ពាក្យស្លោកដែលរាជរដ្ឋាភិបាលគ្រប់គ្រងដោយគណបក្សកាន់អំណាចដាក់ចេញ និងតែងយកទៅផ្សព្វផ្សាយតាមទីសាធារណៈ ឬចងនៅមុខរោងពិធី ឬវេទិកានានារបស់ថ្នាក់ដឹកនាំប្រទេសថា «មានផ្លូវមានស្ពានគឺមានក្ដីសង្ឃឹម»។
មន្ត្រីរដ្ឋាភិបាលក៏តែងប្រកាសប្រាប់ពលរដ្ឋអំពីគោលនយោបាយរបស់ខ្លួន ដោយយកចិត្តទុកដាក់លើការអភិវឌ្ឍហេដ្ឋារចនាសម្ព័ន្ធ ពិសេសផ្លូវ ស្ពាន ដើម្បីនាំឱ្យពលរដ្ឋកាន់តែងាយស្រួលក្នុងការរស់នៅ ការធ្វើដំណើរទៅរៀនសូត្រ ធ្វើការងារ និងធ្វើពាណិជ្ជកម្ម ជាដើម។
យ៉ាងនេះក្ដី ពលរដ្ឋនៅភូមិតាពេញ ក្នុងឃុំរកាពប្រាំ ស្រុកត្បូងឃ្មុំ បានត្អូញត្អែរពីការលំបាកធ្វើដំណើរឆ្លងកាត់ផ្លូវមួយខ្សែដែលជាតំបន់ភ្ជាប់គ្នាពីស្រុកត្បូងឃ្មុំ ទៅកាន់ស្រុកតំបែរ ដោយសារស្ពានឈើមានប្រវែងប្រមាណ១រយម៉ែត្រ កាន់តែចាស់ទុ្រឌទ្រោមខ្លាំងមិនអាចឆ្លងកាត់បានបន្តទៀត។
ពលរដ្ឋនៅភូមិនេះពិបាកធ្វើដំណើរឆ្លងកាត់តំបន់នោះនៅរដូវវស្សា ដោយត្រូវធ្វើដំណើរដោយទូក ឬក្បូនចម្លង ក្រោយពេលស្ពានតាពេញនេះចាស់ទ្រុឌទ្រោមខ្លាំង សូម្បីតែមនុស្សក៏ពិបាកដើរឆ្លងកាត់ផង។
រីឯនៅរដូវប្រាំងវិញ ពលរដ្ឋបានរៃអង្គាសប្រាក់គ្នាដើម្បីចាក់ដីផ្នែកខាងក្រោមស្ពានធ្វើជាផ្លូវឆ្លងកាត់ ប៉ុន្តែ ត្រូវចុះចំណោទផងដែរ។
ជាពលរដ្ឋនៅភូមិតាពេញមួយរូប លោក រស់ សារ៉ាយ មានប្រសាសន៍ថា តំបន់នេះមានពលរដ្ឋច្រើនត្រូវឆ្លងកាត់ទៅវិញទៅមក ប៉ុន្តែ ពួកគេត្រូវប្រឈមមុខនឹងការលំបាក ពិសេសនៅរដូវវស្សាតែម្ដង។
លោកឱ្យដឹងថា ស្ពានឈើចាស់ដែលពលរដ្ឋ និងអាជ្ញាធរមូលដ្ឋានចូលរួមកសាងកាលពីឆ្នាំ២០០២ ហើយពលរដ្ឋក៏ចេះតែជួសជុលឆ្លងកាត់រហូតមក ប៉ុន្តែ ចាប់តាំងពីឆ្នាំ២០១៦មក ស្ពានឈើតាពេញនោះចាស់ទ្រុឌទ្រោមកាន់តែខ្លាំងមិនអាចឆ្លងកាត់បានតែម្ដង។
លោកមានប្រសាសន៍បន្តថា៖ «បាទ! រដូវវស្សា វាវេទនា គ្រាន់តែដើរ ឬបណ្ដើរម៉ូតូ តែបើជិះម៉ូតូ ឆ្លងឡាន គោយន្តអី គឺអត់បានសោះតែម្ដង។ ខ្លះឆ្លងដោយទូក ខ្លះធ្វើក្បូនទៅអូសអ៊ីចឹងទៅ»។
អនុប្រធានភូមិតាពេញ លោក ភួង សុផល មានប្រសាសន៍ថា ផ្លូវនេះ ពិតជាមានសារៈសំខាន់ប្រាដកមែន ដោយពលរដ្ឋក្នុងភូមិតែងធ្វើដំណើរឆ្លងកាត់ទៅធ្វើចម្ការ ទៅសាលាឃុំ ទៅមណ្ឌលសុខភាព ហើយក្មេងត្រូវទៅសាលារៀន ជាដើម។
