អាជ្ញាធរខេត្តកែប បានឱ្យដឹងថា ចំនួនអ្នកស្លាប់នៅក្នុងហេតុការណ៍បាក់រលំអគារនៅខេត្តនេះ បានកើនឡើងដល់ ៣៤នាក់ហើយគិតត្រឹមនៅម៉ោង ១១ព្រឹកថ្ងៃនេះ។
អ្នកនាំពាក្យសាលាខេត្តកែប អ្នកស្រី អ៊ុល ភីរុណ បានប្រាប់វីអូឌីថា ក្រុមជួយសង្គ្រោះ បានទាញយកជនរងគ្រោះចំនួន ៥៧នាក់ពីគំនរអគារបាក់បែកនៅត្រឹមម៉ោង ១១ និង១៥នាទីព្រឹកថ្ងៃអាទិត្យនេះ ខណៈប្រតិបត្តិការរុករក និងជួយសង្គ្រោះ នៅតែបន្តធ្វើឡើងថែមទៀត។
បើតាមអ្នកនាំពាក្យរូបនេះ មនុស្ស ៣៤នាក់ហើយ ត្រូវបានរកឃើញថា បានស្លាប់ ក្នុងនោះមានស្ត្រី ១៣នាក់ និងកុមារ ៦នាក់ផងដែរ ខណៈមនុស្ស ២៣នាក់ទៀត រងរបួស ហើយត្រូវបានបញ្ជូនទៅសង្គ្រោះនៅតាមមន្ទីរពេទ្យ។អគារកម្ពស់ ៧ជាន់មួយស្ថិតនៅក្នុងក្រុងកែប បានបាក់រលំកាលពីរសៀលថ្ងៃសុក្រកន្លងមកនេះ ខណៈដែលក្រុមកម្មករកំពុងសាងសង់បន្ថែមនៅផ្នែកខាងលើនៃអគារនោះ៕