ប្រជាពលរដ្ឋមានជម្លោះដីធ្លីជាង១០០នាក់ ដែលអះអាងថា តំណាងឱ្យពលរដ្ឋ២០០គ្រួសារ មកពីស្រុកស្រែអំបិល ខេត្តកោះកុង បានប្រមូលផ្តុំគ្នាមុខក្រសួងរៀបចំដែនដីនៅថ្ងៃនេះ ដើម្បីសុំអន្តរាគមន៍ជួយដោះស្រាយសំណងបន្ថែមលើជម្លោះដីធ្លីរបស់ពួកគាត់ដែលអូសបន្លាយ១៤ឆ្នាំមកហើយ។
អ្នកស្រី អឹម សុខន ដែលអះអាងថា ជាតំណាងពលរដ្ឋប្រាប់វីអូឌីមុខក្រសួងថា ប្រជាពលរដ្ឋ២០០គ្រួសារនៅភូមិចំនួន៤ ក្នុងឃុំជីខលើ មានជម្លោះដីធ្លីជាមួយក្រុមហ៊ុនចម្ការអំពៅកោះកុងស៊ូគ័ររបស់លោក លី យ៉ុងផាត់ តាំងពីឆ្នាំ២០០៦ ប៉ុន្តែ ក្រោយពលរដ្ឋតវ៉ាជាបន្តបន្ទាប់ គឺនៅឆ្នាំ២០១៨ ក្រសួងរៀបចំដែនដីបានដោះស្រាយដោយសម្រេចកាត់ដីទំហំ៣០០ហិកតា ចេញពីដីគម្រោងអភិវឌ្ឍន៍ក្រុមហ៊ុនមកចែកឱ្យពលរដ្ឋវិញ។
តំណាងពលរដ្ឋរូបនេះបន្តថា ខណៈពេលដែលក្រសួងដោះស្រាយដីធ្លីឱ្យពលរដ្ឋ២០០គ្រួសារនោះ គឺអ្នកភូមិមិនបានទទួលយកសំណងខូចខាតពីក្រសួងនោះទេ ដោយអ្នកស្រីអះអាងថា ក្រុមហ៊ុនបញ្ជាទិញស្ករអំពៅពីកម្ពុជាមួយឈ្មោះ«ថេតអិនឡាយ»នៅប្រទេសអង់គ្លេស បានសន្យាចេញសំណងខូចខាតជំនួស ប៉ុន្តែ រហូតពេលនេះ ក្រុមហ៊ុនបញ្ជាទិញស្ករអំពៅមួយនេះមិនផ្តល់សំណងឱ្យពលរដ្ឋឡើយ។
អ្នកស្រី អឹម សុខន៖ «ឯកសារទាំងអស់មានតែតំណាង និងមេធាវីរបស់ខ្ញុំទេដឹងច្បាស់ ប៉ុន្តែ តំណាងរបស់ពួកខ្ញុំពេលដឹងថា អត់បានសំណងចឹង គាត់ហាក់បោះបង់ពួកខ្ញុំចោល ហើយខ្ញុំអស់ជំនឿលើតំណាង បានរកអន្តរាគមន៍ពីក្រសួងជួយអន្តរាគមន៍»។
លោក តេង កៅ ដែលអះអាងថា ជាតំណាងពលរដ្ឋដែរនោះ និយាយថា ក្រុមហ៊ុន«ថេតអិនឡាយ»បោកប្រាស់ប្រជាពលរដ្ឋដោយមិនបានផ្តល់សំណងឱ្យប្រជាពលរដ្ឋតាមការសន្យាឡើយ ដោយធ្វើឱ្យអ្នកភូមិខាតបង់ទ្រព្យសម្បត្តិ និងផលដំណាំទទេៗ។
តំណាងពលរដ្ឋរូបនេះ បានស្នើទៅរដ្ឋមន្ត្រីក្រសួងរៀបចំដែន នគរូបនីយកម្ម និងសំណង លោក ជា សុផារ៉ា ជួយអន្តរាគមន៍ទៅក្រុមហ៊ុន ឱ្យដោះស្រាយសំណងជូនពលរដ្ឋឱ្យបានឆាប់។ លោក តេង កៅ បន្តថា ក្រោមជម្លោះដីធ្លីជាមួយក្រុមផលិតស្ករអំពៅរយៈពេល១៤ឆ្នាំកន្លងមកនេះ បានធ្វើឱ្យអ្នកភូមិមានជីវភាពខ្វះខាត និងក្រីក្រ។
