មន្ត្រីតុលាការខេត្តមណ្ឌលគិរី អះអាងថា រយៈពេលជិត ៤ខែមកនេះ មិនទាន់បានដំណឹងពីការតាមចាប់ខ្លួនឧកញ៉ា៣នាក់ ពាក់ព័ន្ធនឹងបទល្មើសព្រៃឈើ មកទទួលខុសត្រូវចំពោះមុខច្បាប់បាននៅឡើយទេ។
អ្នកនាំពាក្យសាលាដំបូងខេត្តមណ្ឌលគិរី លោក មាស ប្រុស ប្រាប់វីអូឌីនៅថ្ងៃនេះថា តុលាការបានបញ្ជូនដីកាឱ្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ និងសមត្ថកិច្ចពាក់ព័ន្ធ តាំងពីដើមខែតុលា ឆ្នាំ២០១៩ ដើម្បីតាមចាប់ខ្លួនឧកញ៉ាទាំង ៣នាក់ ប៉ុន្តែ រហូតមកដល់ពេលនេះ លោកថា មិនទាន់ទទួលបានដំណឹងពីសមត្ថកិច្ចនៅឡើយ។
លោកថា៖ « អត់បានដំណឹងទេ ព្រោះដីកាចាប់ខ្លួនចេញហើយ ចេញរកអត់ឃើញ។ គ្រាន់តែព្រះរាជអាជ្ញាគាត់សួរ [សមត្ថកិច្ចថា] រកអត់ឃើញ អាសយដ្ឋានមាននៅក្នុងដីកាទេ ផ្ទះនៅត្រង់ណាទៅរកហើយ មានន័យថា គេចខ្លួន»។
អ្នកនាំពាក្យសាលាដំបូងខេត្តមណ្ឌលគិរីរូបនេះ ក៏បានបញ្ជាក់ថា ឧកញ៉ាទាំងបីរូបនោះបានរត់គេចខ្លួន ចេញពីប្រទេសកម្ពុជាអស់ហើយ។
អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី អះអាងថា សមត្ថកិច្ចកំពុងធ្វើកិច្ចការនេះ។
នៅពេលអ្នកសារព័ត៌មានសួរថា តើមានភាពស្មុគស្មាញអ្វីដែលសមត្ថកិច្ចរកមិនឃើញកន្លែងលាក់ខ្លួន និងចាប់ឧកញ៉ាទាំង ៣នាក់នោះបាន? លោកសុំមិនធ្វើអត្ថាធិប្បាយ ដោយថា ជាប់រវល់ប្រជុំ។
លោកថា៖ «កាលណាមានដីកាគេអនុវត្ត ហើយអនុវត្តមិនទាន់បានទេ គេនឹងបន្ត»។
ក្នុងដីកាកោះហៅ ៣ដាច់ដោយឡែកពីគ្នា ដែលចេញនៅថ្ងៃទី២៩ ខែកក្កដាដូចគ្នានោះ ព្រះរាជអាជ្ញាសាលាដំបូងខេត្តមណ្ឌលគិរី លោក ហៀង សុភក្ត្រ បានកោះហៅឧកញ៉ា វន់ ប៊ុនថៃ ឧកញ៉ា ស៊្រុន ម៉េងលាង ម្ចាស់ក្រុមហ៊ុន ម៉េងលាង និងឧកញ៉ា តុប វីរដា ម្ចាស់ក្រុមហ៊ុន វិជ្ជរី ឱ្យចូលទៅតុលាការឱ្យបានមុនថ្ងៃទី៣០ ឬ៣១ ខែសីហា ឆ្នាំ២០១៩ ដើម្បីបំភ្លឺពាក់ព័ន្ធនឹងបទល្មើសព្រៃឈើ។ ប៉ុន្តែ ឧកញ៉ាទាំង ៣នាក់នោះ មិនបានចូលបំភ្លឺទៅតាមដីកាកោះហៅឡើយ ហើយព្រះរាជអាជ្ញាថា ពួកគេបានរត់គេចខ្លួនអស់ហើយ។
មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមការពារសិទ្ធិមនុស្សអាដហុក លោក ប៉ែន ប៊ុណ្ណារ៍ ហៅភាពយឺតយ៉ាវនៃចំណាត់ការនាំខ្លួនជនល្មើសមានងារជាឧកញ៉ា មកទទួលខុសត្រូវចំពោះមុខច្បាប់នេះថា បានធ្វើឱ្យសាធារណជនដាក់ការសង្ស័យទៅលើអំពើពុករលួយ។
លោកថា៖ «មកដល់ពេលនេះ ប្រជាពលរដ្ឋវាយតម្លៃថា សមត្ថកិច្ចមិនមានឆន្ទៈក្នុងការតាមចាប់ជនសង្ស័យ ជនល្មើសទាំងអស់ហ្នឹងទេ។ បើយើងនិយាយទៅក៏មានការសហការរវាងសមត្ថកិច្ចនៅទូទាំងប្រទេស ហើយនៅពេលប្រទេសនៅជិតខាងយើង ក៏ធ្លាប់ចាប់បញ្ជូនជនល្មើសអីមក ក៏ប៉ុន្តែ ក្នុងករណីនេះ ស្ងាត់ឈឹង។ អ៊ីចឹង យើងអត់ដែលលឺថា មានការសុំសហការក្នុងការតាមចាប់ខ្លួនជនល្មើសទាំងអស់ហ្នឹង នៅពេលដែលគេចខ្លួនទៅក្រៅប្រទេស អត់មាន»។
លោក ប៉ែន ប៊ុណ្ណារ៍ បន្តថា ប្រសិនបើគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ និងសមត្ថកិច្ចពាក់ព័ន្ធ មិនអាចទប់ស្កាត់ និងចាប់ខ្លួនអ្នកប្រព្រឹត្តបទល្មើសព្រៃឈើបាន លោកថា ប្រជាពលរដ្ឋនឹងបាត់បង់ជំនឿលើប្រមុខរដ្ឋាភិបាលដែលជាអ្នកបង្កើត និងបញ្ជាគណៈកម្មាធិការនេះ។
កាលពីខែមករា ឆ្នាំ២០១៦ លោកនាយករដ្ឋមន្ត្រី ហ៊ុន សែន បានបង្កើតក្រុមការងារពិសេសមួយដែលដឹកនាំដោយនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស អមដោយកងទ័ពឆ័ត្រយោង៩១១ និងអភិបាលខេត្តមួយចំនួន ដោយអះអាងថា ដើម្បីបង្រ្កាបបទល្មើសព្រៃឈើនៅកម្ពុជា។
ក្រៅពីបង្កើតគណៈកម្មាធិការនេះ លោកនាយករដ្ឋមន្ត្រីក៏បានព្រមានដល់មន្ត្រីពាក់ព័ន្ធឱ្យបង្រ្កាបការដឹកឈើទៅប្រទេសវៀតណាម ដោយលោក ហ៊ុន សែន បានលើកចំឈ្មោះឧកញ៉ាពីររូបគឺលោក លឹម ប៊ុនណា ហៅខ្នា និងឧកញ៉ា ស៊ឹង សំអុល។
ចាប់តាំងពីការបង្កើតរហូតដល់បច្ចុប្បន្ននេះ គណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសព្រៃឈើ និងធនធានធម្មជាតិ បានចុះបង្ក្រាបដោយចាប់បានឧកញ៉ា ២នាក់ ក្នុងនោះមាន ឧកញ៉ា គង់ ក្រឹង និងឧកញ៉ា ស៊ឹង សំអុល៕
