មជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថាស៊ីម៉ាក់ និងអង្គការ JICA របស់ជប៉ុន ចុះហត្ថលេខាកិច្ចសហប្រតិបត្តិការបច្ចេកទេស ដើម្បីបោសសម្អាតមីននៅប្រទេសកម្ពុជាឱ្យអស់ក្នុងឆ្នាំ២០២៥ ខាងមុខនេះ។
ថ្លែងក្នុងពិធីចុះហត្ថលេខានាថ្ងៃនេះ តំណាងប្រធានអង្គការ JICA ប្រចាំប្រទេសកម្ពុជា លោក Sugano Yuichi លើកឡើងថា ការចុះហត្ថលេខាអង្គការ JICA ជាមួយស៊ីម៉ាក់ ធ្វើឡើងដើម្បីផ្ដល់ជំនួយបច្ចេកទេស និងកិច្ចសហប្រតិបត្តិការបន្ថែមក្នុងការកសាងសមត្ថភាពរបស់ស៊ីម៉ាក់ ដើម្បីពង្រឹងកិច្ចការបោសសម្អាតមីននៅក្នុងប្រទេសកម្ពុជា។
លោកថា៖ «គម្រោង ឬក៏កិច្ចសហប្រតិបត្តិការនេះ នឹងចូលរួមចំណែក ធ្វើឱ្យស៊ីម៉ាក់អាចសម្រេចគោលដៅនៅឆ្នាំ២០១៨-២០២៥ ដើម្បីសម្រេចបាននូវការបោសសម្អាតមីន នៅទូទាំងប្រទេស ក៏ដូចជា ដើម្បីបង្កើនមុខងារសមត្ថកិច្ចរបស់ស៊ីម៉ាក់ផងដែរ»។
ប្រធានមជ្ឈមណ្ឌលកម្ចាត់មីនកម្ពុជាហៅកាត់ ស៊ីម៉ាក លោក ហេង រតនា មានប្រសាសន៍ថា ការចុះហត្ថលេខានៅថ្ងៃនេះ ដើម្បីបន្តគម្រោងកិច្ចសហប្រតិបត្តិការបច្ចេកទេសរយៈពេល៤ឆ្នាំបន្តទៀត ពោលគឺចាប់ពីឆ្នាំ២០២០ ដល់២០២៤ ។
លោកថា៖ «នៅចំពោះមុខ អត់ទាន់ប្រកាសចំនួនថវិកាជាក់លាក់ទេ គឺជាកិច្ចសហប្រតិបត្តិការបច្ចេកទេស គាត់នឹងផ្ដល់អ្នកបច្ចេកទេស សម្រាប់ជួយសម្របសម្រួលកិច្ចសហប្រតិបត្តិការអន្តរជាតិ អាចជាមួយប្រទេសផ្សេងៗដែលយើងផ្ដល់ការហ្វឹកហ្វឺន និងតម្រូវការជាក់ស្ដែងរបស់យើង ក្នុងការពង្រឹងសមត្ថភាពរបស់យើង។ ឧទាហរណ៍សម្ភារ ឡាន សម្ភារអីផ្សេងៗទៀត យើងនៅមិនទាន់ដឹងនៅឡើយទេ»។
លោក ហេង រតនា បន្តថា អង្គការ JICA ក៏បានផ្តល់ថវិកាជាជំនួយឥតសំណងចំនួន១៧៩៩៨៥០ដុល្លារអាមេរិកឱ្យស៊ីម៉ាក់ សម្រាប់គាំទ្រដល់ការអនុវត្តគំរោងសមាហរណកម្មបោសសំអាតមីន និងសង្គ្រោះជនពិការដោយសារមីន សម្រាប់រយៈពេល៦ខែ ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០២០។
អង្គការ JICA របស់ជប៉ុន បានផ្ដល់ជំនួយលើវិស័យបោសសម្អាតមីនមកកម្ពុជា ចាប់តាំងពីឆ្នាំ១៩៩៨ ដល់ឆ្នាំ២០១៩ មានទឹកប្រាក់ប្រហែលជា ១៥០លានដុល្លារអាមេរិក។
ឯកអគ្គរាជទូត Masahiro Mikami (ម៉ាសាហ៊ីរ៉ូ មីកាមី) មានប្រសាសន៍ក្នុងពិធីចុះហត្ថលេខាថា ស៊ីម៉ាក់ និង អង្គការ JICA បានជួយបោសសម្អាតមីនពីផ្ទៃដីស្រែចម្ការ និងគ្រាប់យុទ្ធភណ្ឌមិនទាន់ផ្ទុះ បានចំនួន ១៦០០គីឡូម៉ែត្រក្រឡានៅទូទាំងប្រទេស៕