លោកបន្ថែមថា៖ «ប្រជាជនយើងខ្ញុំមានការរងទុក្ខលំបាកវេទនា កូនចៅពួកខ្ញុំត្រូវបាត់បង់ការសិក្សាហើយកូនៗរបស់ពួកយើងត្រូវចំណាកស្រុកទៅប្រទេសថៃ និងមកភ្នំពេញ ដោយគ្រួសាររបស់ពួកយើងជំពាក់បំណុលធនាគារច្រើន»។
អ្នកនាំពាក្យក្រសួងរៀបចំដែន នគរូបនីយកម្ម និងសំណង់ លោក សេង ឡូត សុំមិនឆ្លើយតបទេ ដោយថា លោកកំពុងជាប់រវល់ប្រជុំ។
អភិបាលរងសាលារាជធានីភ្នំពេញ លោក មាន ចាន់យ៉ាដា ដែលចុះទៅជួបពលរដ្ឋកន្លែងតវ៉ាផ្ទាល់ បានប្រាប់ឱ្យអ្នកភូមិត្រឡប់ទៅផ្ទះនៅថ្ងៃនេះវិញ ដោយសន្យាប្រាប់ទៅអាជ្ញាធរខេត្តជាអ្នកដោះស្រាយ ហើយថា ពលរដ្ឋអាចត្រឡប់មកសារជាថ្មីទៀតនៅខែមករា ឆ្នាំ២០២០ ប្រសិនពុំមានដំណោះស្រាយ។
វីអូឌីមិនអាចសុំការឆ្លើយតបពីនាំពាក្យសាលាខេត្តកោះកុង លោក សុខ សុទ្ធី បានទេជុំវិញករណីនេះ ដោយទូរសព្ទចូលច្រើនដងគ្មានអ្នកទទួល។
មន្ត្រីសម្របសម្រួលស្ដីទីនៅសមាគមអាដហុកប្រចាំខេត្តកោះកុង លោក ប៉ី វ៉ាន់នី មានប្រសាសន៍ថា បញ្ហានេះកើតឡើងដោយសារតែការដោះស្រាយរបស់អាជ្ញាធរពេលកន្លងមក មិនមានតម្លាភាព និងច្បាស់លាស់ជូនប្រជាពលរដ្ឋ។
មន្ត្រីការពារសិទ្ធិមនុស្សរូបនេះ ស្នើទៅរដ្ឋាភិបាលឱ្យស្រាវជ្រាវ និងអន្តរាគមន៍ដោះស្រាយឱ្យបានឆាប់ ដើម្បីបញ្ឈប់ការតវ៉ារបស់ប្រជាពលរដ្ឋ។
លោក ប៉ី វ៉ាន់នី៖ «អ៊ីចឹង អាជ្ញាធរត្រូវធ្វើការដោះស្រាយឡើងវិញ ហើយស្រាវជ្រាវឡើងវិញទៅថា ពួកគាត់ហ្នឹងពិតប្រាកដទេដែលថា គាត់អត់ទាន់ទទួលបានសំណងនោះ។ ហើយដោះស្រាយជូនគាត់ទៅ គាត់ទទួលយកបាន គាត់ទទួលយក គាត់ឈប់តវ៉ាហើយ។ និងត្រូវធ្វើការងារដោះស្រាយដោយស្មោះត្រង់ និងតម្លាភាពទៅ»។
ក្នុងញ្ញត្តិមួយចុះថ្ងៃទី៥ ខែមិថុនា ឆ្នាំ២០១៩ ដាក់ទៅសហភាពអ៊ឺរ៉ុប (EU) ប្រចាំកម្ពុជា ប្រជាពលរដ្ឋក៏បានស្នើទៅឯកអគ្គរដ្ឋទូតសហភាពអឺរ៉ុបប្រចាំកម្ពុជា ឱ្យជួយអន្តរាគមន៍ទៅក្រុមហ៊ុន «ថេតអិនឡាយ» នៅប្រទេសអង់គ្លេស ឱ្យដោះស្រាយសំណងខូចខាតជូនពលរដ្ឋតាមការសន្យាផងដែរ។
បើតំណាងពលរដ្ឋ អ្នកស្រី អឹម សុខន គឺពលរដ្ឋ២០០គ្រួសារនោះបានទាមទារថ្លៃសំណងខូចខាតបន្ថែមចំនួន៦ពាន់ដុល្លារក្នុងមួយគ្រួសារ៕