បន្ថែមពីនេះ ផ្លូវនេះ ក៏ជាកន្លែងដាក់កសិផលដូចជា កៅស៊ូ ដំឡូងមី ស្វាយចន្ទី អំពៅ ស្វាយកែវរមៀតទៅលក់នៅទីផ្សារ ប៉ុន្តែ ចាប់តាំងពីស្ពានតាពេញទ្រុឌទ្រោមខ្លាំងតាំងពីឆ្នាំ២០១៦មក ពលរដ្ឋត្រូវធ្វើដំណើរវាងផ្លូវចម្ងាយដីរាប់សិបគីឡូម៉ែត្រ និងចំណាយថវិកាច្រើន ពិសេសគឺនៅរដូវវស្សាតែម្ដង។
លោកមានប្រសាសន៍បន្ត៖ «រាល់ថ្ងៃហ្នឹង ប្រជាពលរដ្ឋនៅក្នុងភូមិខ្ញុំពិបាកធ្វើដំណើរណាស់ ផ្លូវដែលឆ្លងកាត់ស្ពានហ្នឹង។ បើនៅខែប្រាំង យើងអាចជិះតាមក្រោម [ស្ពាន] ប្រជាពលរដ្ឋយើងធ្វើផ្លូវដាក់លូដាក់អី ជិះបណ្ដោះអាសន្នបាន បើខែវស្សា យើងពិបាកទាំងស្រុង លោកគ្រូអើយ»។
ស្លាកសញ្ញាដែលបោះបង្គោលនៅខាងមុខស្ពានចាស់នោះឱ្យដឹងថា កាលពីឆ្នាំ២០១៣ អាជ្ញាធរមូលដ្ឋានបានកសាងផ្លូវឆ្លងកាត់ស្ពានតាពេញមួយខ្សែដោយភ្ជាប់ពីម្ខាងនៃស្រុកត្បូងឃ្មុំ និងខ្ខាងនៃស្រុកតំបែរ ដែលចំណាយទឹកប្រាក់ជិត១រយលានរៀល ប៉ុន្តែ គេមិនបានរៀបចំ ឬកសាងស្ពានថ្មីជំនួសស្ពានឈើចាស់ឡើយ។
មេភូមិតាពេញ អ្នកស្រី ហាន់ ស៊ីថេង មានប្រសាសន៍ថា ពលរដ្ឋរស់នៅក្នុងភូមិរបស់អ្នកស្រី បច្ចុប្បន្នមានចំនួនជាង១៥០គ្រួសារ។
អ្នកស្រីបន្តថា កន្លងមក អាជ្ញាធរភូមិ និងឃុំបានស្នើទៅអាជ្ញាធរស្រុកខេត្ត ព្រមទាំងទៅថ្នាក់ដឹកនាំរដ្ឋាភិបាល ដែលមានឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី លោក ជា សុផារ៉ា ត្បិតលោកជាប្រធានក្រុមការងារគណបក្សប្រជាជនកម្ពុជាចុះជួយខេត្តនេះជាច្រើនសារ ប៉ុន្តែ មកទល់ពេលនេះគ្មានលទ្ធផលល្អឡើយ។
អ្នកស្រីបន្តថា៖ «សុំឱ្យថ្នាក់ដឹកនាំខាងលើ លោកជួយអ្នកភូមិខ្ញុំ រឿងស្ពានហ្នឹងផង ព្រោះពលរដ្ឋពួកខ្ញុំនេះលំបាកណាស់សព្វថ្ងៃក្នុងការឆ្លងកាត់។ ខែវស្សាទៅទឹកឡើងលិច ខែប្រាំងគ្រាន់បានជិះខ្លះ អ៊ីចឹងទៅ។ ខែវស្សាទឹកលិច ពិបាករកឆ្លងកាត់រកទៅណាក៏មិនកើតដែរ»។
