ក្រសួងមហាផ្ទៃបានបញ្ជាដល់អភិបាលរាជធានីភ្នំពេញ ឱ្យផ្អាកចំណាត់ការរដ្ឋបាលជាបណ្ដោះអាសន្នលើដីកំពុងមានទំនាស់ នៅតំបន់អភិវឌ្ឍន៍ឫស្សីកែវ ដើម្បីឱ្យមន្ត្រីចុះស្រាវជ្រាវ បញ្ចៀសផលប៉ះពាល់ដល់ប្រជាពលរដ្ឋ។
ការបញ្ជានេះ ក្រោយក្រសួងមហាផ្ទៃបានទទួលពាក្យបណ្ដឹងរបស់ពលរដ្ឋចំនួន៨គ្រួសារ កាលពីថ្ងៃទី២៨ ខែធ្នូ ដែលបានប្តឹងអភិបាលខណ្ឌឫស្សីកែវ លោក ជា ពិសី និងបក្សពួក ថាបានបំផ្លាញទ្រព្យសម្បត្តិរបស់លោក ព្រំ បូ ជាពលរដ្ឋកំពុងរស់នៅលើដីមានទំនាស់នោះ។
ក្នុងលិខិតចុះថ្ងៃទី៣០ ខែធ្នូ ឆ្នាំ២០១៩ ផ្ញើទៅកាន់អភិបាលរាជធានីភ្នំពេញ រដ្ឋលេខាធិការក្រសួងមហាផ្ទៃលោក ងី ច័ន្ទ្រផល បានស្នើដល់អភិបាលរាជធានីភ្នំពេញ លោក ឃួង ស្រេង ឱ្យផ្អាកចំណាត់ការរដ្ឋបាលជាបណ្ដោះអាសន្ន និងរក្សាភាពដើមនៃទីតាំងទំនាស់ដី ដែលស្ថិតនៅតំបន់អភិវឌ្ឍន៍ឫស្សីកែវ ស្ថិតនៅភូមិស្ពានខ្ពស់ សង្កាត់គីឡូម៉ែត្រលេខ៦ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
បើតាមលិខិតរបស់ក្រសួង ការផ្អាកសកម្មភាពរដ្ឋបាលបណ្ដោះអាសន្ននេះ គឺដើម្បីទុកលទ្ធភាពឱ្យមន្ដ្រីជំនាញចុះស្រាវជ្រាវ បញ្ចៀសផលប៉ះពាល់ដល់ប្រជាពលរដ្ឋ រដ្ឋបាលរាជធានីភ្នំពេញ និងប្រយោជន៍ច្បាប់។
អភិបាលរាជធានីភ្នំពេញ លោក ឃួង ស្រេង សុំមិនធ្វើអធិប្បាយយ៉ាងណាចំពោះចំណាត់ការបន្តនោះទេ ដោយគ្រាន់បញ្ជាក់យ៉ាងខ្លីថា លោកបានទទួលលិខិតស្នើរបស់ក្រសួងមហាផ្ទៃហើយ នឹងបានអនុវត្តតាមការស្នើរបស់ក្រសួងផងដែរ។
លោក ឃួង ស្រេង បានបញ្ជក់ថា៖ «ខ្ញុំសូមអត់ឆ្លើយទេ ព្រោះអីខ្ញុំផ្អាកតាមការណែនាំហើយ!»
កាលពីថ្ងៃទី២៦ ធ្នូកន្លងមកនេះ អភិបាលរងរាជធានីភ្នំពេញ លោក មាន ចាន់យ៉ាដា បានដឹកនាំសមត្ថកិច្ចខណ្ឌឫស្សីកែវ ចុះប្រើវិធានការរដ្ឋបាល រុះរើផ្ទះរបស់ពលរដ្ឋចំនួន៨គ្រួសារ រស់នៅតំបន់អភិវឌ្ឍន៍ឫស្សីកែវ ដើម្បីយកដីចែកឱ្យពលរដ្ឋចំនួន១៧៧គ្រួសារ។
កាលពីថ្ងៃម្សិលមិញនេះ នៅភូមិទួលពពែ សង្កាត់ទួលសង្កែទី២ ខណ្ឌឫស្សីកែវ បានឈានដល់ការចាប់ឃាត់ខ្លួនពលរដ្ឋម្នាក់ទៅសាលាខណ្ឌឫស្សីកែវ ខណៈសមត្ថកិច្ចចុះការពារសកម្មភាពធ្វើរបងហ៊ុមព័ទ្ធដីកំពុងមានទំនាស់ទាំង៨ឡូត៍៕
