រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ក្នុងឱកាសចូលឆ្នាំថ្មី ឆ្នាំសកល២០២០ បានបង្ហាញការប្តេជ្ញាចិត្តថា នឹងពង្រឹងគុណភាពឱ្យបានប្រសើរឡើងបន្ថែមទៀតលើវិស័យហេដ្ឋារចនាសម្ព័ន្ធដឹកជញ្ជូននៅកម្ពុជា។
ការប្តេជ្ញានេះ ធ្វើឡើងក្រោយសេវាសាធារណៈលើវិស័យដឹកជញ្ជូននៅកម្ពុជា រងការរិះគន់ជាបន្តបន្ទាប់ពីសំណាក់ពលរដ្ឋ និងសង្គមស៊ីវិលមួយចំនួន ដូចជា ថាធ្វើផ្លូវគ្មានគុណភាព ឬផ្លូវធ្វើជាប់ជាងគេ ដោយធ្វើមុខខូចក្រោយ ធ្វើក្រោយខូចមុខ។ បន្ថែមពីនេះ មានផ្លូវជាតិ ផ្លូវខេត្ត និងផ្លូវលំជាច្រើន ពិបាកធ្វើដំណើរ ដោយសារមានផ្លូវសំបុកមាន់ច្រើន ហុយខ្លាំងក្នុងរដូវប្រាំង និងភក់ជ្រាំក្នុងរដូវវស្សា ជាដើម។
ទំព័រហ្វេសប៊ុករបស់ក្រសួងសាធារណការ និងដឹកជញ្ជូន កាលពីរសៀលថ្ងៃម្សិលមិញ បានបង្ហោះសារជូនពរពលរដ្ឋនាឱកាសចូលឆ្នាំថ្មី ឆ្នាំសកល២០២០។ លោក ស៊ុន ចាន់ថុល លើកឡើងក្នុងសារនោះថា លោកនឹងបន្តជំរុញការធ្វើកំណែទម្រង់ស៊ីជម្រៅ សំដៅពង្រឹងគុណភាព និងស្ដង់ដារក្នុងការជួសជុល សាងសង់ហេដ្ឋារចនាសម្ព័ន្ធដឹកជញ្ជូន។ ប្រភពដដែលអះអាងថា ការប្តេជ្ញានេះ គឺដើម្បីធានាការផ្តល់សេវាសាធាណៈ លើកកម្ពស់ជីវភាពពលរដ្ឋ និងកាត់បន្ថយការចំណាយក្រៅផ្លូវការ ជាដើម។
ហ្វេសប៊ុករបស់ក្រសួងសាធារណការ និងដឹកជញ្ជូន សរសេរថា៖ «ព្រមទាំងពង្រឹងការផ្តល់សេវាសាធារណៈ ដែលមានលក្ខណៈសាមញ្ញ ចំណេញពេលវេលា និងគ្មានចំណាយក្រៅផ្លូវការ ដើម្បីឆ្លើយតបទៅនឹងតម្រូវការអភិវឌ្ឍសង្គមជាក់ស្ដែង ព្រមទាំងលើកម្ពស់ជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋកម្ពុជាឱ្យកាន់តែមានភាពល្អប្រសើរឡើងមួយកម្រិតទៀត»។
ប្រធានមជ្ឈមណ្ឌលអប់រំប្រជាពលរដ្ឋដើម្បីការអភិវឌ្ឍ និងសន្តិភាព លោក យង់ គីមអេង មានប្រសាសន៍ថាកន្លងមក មន្ត្រីរដ្ឋាភិបាលតែងប្តេជ្ញាចិត្តធ្វើកំណែទម្រង់ស៊ីជម្រៅជាច្រើនសារ ដើម្បីឱ្យពលរដ្ឋសប្បាយចិត្តមួយគ្រាលៗ ប៉ុន្តែ លទ្ធផលនៅតែបរាជ័យ។
លោកមានប្រសាសន៍ថា៖ «ការប្តេជ្ញាចិត្តហ្នឹងដូចៗតែគ្នាទេ នៅក្នុងការធ្វើកំណែទម្រង់ស៊ីជម្រៅ ក្នុងការធ្វើផ្លូវថ្នល់ ដូចក្រសួងសាធារណការអីហ្នឹង ក្នុងការលុបបំបាត់អំពើពុករលួយអីជាដើម។ ប៉ុន្តែ ជាទូទៅ ផ្លូវដែលធ្វើហើយហ្នឹង ធ្វើហើយក៏ខូចខាតទៅ ហើយគុណភាពនៃការត្រួតពិនិត្យឱ្យបានច្បាស់លាស់នៅតែជាបញ្ហានៅឡើយ»។
លោក យង់ គីមអេង យល់ថា ដើម្បីឱ្យការប្តេជ្ញាចិត្តរបស់មន្ត្រីរដ្ឋាភិបាលទទួលបានជោគជ័យ រដ្ឋគប្បីមានផែនការច្បាស់លាស់ និងមានយន្តការតាមដានការងារកំណែទម្រង់នោះជាប្រចាំ។ ការលុបបំបាត់អំពើពុករលួយ បក្ខពួកនិយមក្នុងជួរមន្ត្រីរាជការតាមស្ថាប័នរដ្ឋ ដែលនាំការអនុវត្តច្បាប់មានការរាំងស្ទះ។
សង្គមស៊ីវិលដដែល លើកឡើងថា ការកសាងហេដ្ឋារចនាសម្ព័ន្ធដឹកជញ្ជូនគ្មានគុណភាព និងមិនបានឆ្លើយតបទៅនឹងតម្រូវការពលរដ្ឋជាក់ស្ដែង វាធ្វើឱ្យខាតបង់ថវិកាជាតិ ហើយពលរដ្ឋជាអ្នករងគ្រោះ ម្យ៉ាងក៏ធ្វើឱ្យខូចមុខមាត់កម្ពុជាលើឆាកអន្តរជាតិផងដែរ។
យ៉ាងណា លោក យង់ គីមអេង ថាការប្តេជ្ញាចិត្តកំណែទម្រង់ស៊ីជម្រៅដើម្បីពង្រឹងគុណភាពកសាង និងជួសជុលផ្លូវនេះ ពលរដ្ឋនឹងតាមដានបន្តទៀត ហើយប្រសិនបើការប្តេជ្ញាចិត្តនេះបរាជ័យ កាន់តែធ្វើឱ្យពលរដ្ឋបាត់បង់ជំនឿទុកចិត្តមកលើរដ្ឋាភិបាល។
ក្នុងពិធីសម្ពោធស្ពានចំនួន៥ នៅខេត្តបាត់ដំបង កាលពីខែសីហា ឆ្នាំ២០១៩ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានលើកឡើងថា គិតត្រឹមចុងឆ្នាំ២០១៨ ហេដ្ឋារចនាសម្ព័ន្ធផ្លូវជាតិ និងផ្លូវខេត្ត សរុបប្រវែងជាង ១ម៉ឺន ៦ពាន់គីឡូម៉ែត្រ ត្រូវបានស្ដារ និងស្ថាបនាឱ្យប្រសើរជាងមុន៕
