លោកនាយករដ្ឋមន្ត្រី ហ៊ុន សែន អះអាងថា លោកនឹងមិនដកហូតតំណែងថ្នាក់ដឹកនាំខេត្តកែបនោះឡើយ ក្រោយពីសំណង់អគារកម្ពស់ ៧ជាន់ បានបាក់រលំនៅក្នុងខេត្តនេះ។
លោកនាយករដ្ឋមន្ត្រីបានអះអាងបែបនេះអំឡុងពេលលោកថ្លែងក្រោយបញ្ចប់ប្រតិបត្តិការរុករក និងជួយសង្គ្រោះមនុស្ស ដែលកប់ជាប់នៅក្នុងសំណង់អគារបាក់រលំកាលពីរសៀលថ្ងៃសុក្រកន្លងមកនេះ។
លោក ហ៊ុន សែន ថ្លែងថា៖ «ប៉ុន្តែ ខ្ញុំអាចបញ្ជាក់ដើម្បីជៀសវាងនូវការសង្ស័យណាមួយ អភិបាលខេត្តកែប និងមន្ត្រី មិនត្រូវបានដកចេញពីតំណែងទេ»។
ជាងនេះទៅទៀត លោក ហ៊ុន សែន បានព្រមានដកតំណែងមន្ត្រីមួយចំនួនដែលលោកថា បានរិះគន់ និងជំរុញឱ្យលោកដកតំណែងអភិបាលខេត្តកែប។
លោក ហ៊ុន សែន ថ្លែងបន្តថា៖ « ខ្ញុំនឹងអាចពិនិត្យទៅលើមន្ត្រីរបស់ខ្ញុំមួយចំនួនដែលកំពុងនៅក្នុងជួររដ្ឋាភិបាល បង្ហោះហ្វេសប៊ុកចេញ ព្រោះតាំងពីរឿងនេសាទស្អី ប្រមូលផ្ដុំមកទៅលើអគារ សំដៅរុញច្រានឱ្យខ្ញុំដកតំណែងអភិបាលខេត្តកែបតែម្ដង»។
សំណង់អគារកម្ពស់ ៧ជាន់ស្ថិតនៅក្រុងកែប បានបាក់រលំកាលពីរសៀលថ្ងៃសុក្រកន្លងមកនេះ ដោយបានសម្លាប់មនុស្សយ៉ាងតិច ៣៦នាក់ ហើយមនុស្ស ២៣នាក់ផ្សេងទៀត បានរងរបួសធ្ងន់ស្រាល៕
