អតីតសកម្មជនរបស់គណបក្សសង្គ្រោះជាតិខេត្តព្រះសីហនុ បានថ្លែងប្រាប់ចៅក្រមសាលាឧទ្ធរណ៍នៅថ្ងៃនេះថា ជំងឺគាបសរសៃរបស់លោក បានធ្វើទុក្ខកាន់តែខ្លាំង ពិបាកដេក ដើរ ឬធ្វើសកម្មភាពផ្សេងៗ។
សាលាឧទ្ធរណ៍ នៅថ្ងៃនេះ បានបើកសវនាការតាមបណ្ដឹងជំទាស់របស់មេធាវីការពារក្ដីឱ្យអតីតសកម្មជនបក្ស ប្រឆាំងម្នាក់នៅខេត្តព្រះសីហនុ លោក ម៉ៃ ហុងស្រៀង។
ការប្ដឹងជំទាស់នេះ ធ្វើឡើងបន្ទាប់ពីសាលាដំបូងរាជធានីភ្នំពេញ កាលពីថ្ងៃទី១០ ខែតុលា ឆ្នាំ២០១៩ បានសម្រេចផ្ដន្ទាទោសលោក ម៉ៃ ហុងស្រៀង ឱ្យជាប់ពន្ធនាគារ១ឆ្នាំកន្លះ ពីបទញុះញង់ឱ្យមានការរើសអើង និងញុះញង់ឱ្យប្រព្រឹត្តបទឧក្រិដ្ឋជាអាទិ៍ ពាក់ព័ន្ធការផ្សព្វផ្សាយសារលើបណ្ដាញសង្គមហ្វេសប៊ុក។
ក្នុងបន្ទប់សវនាការសួរដេញដោល នាព្រឹកមិញ លោក ម៉ៃ ហុងស្រៀង ប្រាប់ទៅចៅក្រមជំនុំជម្រះសាលាឧទ្ធរណ៍ថា មូលហេតុដែលលោកស្នើសុំចៅក្រមឱ្យទម្លាក់បទចោទប្រកាន់ និងដោះលែងគាត់ឱ្យមានសេរីភាព ដោយថា រាល់ថ្ងៃនេះ លោកសម្រាកមិនបាន ដោយសារ ជំងឺគាបសរសៃធ្វើទុក្ខពីជើងដល់ខ្នង។
លោក ម៉ៃ ហុងស្រៀង៖ «ស្នើទៅចៅក្រមឱ្យដោះលែងខ្ញុំ ដើម្បីបានជួបជុំគ្រួសារ និងបានទៅព្យាបាលជើងខ្ញុំផង ព្រោះជើងខ្ញុំមានជំងឺគាបសរសៃ ចេញពីឆ្អឹងខ្នងទៅ សម្រាកមិនបាន»។
ក្រៅពីប្រាប់មូលហេតុនេះ លោក ម៉ៃ ហុងស្រៀង លើកឡើងថា លោកមិនបានដឹងថា ការយកព័ត៌មានពីអ្នកផ្សេងៗមកផុស និងចែករំលែកតាមហ្វេសប៊ុក នឹងត្រូវមានទោសឡើយ។
បន្ទាប់សវនាការជិត១ម៉ោង ប្រធានក្រុមប្រឹក្សាជំនុំជម្រះសាលាឧទ្ធរណ៍ បានសម្រេចលើកពេលប្រកាសសាលដីកា នៅថ្ងៃទី២១ ខែមករា ឆ្នាំ២០២០ ខាងមុខនេះ។
មេធាវីការពារក្ដីឱ្យលោក ម៉ៃ ហុងស្រៀង គឺលោក កែត ឃី មានប្រសាសន៍ថា កូនក្ដីលោកមានជំងឺឆ្អឹងគាបសរសៃពីជើងដល់ខ្នង តាំងពីមុនជាប់ពន្ធនាគារមកម៉្លេះ។ លោកបង្ហាញក្ដីសង្ឃឹមថា នៅថ្ងៃទី២១ ខែមករា ខាងមុខនេះ តុលាការនឹងដោះលែងកូនក្ដីលោកឱ្យមានសេរីភាព ដើម្បីជួបជុំគ្រួសារ និងបានទៅព្យាបាលជំងឺ។
អ្នកនាំពាក្យសមាគមអាដហុក លោក សឹង សែនករុណា មើលឃើញថា ការចាប់ខ្លួន និងចោទអតីតអ្នកគាំទ្រគណបក្សសង្គ្រោះជាតិកន្លងមក លោកថា ជារឿងនយោបាយ។ ករណីនេះ លោកថា តុលាការគួរតែដោះលែងអតីតសកម្មជនគណបក្សសង្គ្រោះជាតិទាំងអស់ឱ្យមានសេរីភាព។
លោកថា៖ «រយៈពេលចុងក្រោយនេះ យើងឃើញមានកិច្ចអន្តរាគមន៍ពីប្រមុខរដ្ឋាភិបាលឱ្យមានដោះលែងអ្នកដែលឃុំ បញ្ហាចោទប្រកាន់ពាក់ព័ន្ធនឹងរឿងនយោបាយ។ កន្លងមក មានការដោះលែងជាបន្តបន្ទាប់ ដូច្នេះ ដែលគាត់មិនទាន់បានដោះលែងនេះ ខ្ញុំយល់ថា តុលាការគួរមានការពិចារណា ដើម្បីធ្វើការដោះលែងពួកគាត់ជួបជុំគ្រួសារវិញ»។
កាលពីថ្ងៃទី១៤ ខែវិច្ឆិកា លោកនាយករដ្ឋមន្ត្រី ហ៊ុន សែន បានបញ្ជាឱ្យដោះលែងអ្នកគាំទ្រអតីតគណបក្សប្រឆាំង ដែលត្រូវបានចាប់ខ្លួនជាបន្តបន្ទាប់។ ក្រោយពីមានការបញ្ជានោះ តុលាការបានសម្រេចដោះលែងអតីតមន្ត្រី និងសកម្មជនគណបក្សសង្គ្រោះជាតិដែលត្រូវចាប់ខ្លួន ប៉ុន្តែ នៅមួយចំនួនទៀត មិនទាន់បានដោះលែងនៅឡើយ ដោយតុលាការថា សំណុំរឿងទាំងនោះកំពុងស្ថិតនៅក្នុងនីតិវិធីជំនុំជម្រះ។
អតីតសកម្មជនបក្សប្រឆាំងខេត្តព្រះសីហនុ លោក ម៉ៃ ហុងស្រៀង ត្រូវបានសមត្ថកិច្ចចាប់ខ្លួននៅម្ដុំផ្លូវ២០០៤ ខណ្ឌពោធិ៍សែនជ័យ រាជធានីភ្នំពេញ កាលពីចុងខែកក្កដា ឆ្នាំ២០១៩ ក្រោយលោកភៀសខ្លួនចេញពីការឡោមព័ន្ធរបស់សមត្ថកិច្ចខេត្តព្រះសីហនុ។
ការចាប់ខ្លួនលោក ម៉ៃ ហុងស្រៀង ធ្វើឡើងបន្ទាប់ពីលោកសរសេរ និងចែករំលែកព័ត៌មានរិះគន់រដ្ឋាភិបាលលើបណ្ដាញសង្គមហ្វេសប៊ុក។ ប៉ុន្តែ លោក ម៉ៃ ហុងស្រៀង បញ្ជាក់ប្រាប់តុលាការនៅថ្ងៃនេះ លោកមិនបានដឹងថា ការចែករំលែកព័ត៌មានទាំងនេះខុសច្បាប់ទេ។