សកម្មជនដីធ្លីលេចធ្លោមួយរូបនៅតំបន់បឹងកក់ អះអាងថា មន្ត្រីរដ្ឋាភិបាលប្រើរូបភាពគំរាមកំហែងរូបគាត់ និងក្រុមគ្រួសារ តាំងពីនៅក្នុងស្រុករហូតដល់ក្រៅប្រទេស ដោយថា អាចមានបញ្ហាផ្សេងៗបើមិនព្រមចុះចូលជាមួយបក្សកាន់អំណាច។
សកម្មជនដីធ្លីនៅតំបន់បឹងកក់ លោកស្រី ទេព វន្នី មានបានថ្លែងនៅមុខរដ្ឋសភាសហរដ្ឋអាមេរិកកាលពីថ្ងៃទី១១ ខែមករានេះថា ក្រោយពីរូបគាត់ចេញពីពន្ធនាគារ មន្ត្រីរដ្ឋាភិបាលតែងតែតាមឃ្លាំមើល និងលួងលោមឱ្យចុះចូលជាមួយគណបក្សប្រជាជនកម្ពុជា។ ប៉ុន្តែ លោកស្រីថា គាត់មិនព្រម ទើបមានការគំរាមកំហែងរូបគាត់ និងក្រុមគ្រួសារគ្រប់រូបភាព ធ្វើឱ្យរូបគាត់បារម្ភពីសុវត្ថិភាពផងដែរ។
លោកស្រីមានប្រសាសន៍ថា៖ «គេគំរាមថា បើសិនជាខ្ញុំមិនចុះចូលទេ គេមិនឱ្យគ្រួសារខ្ញុំហើយនិងខ្ញុំបានសុខទេ ជាក់ស្តែងមែន នៅពេលខ្ញុំមកដល់សហរដ្ឋអាមេរិក គេបានគំរាមគ្រួសារខ្ញុំ ដូចជា ម្ដាយ ហើយកូនរបស់ខ្ញុំ ធ្វើឱ្យខ្ញុំបានការព្រួយបារម្ភខ្លាំង សូម្បីតែគាត់មកដល់ថៃហើយ នៅតែមានការតាមចាប់ តាមជិះម៉ូតូបុកម្ដាយខ្ញុំ ចាប់កូនខ្ញុំដាក់ឡានយកទៅគំរាមប្រហែលជាមួយម៉ោង ឬពីរម៉ោង គឺជាការគំរាមកំហែងបំផិតបំភៃយ៉ាងខ្លាំង វាមានហានិភ័យខ្ពស់សម្រាប់ខ្លួនខ្ញុំ និងក្រុមគ្រួសារខ្ញុំ »។
អ្នកនាំពាក្យគណបក្សប្រជាជន លោក សុខ ឥសាន មានប្រសាសន៍ថា លោកមិនចាប់អារម្មណ៍នឹងការលើកឡើងរបស់លោកស្រី ទេព វន្នី ដែលថា រដ្ឋាភិបាលគំរាមកំហែង និងលួងលោមបញ្ចុះបញ្ចូលឱ្យចុះចូលជាមួយរដ្ឋាភិបាលនោះទេ។ លោកចាត់ទុកការលើកឡើងរបស់លោកស្រី ទេព វន្នី គ្រាន់តែចង់បានប្រជាប្រិយភាពរបស់ខ្លួនតែប៉ុណ្ណោះ។
លោកមានប្រសាសន៍ថា៖ «យើងមិនត្រូវការជនណាដែលជាមេរោគនៅក្នុងសង្គមកម្ពុជាទេ ចឹងការនិយាយរបស់គាត់ វាគ្រាន់តែជាការលើកអាទិភាពរបស់ខ្លួនតែប៉ុណ្ណោះ មានគុណសម្បត្តិអ្វី មានតែគុណសម្បត្តិប្រឆាំង អ៊ីចឹងបានប្រឆាំងតាំងពីនៅក្នុងស្រុក រហូតដល់រត់ចោលស្រុក នៅតែប្រឆាំងដដែល គ្មានអ្នកណាចាប់អារម្មណ៍គាត់»។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស មានប្រសាសន៍ថា ប៉ុន្មានឆ្នាំចុងក្រោយនេះ រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន បានដើរប្រាស់ចាកគន្លងប្រជាធិបតេយ្យ ដោយសារមានការគំរាមកំហែងផ្នែកនយោបាយ សេរីភាពបញ្ចេញមតិមានការរឹតត្បិត ផ្ទុយពីច្បាប់ជាតិ និងអន្តរជាតិ ជាដើម។
