អាជ្ញាធរជាតិអប្សរា ប្រាប់កសិករឱ្យស្នើសុំទៅអាជ្ញាធរមូលដ្ឋានមុនពេលយកទឹកបារាយណ៍ខាងលិចទៅប្រើប្រាស់ ដោយថា ដើម្បីងាយស្រួលគ្រប់គ្រង បែងចែក និងសន្សំសំចៃខ្ពស់ បង្ការកុំឱ្យមានការខ្វះខាតនារដូវប្រាំង។
អ្នកនាំពាក្យអាជ្ញាធរជាតិអប្សរា លោក ឡុង កុសល បានអះអាងថា បច្ចុប្បន្ន កសិករធ្វើស្រែប្រាំងដែលត្រូវប្រើប្រាស់ទឹកបារាយណ៍ខាងលិច នៃខេត្តសៀមរាប ត្រូវស្នើសុំទៅអាជ្ញាធរមូលដ្ឋាន រឺសហគមន៍ប្រើប្រាស់ទឹកជាមុនសិន ទើបអាចទាញយកទឹកបាន។ លោកបញ្ជាក់ថា ការចាត់វិធានការបែបនេះ ដើម្បីងាយស្រួលគ្រប់គ្រង ចែកទឹកជូនកសិករធ្វើស្រែបានគ្រប់គ្រាន់ ហើយសំចៃខ្ពស់ បញ្ចៀសបញ្ហាខ្វះទឹកអំឡុងពេលអាកាសធាតុប្រែប្រួលនារដូវប្រាំងដែលអូសបន្លាយយូរ។
លោក ឡុង កុសល បានរៀបរាប់ថា៖ «បើសិនពួកគាត់ពុំទទួលបានព័ត៌មានហ្នឹងច្បាស់លាស់ទេ វានាំឱ្យមានការខូចខាតដល់ដំណាំស្រូវរបស់គាត់ ទីមួយ។ ទីពីរ កិច្ចការងារក្នុងការផ្គត់ផ្គង់ទឹកហ្នឹង គឺយើងផ្គត់ផ្គង់ទៅដល់រដ្ឋាករទឹកខេត្តសៀមរាបហ្នឹងផង ដែលគាត់យកទឹកទៅផលិតជាទឹកស្អាតសម្រាប់ប្រើប្រាស់ចែកចាយនៅក្នុងក្រុងសៀមរាប។ ទីបី យើងរក្សាទឹកទុកមួយចំណែកដើម្បីរក្សាតុល្យភាពទឹកក្រោមដី»។
បើតាមមន្ត្រីអ្នកនាំពាក្យរបស់អាជ្ញាធរជាតិអប្សរា ការប្រកាសស្នើពលរដ្ឋឱ្យប្រើប្រាស់ទឹកបារាយណ៍ខាងលិចដោយសន្សំសំចៃ មិនមែនធ្វើឡើងរៀងរាល់ឆ្នាំឡើយ ការណែនាំដល់កសិករបែបនេះ ធ្វើឡើងតែចំពោះឆ្នាំណាដែលអាកាសធាតុប្រែក្តៅខ្លាំង ហើយរដូវប្រាំងអាចអូសបន្លាយពេលយូប៉ុណ្ណោះ។ ឯការតម្រូវឱ្យពលរដ្ឋស្នើសុំទៅអាជ្ញាធរមុនប្រើទឹកបារាយរណ៍ខាងលិចធ្វើស្រែប្រាំង គឺសកម្មភាពដែលអាជ្ញាធរអប្សរាបានធ្វើជាទៀងទាត់ប្រមាណជាង១០ឆ្នាំមកហើយ។
កសិកររស់នៅក្នុងស្រុកប្រាសាទបាគង ខេត្តសៀមរាប អ្នកស្រី កង សុឡៃ បានបញ្ជាក់ថា អ្នកស្រីពេញចិត្តនឹងការយកចិត្តទុកដាក់របស់អាជ្ញាធរជួយពលរដ្ឋដោះស្រាយបញ្ហាខ្វះទឹកធ្វើស្រែប្រាំង។ ទោះជាអ្នកស្រីយល់ថាការស្នើសុំប្រើទឹកទៅអាជ្ញាធរមូលដ្ឋានមុនទាញយកទឹកធ្វើស្រែមានភាពស្មុគស្មាញ ហើយបង្កការលំបាកដល់ពលរដ្ឋដែលមានចំណេះទាបយ៉ាងណាក្ដី តែវាជាវិធីបន្ថយជម្លោះនៃការទាញផលមិនស្មើគ្នា និងជួយជំរុញលទ្ធភាពកសិករអាចធ្វើស្រែប្រាំងមួយឆ្នាំបានពីរដង។
