ឧត្តមក្រុមប្រឹក្សាពិគ្រោះ និងផ្តល់យោបល់ ប្រើប្រាស់ថវិការដ្ឋជាង៨៦ម៉ឺនដុល្លារ នៅឆ្នាំ២០១៩។ នេះបើតាមការបញ្ជាក់របស់អគ្គលេខាធិការអចិន្ត្រៃយ៍នៃអគ្គលេខាធិការដ្ឋាន ឧត្តមក្រុមប្រឹក្សាពិគ្រោះ និងផ្ដល់យោបល់ លោក ឈឹម ផលវរុណ ដែលថ្លែងក្នុងមហាសន្និបាតបូកសរុបការងាររបស់ខ្លួននៅព្រឹកថ្ងៃទី២៧ ខែធ្នូ ឆ្នាំ២០១៩។
ឧត្តមក្រុមប្រឹក្សាពិគ្រោះ និងផ្ដល់យោបល់ ឱ្យដឹងថា ការចំណាយទាំងស្រុងរបស់អង្គភាពនេះ រាប់តាំងពីចំណាយប្រាក់ខែសមាជិក ប្រាក់ខែមន្ត្រីរដ្ឋបាល ប្រាក់បេសកកម្ម ប្រាក់ថ្លៃសាំង និងប្រាក់ជួសជុលរថយន្តជាដើមគឺជាថវិកាជាតិ ។
អគ្គលេធិការអចិន្ត្រៃយ៍ឧត្តមក្រុមប្រឹក្សាពិគ្រោះ និងផ្ដល់យោបល់ លោក ឈឹម ផលវរុណ មានប្រសាសន៍ថា អង្គភាពមួយនេះគ្រោងចាយថវិកាជាតិចំនួនជាង១លាន ៣សែនដុល្លារ (១ ៣១៨ ៩២៥ដុល្លារ) នៅឆ្នាំ២០១៩ ប៉ុន្តែ ចំណាយជាក់ស្ដែង អង្គភាពនេះចាយប្រាក់អស់ត្រឹមតែជាង ៨សែន ៦ម៉ឺនដុល្លារ (៨៦៨,៩២៥) ប៉ុណ្ណោះ។ លោកបន្តថា អង្គភាពនេះគ្រោងស្នើទៅកាន់លោកនាយករដ្ឋមន្ត្រី ហ៊ុន សែន យកថវិកាដែលនៅសល់ជាង ៤សែនដុល្លារ ទៅទិញរថយន្ដជិះដើម្បីបម្រើការងារ។
លោកបន្តថា៖ «ចំពោះថវិកានៅសល់នេះ ឧត្តមក្រុមប្រឹក្សាពិគ្រោះ និងផ្តល់យោបល់ មានបំណងស្នើសុំជាគោលការណ៍គោរពជូន សម្ដេចតេជោនាយករដ្ឋមន្ត្រី ផ្តល់ការអនុញ្ញាតយកថវិកានេះ ទៅទិញរថយន្តសម្រាប់បម្រើការបេសកកម្មតាមមូលដ្ឋាន ព្រោះកន្លងមក ការចុះបេសសកម្មទាំងប្រតិភូគណបក្ស ទាំងមន្ត្រីលេខាធិការដ្ឋាន ប្រើប្រាស់រថយន្តឯកជនផ្ទាល់ខ្លួន ដោយសារតែឧត្តមក្រុមប្រឹក្សាពិគ្រោះ និងផ្តល់យោបល់ ពុំមានរថយន្ត»។
របាយការណ៍របស់ឧត្តមក្រុមប្រឹក្សាពិគ្រោះ និងផ្ដល់យោបល់ បង្ហាញថា ក្នុងរយៈពេលចូលកាន់តំណែង១៦ខែកន្លងមកនេះ សមាជិកអង្គភាពនេះចុះមូលដ្ឋានជាង៤រយលើក និងដាក់របាយការណ៍ចូលអគ្គលេខាធិការដ្ឋានជិត២រយលិខិត។ ប៉ុន្តែ លិខិតដាក់ជូននាយករដ្ឋមន្ត្រីត្រឹម៣២លិខិត។
ប្រធានគណបក្សធម្មាធិបតេយ្យ លោកស្រី ពោធិតី សាវត្ថី ថ្លែងនៅចំពោះមុខអង្គសន្និបាតថា ក្រុមការងាររបស់ខ្លួនបានប្រទះឃើញបញ្ហាប្រឈមជាច្រើននៅពេលបំពេញការងារតាមមូលដ្ឋាន ពិសេសគឺកង្វះកិច្ចសហការពីសំណាក់អាជ្ញាធរមូលដ្ឋាន។ អ្នកស្រីបញ្ជាក់ថា គណបក្សអ្នកស្រីរកឃើញថា មានការឃុបឃិតគ្នាជាប្រព័ន្ធដើម្បីរំលោភបំពានដីធ្លីប្រជាពលរដ្ឋ និងកេងប្រវ័ញ្ចទ្រព្យសម្បត្តិសាធារណៈ ដែលមន្ត្រីខិលខូចទាំងនោះមានតំណែងចាប់ពីមន្ត្រីមូលដ្ឋាន មន្ត្រីតុលាការ និងមន្ត្រីជាន់ខ្ពស់ក្នុងជួររាជរដ្ឋាភិបាល។