ករណីនេះ លោក សាវង្ស មានប្រសាសន៍ថា បើរដ្ឋាភិបាលនៅតែដើរប្រាស់ចាកពីគន្លងប្រជាធិបតេយ្យទៀត នឹងធ្វើឱ្យប៉ះពាល់ដល់មុខមាត់រដ្ឋាភិបាលលើចាកអន្តរជាតិ។
លោកមានប្រសាសន៍ថា៖ «កន្លងមក បញ្ហាសង្គមរបស់យើងនៅតែកើតមានឡើងជាច្រើននៅប៉ុន្មានឆ្នាំចុងក្រោយនេះ ដែលគ្រប់គណបក្សនយោបាយ ទាំងមតិជាតិ មតិអន្តរជាតិ តែងតែទាមទារឱ្យរដ្ឋាភិបាលស្តារលទ្ធិប្រជាធិបតេយ្យឡើងវិញ រហូតមានការលើកឡើង ការផ្តាច់អនុគ្រោះពន្ធ ដូចជា EBA ដែលមានការដាក់ទណ្ឌកម្មទៅលើមន្ត្រីរដ្ឋាភិបាលមួយចំនួន»។
ក្នុងព្រះរាជក្រឹត្យចុះថ្ងៃទី២០ ខែសីហា ឆ្នាំ២០១៨ ព្រះមហាក្សត្របានប្រទានការលើកលែងទោសដល់លោស្រី ទេព វន្នី និងស្ត្រីអ្នកបឹងកក់៣នាក់ទៀតផ្សេងទៀតទៅតាមការស្នើរបស់លោក ហ៊ុន សែន រួមមាន លោកស្រី ហេង មុំ លោកស្រី បូ ឆវី និងលោកស្រី គង់ ចន្ថា ដែលអ្នកទាំង៤ ត្រូវបានតុលាការផ្តន្ទាទោស ពីបទ ប្រមាថអ្នករាជការសាធារណៈ និងប្រឆាំងអ្នករាជការសាធារណៈ ដែលមានស្ថានទម្ងន់ទោស។
ចំពោះលោកស្រី ទេព វន្នី ព្រះរាជក្រឹត្យប្រទានការលើកលែងលែងទោស ពាក់ព័ន្ធនឹងរឿងបង្កហិង្សាដោយចេតនាមានស្ថានទម្ងន់ទោស ដែលព្រះរាជអាជ្ញាបានចោទថា បានប្រព្រឹត្តទៅលើកងសន្តិសុខនៅក្បែរផ្ទះលោក ហ៊ុន សែន កាលពីថ្ងៃទី១៣ ខែមីនា ឆ្នាំ២០១៣។
ព្រះរាជក្រឹត្យលើកលែងទោសសកម្មជនដីធ្លីតំបន់បឹងកក់នេះ គឺនៅក្រោយពេលមន្ត្រីជាន់ខ្ពស់នៃអង្គការសហប្រជាជាតិអំពាវនាវឱ្យលោកនាយករដ្ឋមន្ត្រី ហ៊ុន សែន ដោះលែងលោកស្រី ទេព វន្នី អ្នកនយោបាយ និងអ្នកសារព័ត៌មានឯករាជ្យជាបន្ទាន់ដោយគ្មានលក្ខខណ្ឌ។ ក្រោយពីលើកលែងទោស លោកស្រី ទេព វន្នី បាននិរទេសខ្លួនទៅក្រៅប្រទេសទៀតផង។
លោកស្រី ទេព វន្នី ជាសកម្មជនដីធ្លីដែលសកម្មក្នុងតវ៉ាទាមទារឱ្យមានដំណោះស្រាយដីធ្លីនៅតំបន់បឹងកក់។ នៅឆ្នាំ២០១៣ លោកស្រីបានទទួលពានរង្វាន់ភាពជាអ្នកដឹកនាំពិភពលោកពីអតីតរដ្ឋមន្ត្រីក្រសួងការបរទេសសហរដ្ឋអាមេរិក លោកស្រី ហ៊ីលឡារី គ្លីនតុន ផងដែរ៕