អ្នកស្រី កង សុឡៃ បន្ថែមថា៖ «ជូនព័ត៌មានទៅអាជ្ញាធរដែនដី ល្អច្រើន ព្រោះអត់ទឹកក៏គាត់ដឹងពីបញ្ហាយើង គាត់លើកជាសំណើផ្សេងៗទៅថ្នាក់លើជួយដល់កសិករណា៎បង។ ដូចនៅភូមិចឹង គេអាចគ្រប់គ្រងដី២០០ហិកតា រឺ៣០០ហិកតា ចឹងបើមានទឹកប៉ុណ្ណេះមិនគ្រប់ទេ តើយើងគួរពិភាក្សាគ្នារកដំណោះស្រាយ តើយើងគួរជីកប្រឡាយ រឺស្ដុកទឹកនៅកន្លែងណាទៀតចឹងទៅ»។
ស្ថាបនិកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ មានប្រសាសន៍ថា ការរក្សាទឹកទុកប្រើប្រាស់ប្រកបដោយនិរន្តភាពត្រូវផ្អែកលើកត្តាសំខាន់បី ដែលទី១គឺបង្កើនសមត្ថភាពស្ដុកទឹកតាមរយៈការស្ដារអាង និងប្រព័ន្ធប្រឡាយជាដើម បង្កើនការជីកស្រះបន្ថែមកន្លែងទុកទឹកថ្មី ទី២ មានវិធានការគ្រប់គ្រងការប្រើទឹកច្បាស់លាស់ និងទីបី លើកទឹកចិត្តពលរដ្ឋដាំណាំផ្សេងៗផ្គត់ផ្គង់ជីវភាព ជាជាងផ្តោតលើការធ្វើស្រែតែម៉្យាង។
បណ្ឌិត យ៉ង សាំងកុមារ បន្ថែមថា៖ «សំខាន់មួយទៀតហ្នឹង គឺវិមជ្ឈការនៃការគ្រប់គ្រងទឹកតាមរយៈពង្រឹងសមត្ថភាព និងទម្លាក់ធនធានថវិកាឱ្យបានច្រើនទៅថ្នាក់ក្រោមជាតិ ពិសេសថ្នាក់ ថ្នាក់ស្រុកអ៊ីចឹង កុំផ្តល់ទៅថ្នាក់ខាងលើច្រើនពេក ដែលច្រើនតែធ្វើគម្រោងធំៗដែលមានទឹកលុយរាប់លានដុល្លារ។ ឯរឿងតូចៗដែលមានលុយខ្ទង់ម៉ឺន សែនដុល្លា ដែលថ្នាក់ក្រោមអាចធ្វើបាន វាមិនសូវមានទេ។ ជារួម យើងមានសក្តានុពលច្រើន ប៉ុន្តែ សំខាន់លើការងារគ្រប់គ្រង និងការបែងចែកថវិកា»។
តាមព័ត៌មានដែលបង្ហោះលើទំព័រហ្វេសប៊ុករបស់អាជ្ញាធរជាតិអប្សរាកាលពីថ្ងៃទី២៣ ខែធ្នូ ឆ្នាំ២០១៩ ចាប់ពីខែសីហា ដល់ខែតុលា ឆ្នាំ២០១៩នេះ ក្រុមការងារនាយកដ្ឋានគ្រប់គ្រងទឹកបានបញ្ជូនទឹកប្រមូលមកពីភ្នំគូលែន ទំនប់នានាជុំវិញរមណីយដ្ឋានអង្គរ និងរបបទឹកភ្លៀង មករក្សាទុកក្នុងបារាយណ៍ខាងលិចប្រមាណ៥៦លានម៉ែត្រគូប។ ឆ្នាំនេះ អាជ្ញាធរជាតិអប្សរា បានប្រកាសបើកទឹកផ្គត់ផ្គង់ស្រែប្រាំងពីខែវិច្ឆិកា រហូតចុងខែកុម្ភៈ ហើយបច្ចុប្បន្នបានស្រោចស្រពដីស្រែក្នុងស្រុកពួក និងក្រុងសៀមរាបប្រមាណ៧៥០០ហិកតា៕
