អតីតមន្ត្រី និងសកម្មជនបក្សប្រឆាំងដែលកំពុងភៀសខ្លួននៅក្រៅប្រទេស អះអាងថា ពួកគេមិនទាន់វិលត្រឡប់មកកម្ពុជាវិញ ដោយបារម្ភខ្លាចសមត្ថកិច្ចចាប់ខ្លួន ហើយថា តុលាការមិនទាន់ទម្លាក់ចោលបទចោទប្រកាន់លើពួកគេនៅឡើយទេ។
អតីតមន្ត្រី និងសកម្មជនជាច្រើនរូបរបស់គណបក្សសង្គ្រោះជាតិ បាននាំគ្នារត់គេចខ្លួនទៅក្រៅប្រទេស បន្ទាប់តុលាការបានចេញដីកាកោះហៅ និងដីកាចាប់ខ្លួន ពាក់ព័ន្ធនឹងការប្រកាសគាំទ្រគម្រោងដំណើរវិលត្រឡប់របស់អតីតមេដឹកនាំបក្សប្រឆាំង លោក សម រង្ស៊ី ចូលមកកម្ពុជាវិញនៅថ្ងៃទី៩ ខែវិច្ឆិកាកន្លងមកនេះ។
អតីតសកម្មជនគណបក្សប្រឆាំងដែលកំពុងភៀសខ្លួននៅប្រទេសថៃ និងធ្លាប់ជាប់ពន្ធនាគារ លោក នាង សុឃុន ប្រាប់វីអូឌីតាមបណ្ដាញសង្គមនៅថ្ងៃនេះថា បច្ចុប្បន្ននេះ មានមន្ត្រី និងសកម្មជន CNRP ជាង ១០០នាក់ កំពុងភៀសខ្លួននៅក្រៅប្រទេស។ លោកបន្តថា ពួកគាត់មិនវិលចូលកម្ពុជាវិញ ដោយបារម្ភខ្លាចសមត្ថកិច្ចចាប់ខ្លួនពួកគាត់ ខណៈដែលតុលាការមិនទាន់ទម្លាក់ចោលបទចោទប្រកាន់លើពួកគាត់ទាំងអស់គ្នានោះ។
លោក នាង សុឃុន ប្រាប់ថា៖ «អ្វីដែលខ្ញុំមិនអាចទៅបាននោះ គឺមានមូលហេតុបែបនេះ ទី១ ក្រសួងការបរទេស គេបានលុបលិខិតឆ្លងដែនរបស់ខ្ញុំ ហើយគេបានចេញដីកាតាមចាប់ខ្លួនយើងខ្ញុំ និងមន្ត្រីមួយចំនួនផ្សេងទៀត ដែលសកម្មនឹងរឿងនយោបាយ។ ដូច្នេះ ការអំពាវនាវរបស់រដ្ឋាភិបាល គឺគ្រាន់តែជាបំភ័ន្តមតិជាតិ និងអន្តរជាតិ ក៏ដូចលួងចិត្តប្រជាពលរដ្ឋមិនឱ្យងើបឡើងតវ៉ាប៉ុណ្ណោះ»។
អ្នកនាំពាក្យក្រសួងការបរទេស លោក កុយ គង់ មានប្រសានស៍ថា ការលុបសុពលភាពលិខិតឆ្លងដែនអតីតសកម្មជនគណបក្សប្រឆាំងកន្លងមក ដោយសារក្រសួងទទួលបានរបាយការណ៍ក្រសួងមហាផ្ទៃ។ លោកបន្តថា ប្រសិនអ្នកទាំងនោះចង់វិញត្រឡប់មកកម្ពុជាវិញ ពួកគេអាចដាក់លិខិតទៅស្ថានទូតកម្ពុជាប្រចាំនៅប្រទេសថៃ ដើម្បីសុំត្រឡប់មកកម្ពុជាវិញ។
លោក កុយ គង់ ប្រាប់ថា៖ «ធ្វើលិខិតបើកផ្លូវស្ថានទូតនៅបាងកក និងអគ្គកុងស៊ុលនៅខេត្តស្រះកែវ ប្រទេសថៃ។ អត់មានធ្វើទុក្ខបុកម្នេញអីទេ វាទៅតាមផ្លូវច្បាប់របស់តុលាការ យើងធ្វើអីក៏ដោយទៅតាមផ្លូវច្បាប់»។
អតីតមេឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កញ្ញា កឹម តុលា បានឱ្យដឹងថា កញ្ញាក៏កំពុងស្នាក់នៅក្នុងប្រទេសថៃផងដែរ ហើយមិនទាន់ត្រឡប់មកកម្ពុជាវិញ ដោយមើលឃើញថា រដ្ឋាភិបាលនៅតែបន្តធ្វើទុក្ខបុកម្នេញលើមន្ត្រី និងសកម្មជនគណបក្សសង្គ្រោះជាតិតាមរូបផ្សេងៗជាដើម។
កញ្ញា កឹម តុលា ប្រាប់ថា៖ «សមត្ថកិច្ច ឬជនមិនស្គាល់មុខណាមួយ ធ្វើបាបដល់ថ្នាក់ដឹកនាំគណបក្សសង្គ្រោះជាតិ មានការវាយ លួចវាយដោយមិនដឹងហេតុផលក៏មាន។ អាហ្នឹងពាក់ព័ន្ធនឹងបញ្ហាប្រឈមដល់អាយុជីវិតដែរ ហើយជាការរំលោភសិទ្ធិសកម្មជនបក្សប្រឆាំង រំលោភសិទ្ធិនៃការរស់នៅក្នុងនាមពួកខ្ញុំជាប្រជាពលរដ្ឋធម្មតា ហើយនៅតែចង់ធ្វើបាបពួកខ្ញុំទៀត»។