លោកស្រី ពោធិតី សាវត្ថី មានប្រសាសន៍ថា៖ ក្រោយពីមានឧត្តមក្រឹមប្រឹក្សាពិគ្រោះ និងផ្ដល់យោបល់ ប្រមូលទិន្នន័យនៃទំនាស់មក ប្រជារាស្ត្រភាគច្រើនត្រឡប់មកមានជំនឿលើរាជរដ្ឋាភិបាលវិញ។
មហាសន្និបាតប្រចាំឆ្នាំរបស់ឧត្តមក្រុមប្រឹក្សាពិគ្រោះ និងផ្ដល់យោបល់ សម្រេចជាគោលការណ៍ឱ្យតំណាងគណបក្សនយោបាយ ឡើងធ្វើបទបង្ហាញពីការបំពេញការងាររបស់ខ្លួន។ តំណាងគណបក្សនយោបាយទាំងនោះ បានរកឃើញថា មានចំណុចអសកម្មមួយចំនួន កំពុងកើតឡើងនៅកម្ពុជា ដូចយ៉ាងបញ្ហារំលោភបំពានដីធ្លីដែលបង្កឡើងដោយអ្នកមានលុយ និងមានអំណាច គ្រឿងញៀន និងអយុត្តិធម៌សង្គម ជាដើម។
កាលពីខែមិថុនាកន្លងទៅ លោកនាយករដ្ឋមន្ត្រី ហ៊ុន សែន ព្រមានថា នឹងឈប់ឱ្យមានអង្គភាពឧត្តមក្រុមប្រឹក្សាពិគ្រោះ និងផ្តល់យោបល់ ដោយលោកចោទថា សមាជិកក្នុងអង្គភាពនេះធ្វើហួសពីតួនាទី ពួកគេមួយចំនួននៃសមាជិកឧត្តមក្រុមប្រឹក្សាពិគ្រោះ និងផ្តល់យោបល់នេះ បានកោះហៅរដ្ឋមន្ត្រីមួយចំនួនមកចោទសួរ និងបានជ្រៀតជ្រែកលើកិច្ចការងាររបស់កងទ័ព និងកងនគរបាលជាតិ។ ប៉ុន្តែ ស្ថានភាពនេះត្រូវធូរស្រាលទៅវិញ ហើយលោកនាយករដ្ឋមន្ត្រីចូលរួមជាគណអធិបតីក្នុងពិធីបិទសន្និបាតប្រចាំឆ្នាំរបស់អង្គភាពនេះទៀតផង។
ឧត្តមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងកាលពីខែកញ្ញា ឆ្នាំ២០១៨ ក្រោមគំនិតផ្តួចផ្ដើមរបស់លោកនាយករដ្ឋមន្ត្រី ហ៊ុន សែន។ ការបង្កើតនេះធ្វើឡើងបន្ទាប់ពីគណបក្សប្រជាជនកម្ពុជាឈ្នះកៅអីសភាតំណាងរាស្ដ្រ១០០% (១២៥អសនៈ) ក្នុងការបោះឆ្នោតជ្រើសតាំងតំណាងរាស្ដរដែលផាត់ចោលវត្តមានគណបក្សសង្គ្រោះជាតិ។
លោក ហ៊ុន សែន បានស្នើឱ្យគណបក្ស១៩ដែលចាញ់ឆ្នោត និងគណបក្សប្រជាជនផង ឱ្យចូលរួមក្នុងអង្គភាពនេះ ដោយសន្យាផ្ដល់ឋានៈចំនួន២ក្នុង១បក្ស គឺតំណែងទេសរដ្ឋមន្ត្រីបានទៅប្រធានបក្ស និងឋានៈរដ្ឋមន្ត្រីបានទៅអនុប្រធានបក្ស។ គណបក្សចំនួន១៦ បានប្រកាសចូលរួមក្នុងអង្គភាពនេះ ហើយឡើយងាររៀងៗខ្លួន។ គណបក្សដែលមិនចូលរួមមាន គណបក្សប្រជាធិបតេយ្យមូលដ្ឋាន គណបក្សខ្មែរឈប់ក្រ គណបក្សខ្មែរសាធារណៈរដ្ឋ និងគណបក្សសម្ព័ន្ធដើម្បីប្រជាធិបតេយ្យ។ គណបក្សចំនួន៤ មិនព្រមចូលរួមនោះ ដោយសំអាងថា យន្តការឧត្តមក្រុមប្រឹក្សាពិគ្រោះយោបល់នេះ ជាយន្ដការបង្គ្រប់កិច្ច និងធ្វើឱ្យល្អមើល៕