សាលាឧទ្ធរណ៍ច្រានចោលបណ្ដឹងអតីតអ្នកសារព័ត៌មានវិទ្យុអាស៊ីសេរីពីររូប ដែលប្ដឹងជំទាស់នឹងសេចក្ដីសម្រេចរបស់សាលាដំបូងរាជធានីភ្នំពេញ ឱ្យបើកការស៊ើបអង្កេតសំណុំរឿងរបស់ពួកគេបន្ថែមទៀត ។
អតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា ត្រូវបានសមត្ថកិច្ចចាប់ខ្លួន និងចោទប្រកាន់ថា បានធ្វើចារកម្មឱ្យរដ្ឋបរទេស ហើយបន្ទាប់មកក៏ត្រូវបានចោទប្រកាន់មួយករណីបន្ថែមទៀតគឺបទផលិត និងកាន់កាប់រូបភាពអាសអាភាស។
កាលពីថ្ងៃទី០៣ ខែតុលា កន្លងមក ចៅក្រមជំនុំជម្រះនៃសាលាដំបូងរាជធានីភ្នំពេញ បានសម្រេចឱ្យបើកការស៊ើបអង្កេតសំណុំរឿងអតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា បន្ថែមពីបទផលិត និងកាន់កាប់រូបភាពអាសអាភាស ដោយថា ការស៊ើបអង្កេតកន្លងមកនៅមានចំណុចខ្វះខាត។
ដោយមិនសុខចិត្តនឹងសេចក្ដីសម្រេចរបស់ចៅក្រមសាលាដំបូងរាជធានីភ្នំពេញ មេធាវីការពារក្ដីឱ្យលោក អ៊ួន ឈិន និងលោក យាង សុធារិន្ទ បានប្ដឹងសាទុក្ខមកសាលាឧទ្ធរណ៍។
នៅថ្ងៃនេះ ចៅក្រមជំនុំជម្រះសាលាឧទ្ធរណ៍ លោក ប្លង់ សំណាង បានប្រកាសបដិសេធបណ្ដឹងរបស់មេធាវីការពារក្ដីឱ្យអតីតអ្នកយកព័ត៌មានវិទ្យុអាស៊ីសេរីទាំងពីររូប ដោយសំអាងថា សំណុំរឿងនេះកំពុងធ្វើការស៊ើបអង្កេត។
ថ្លែងប្រាប់អ្នកសារព័ត៌មាននៅក្រៅរបងតុលាការ អតីតអ្នកសារព័ត៌មានវិទ្យុអាស៊ីសេរី លោក យាង សុធារិន្ទ បង្ហាញការខកចិត្ត ហើយចាត់ទុកសេចក្ដីសម្រេចរបស់តុលាការថា មានចេតនាចង់ធ្វើបាបពួកគាត់ ដោយសារ ពួកគាត់ជាអតីតអ្នកយកព័ត៌មានវិទ្យុអាស៊ីសេរី។
លោកថា៖ «ខ្ញុំលឺចៅក្រមនិយាយថា ខាងតុលាការព្យាយាមរកអីអ៊ីចឹង ដើម្បីផ្ដល់យុត្តិធម៌ឱ្យយើងអ៊ីចឹង ហើយគាត់ថា ពួកយើងនៅក្រៅឃុំ វាអត់មានប៉ះពាល់សេរីភាពទេ ប៉ុន្តែ ធាតុពិតមិនមែនអ៊ីចឹងទេ គ្រាន់តែពួកខ្ញុំនៅក្រៅឃុំ ប៉ុន្តែ [សិទ្ធិរបស់] ពួកខ្ញុំនៅរឹតត្បិតនៅឡើយ ទៅតាមលក្ខខណ្ឌតុលាការ ហើយសូម្បីមកហ្នឹង ក៏ខាតពេលវេលាពួកខ្ញុំ…។ អ៊ីចឹង បើសិនរឿងហ្នឹង នៅតែបន្តអូសបន្លាយតទៅទៀត វាធ្វើឱ្យពួកខ្ញុំខាតប្រយោជន៍ទៅតាមហ្នឹងដែរ មិនមែនមានន័យថា ពួកខ្ញុំនៅក្រៅឃុំមិនមែនសេរីភាពខ្ញុំបានពេញលេញទេ វានៅតែមានបញ្ហាអ៊ីចឹង[សិទ្ធិរបស់ពួកខ្ញុំនៅតែរឹតត្បិត] យើងមិនអាចធ្វើអីបាន! បានត្រឹមខកចិត្ត។»