កញ្ញា កឹម តុលា បន្តថា ក្រៅពីបារម្ភសុវត្ថិភាព កញ្ញា និងសកម្មជន CNRP ចំនួន ២៦នាក់ទៀត ត្រូវបានក្រសួងការបរទេសលុបចោលសុពលភាពលិខិតឆ្លងដែនផងដែរ។
កាលពីថ្ងៃទី១៤ ខែវិច្ឆិកាកន្លងមកនេះ លោកនាយករដ្ឋមន្ត្រី ហ៊ុន សែន បានប្រាប់ឱ្យដោះលែងអ្នកគាំទ្រអតីតគណបក្សប្រឆាំង ដែលត្រូវបានចាប់ខ្លួននៅក្នុងយុទ្ធនាការវិលត្រឡប់មកវិញរបស់អតីតមេបក្សប្រឆាំង លោក សម រង្ស៊ី និងបានអំពាវនាវទៅសកម្មជន ឬអ្នកគាំទ្របក្សប្រឆាំងដែលចាកចេញទៅក្រៅប្រទេស ឱ្យវិលត្រឡប់ចូលប្រទេសកម្ពុជា។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានអះអាងថា ដីកាស្វែងរកចាប់ខ្លួនអតីតសកម្មជន ឬអ្នកគាំទ្របក្សប្រឆាំងទាំងអស់ ត្រូវបានតុលាការលុបចោលអស់ហើយ ហើយក៏បើកផ្លូវឱ្យពួកគេវិលត្រឡប់ចូលប្រទេសកំណើតវិញផងដែរ។
លោក ជិន ម៉ាលីន ប្រាប់ថា៖ «ចំពោះអ្នកដែលរត់ទៅក្រៅគេចខ្លួនពីដីកាចាប់ខ្លួន យើងមិនដឹងថា អ្នកទាំងនោះ មកវិញហើយ ឬក៏នៅ ហើយមកវិញប៉ុន្មាននាក់ទេ ពីព្រោះនីតិវិធី ព្រះរាជអាជ្ញារបានសុំឱ្យចៅក្រមស៊ើបសួរលុបចោលដីកាចាប់ខ្លួនហ្នឹងរួចហើយ។ អ៊ីចឹង ពួកគេអាចមកវិញបានគ្រប់ពេល។ ប៉ុន្តែ សម្រាប់សកម្មជនដែលគាំទ្រផែនការក្បត់ដែលត្រូវរងការចោទប្រកាន់ ហើយឃុំខ្លួនបណ្ដោះអាសន្នហ្នឹង ត្រូវដាក់ឱ្យនៅក្រៅឃុំ ស្ថិតនៅក្រោមការត្រួតពិនិត្យតាមផ្លូវតុលាការ»។
នាយករងអង្គការលីកាដូទទួលបន្ទុកផ្នែកឃ្លាំសិទ្ធិមនុស្ស លោក អំ សំអាត យល់ថា អតីតសកម្មជនបក្សប្រឆាំង នៅតែមិនព្រមវិលមកកម្ពុជាវិញ ពីព្រោះពួកគេភ័យខ្លាច ដោយសារថ្មីៗនេះ អតីតមន្ត្រី និងសកម្មជនមួយចំនួន ត្រូវបានជនមិនស្គាល់មុខលួចវាយជាបន្តបន្ទាប់ ប៉ុន្តែ សមត្ថកិច្ចមិនដែលចាប់បានជនល្មើសឡើយ។
លោកថា៖ «អ៊ីចឹង ដើម្បីធានាថា មិនមានការរើសអើងផ្នែកនយោបាយ ហើយប្រជាពលរដ្ឋខ្មែរទាំងអស់មានសិទ្ធិស្មើៗ គឺអាជ្ញាធរ និងរដ្ឋាភិបាល ត្រូវចាត់វិធានការ ដើម្បីសន្តិសុខ សុវត្ថិភាព ដោយមិនមានការគំរាមកំហែង និងការធ្វើទុក្ខបុកម្នេញ»។
អតីតសកម្មជន និងអ្នកគាំទ្រគណបក្សសង្គ្រោះជាតិជាង ៨០នាក់ ត្រូវបានចាប់ខ្លួន និងចោទប្រកាន់ពីបទ«រួមគំនិត» នៅក្នុងអ្វីដែលអាជ្ញាធរកម្ពុជាហៅថា «ការប៉ុនប៉ងផ្ដួលរំលំរដ្ឋាភិបាល»។
មេធាវីការពារក្ដីឱ្យសកម្មជនអតីតបក្សប្រឆាំង លោក សំ សុគង់ បានឱ្យដឹងនៅថ្ងៃនេះថា សកម្មជន ឬអ្នកគាំទ្រ CNRP ចំនួន ៧៦នាក់ហើយ ត្រូវបានដោះលែងឱ្យនៅក្រៅឃុំបណ្ដោះអាសន្ន គិតត្រឹមថ្ងៃនេះ ក្នុងនោះមនុស្សចំនួន ១៩៩នាក់ ដែលត្រូវបានដីកាកោះហៅ និងតាមចាប់ខ្លួនពីសំណាក់តុលាការ និងប៉ូលិសប៉ុស្ដិ៍៕