅក្រមស៊ើបសួរ អ្នកស្រី ឈុន ដាវី បានបដិសេធមិនធ្វើការបកស្រាយអ្វីទាំងអស់ពាក់ព័ន្ធនឹងសំណុំរឿងឃាតកម្មនេះ ដោយអះអាងថា អ្នកស្រីជាប់រវល់បំពេញការងារ។
មន្ត្រីសម្របសម្រួលអង្គការការពារសិទ្ធមនុស្សលីកាដូប្រចាំខេត្តស្វាយរៀង លោក នុត បូពិណ្ណារ័ត្ន បានចាត់ទុកករណីនេះ ជាការរំលោភសិទ្ធិមនុស្សធ្ងន់ធ្ងរ ជាពិសេសរំលោភសិទ្ធិស្ដ្រី។
លោក នុត ប៊ូពិណ្ណារ័ត្ន និយាយថា៖ «ខ្ញុំយល់ឃើញថា សកម្មភាពនៃបទល្មើសនេះ គឺជាសកម្មភាពបទល្មើសមួយដែលរំលោភលើផ្លូវច្បាប់ ហើយរំលោភលើសិទ្ធិមនុស្សធ្ងន់ធ្ងរ ជាពិសេសទៅលើស្ដ្រី ដោយសារការប្រើប្រាស់អាវុធបាញ់នៅកណ្ដាលក្រុង ហើយមានចេតនាបាញ់លើក្បាលស្ដ្រី។ អ៊ីចឹង យើងមើលទៅវាឃោរឃៅណាស់ រំលោភសិទ្ធិមនុស្សធ្ងន់ធ្ងរណាស់»៕