លោក អ៊ួន ឈិន លើកឡើងថា ការអូសបន្លាយពេលវេលារបស់តុលាការ ធ្វើឱ្យប៉ះពាល់សិទ្ធិសេរីភាពរបស់ពួកគាត់ ក្នុងការដើរហើរ និងប្រកបការងារចិញ្ចឹមជីវិត។
លោកថា៖ «អ្វីដែលយើងប៉ងចង់បានគឺចង់ឱ្យរឿងរ៉ាវហ្នឹងឆាប់ចប់សព្វគ្រប់អ៊ីចឹងទៅ ហើយយើងមានសេរីភាពពេញលេញ អាចធ្វើដំណើរ ដើរហើរ អាចនាំគ្រួសារទៅនេះទៅនោះ ទៅមើលជំងឺនៅប្រទេសជិតខាងអីបាន ដូចគេដូចឯងអ៊ីចឹង ហើយទទួលបានលិខិតឆ្លងដែន អត្តសញ្ញាណបណ្ណមកប្រើប្រាស់។ រាល់ថ្ងៃនេះ យើងចង់បើកគណនេយ្យធនាគារមួយក៏យើងពិបាកដែរ អត់មានអីទៅបើក ហើយយើងត្រូវបញ្ជាក់លិខិតស្នាមអីផ្សេងៗទាក់ទងនឹងកាតគ្រីយានយន្តអីហ្នឹង យើងពិបាកមែន។»
មេធាវីការពារក្ដីឱ្យលោក អ៊ួន ឈិន និងលោក យាង សុធារិន្ទ គឺ សំ ចំរើន ចាត់ទុកសេចក្ដីសម្រេចសាលាឧទ្ធរណ៍ថា មិនបានផ្ដល់យុត្តិធម៌ឱ្យកូនក្ដី។
លោកថា៖ «យើងយល់ថា សេចក្ដីសម្រេចបែបនេះ នៅតែយាយីដល់សិទ្ធិរបស់កូនក្ដី។»
នាយករងអង្គការលីកាដូទទួលបន្ទុកផ្នែកឃ្លាំមើលសិទ្ធិមនុស្ស លោក អំ សំអាត បង្ហាញការសោកស្ដាយចំពោះសេចក្ដីសម្រេចរបស់សាលាឧទ្ធរណ៍ ដោយថា ការអូសបន្លាយពេលនេះ នឹងធ្វើឱ្យប៉ះពាល់សិទ្ធិសេរីភាព និងការងារពួកគាត់ផងដែរ។ លោកបន្តថា ប្រសិនបើតុលាការនៅតែមិនពន្លឿនសំណុំរឿងនេះ លោកថា តុលាការនឹងរងការរិះគន់ពីសហគមន៍អន្តរជាតិ។
លោកថា៖ «ពន្លឿននីតិវិធីក្នុងការជំនុំជម្រះទៅលើរឿងអ្នកទាំងពីរឱ្យបានឆាប់។ យើងសង្ឃឹមថា អ្នកទាំងពីរនឹងរួចផុតពីបទចោទប្រកាន់នេះ ព្រោះការអូសបន្លាយ បើមើលនីតិវិធីស៊ើបអង្កេតរាប់ឆ្នាំដែរ វាល្មមតែបញ្ចប់។ ប៉ុន្តែ នៅពេលសាលាដំបូងសវនាការ គឺចាត់របៀបដើម្បីធ្វើការស៊ើបអង្កេតបន្ថែម អាហ្នឹងនឹងនាំឱ្យមានការរិះគន់បន្ថែមទៀត ពីព្រោះការស៊ើបអង្កេតយូរហើយនៅតែរកភស្ដុតាំងមិនទាន់បាន»។
លោក អ៊ួន ឈិន និងលោក យាង សុធារិន្ទ ត្រូវបានអាជ្ញាធរចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧ ហើយក្រោយមក ត្រូវបញ្ជូនខ្លួនទៅដាក់ឃុំក្រោមការចោទប្រកាន់ថា បានធ្វើចារកម្មឱ្យរដ្ឋបរទេស និងផលិត និងកាន់កាប់រូបភាពអាសអាភាស។
អ្នកទាំងពីរ ត្រូវបានដោះលែងឱ្យស្ថិតនៅក្រៅឃុំបណ្ដោះអាសន្ន និងដាក់ឱ្យស្ថិតក្រោមការត្រួតពិនិត្យតាមផ្លូវតុលាការចាប់តាំងពីខែសីហាឆ្នាំមុន៕