មេភូមិស្ត្រីរូបនេះ លើកឡើងទៀតថា ប្រសិនបើរដ្ឋាភិបាលកសាងស្ពានថ្មថ្មី ជំនួសស្ពានឈើចាស់បច្ចុប្បន្ន នឹងផ្តល់ប្រយោជន៍ដល់ពលរដ្ឋរាប់ពាន់គ្រួសារ ដោយថា ផ្លូវនេះមានពលរដ្ឋជាច្រើនស្រុកឆ្លងកាត់ដូចជាស្រុកត្បូងឃ្មុំ ស្រុកក្រូចឆ្មា និងស្រុកតំបែរ ជាដើម។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ហេដ្ឋរចនាសម្ព័ន្ធនៅតាមទីជនបទដាច់ស្រយាល រួមមានផ្លូវ ស្ពាន ជាដើម នៅមិនទាន់មានភាពរីកចម្រើន ដើម្បីឆ្លើយតបទៅនឹងតម្រូវការពលរដ្ឋនៅឡើយទេ។
លោកថា ការគិតគូររបស់រដ្ឋកន្លងមក ភាគច្រើននៅទីក្រុង ឬទីប្រជុំជន និងនៅតំបន់ក្បែរៗទីប្រជុំជនប៉ុណ្ណោះ។
លោកមានប្រសាសន៍ថា៖ «ដំណោះស្រាយគឺការរៀបចំឱ្យមានការកំណត់យកតំបន់អាទិភាព ដែលផ្តល់ជូនទៅពលរដ្ឋតាមទីជនបទដាច់ស្រយាល។ គេត្រូវសិក្សាអំពីតម្រូវការនេះ ទាក់ទងវិស័យសេដ្ឋកិច្ច សង្គម និងវប្បធម៌ ជាដើម។ ហើយខ្ញុំសង្ឃឹមថា អាទិភាពទាំងអស់នេះ អាចនឹងមានការប្រែប្រួល ប្រសិនបើឃុំ-សង្កាត់ បានអនុវត្តពេញលេញនូវគោលការណ៍នៃការអភិវឌ្ឍតាមបែបបរិយាប័ន្ន»។
ក្នុងពិធីបើកសម្ពោធស្ពានចំនួន៥ នៅខេត្តបាត់ដំបង កាលពីខែសីហាឆ្នាំនេះ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានលើកឡើងថា គិតត្រឹមចុងឆ្នាំ២០១៨ កន្លងមកនេះ ហេដ្ឋារចនាសម្ព័ន្ធផ្លូវជាតិ និងផ្លូវខេត្ត សរុបប្រវែងជាង ១ម៉ឺន ៦ពាន់គីឡូម៉ែត្រ ត្រូវបានស្ដារ និងស្ថាបនាឱ្យប្រសើរជាងមុន។
ដោយឡែក ស្ពានធំៗ ដែលបានសាងសង់រួចរាល់មានចំនួន ១៧ស្ពាន គិតជាប្រវែងសរុបជាង ១៦ ០៦៧ម៉ែត្រ ប៉ុន្តែ លោកមិនបានបញ្ជាក់ពីស្ពានឆ្លងកាត់តូចៗខ្លីៗ ដែលបានកសាងរួច និងកំពុងកសាងនោះទេ។
ក្នុងពិធីសន្និបាតបូកសរុបការងារសាធារណការ និងដឹកជញ្ជូន ឆ្នាំ២០១៨ និងលើកទិសដៅការងារឆ្នាំ២០១៩កាលពីខែមករា រដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុនីរ័ត្ន បានថ្លែងពេលនោះថា វិស័យហេដ្ឋារចនាសម្ព័ន្ធ និងដឹកជញ្ជូន រួមមាន ផ្លូវ ស្ពាន ផ្លូវដែក ផ្លូវអាកាស ផ្លូវទឹក កំពង់ផែ ជាសរសៃឈាមជំរុញលំហូរពាណិជ្ជកម្ម និងទ្រទ្រង់សេដ្ឋកិច្ចជាតិ។
លើសពីនេះ វិស័យនេះក៏បានរួមចំណែកកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាជន គ្រប់ស្រទាប់វណ្ណៈពីមួយថ្ងៃទៅមួយថ្ងៃផងដែរ ៕
