រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងថា សំណង់អគារកម្ពស់៧ជាន់ដែលបាក់រលំសង្កត់មនុស្សស្លាប់នៅក្រុងកែបថ្មីៗនេះ ម្ចាស់សំណង់ជាអ្នកដកចំនួនដែកពាក់កណ្ដាលដែលមន្ត្រីជំនាញកំណត់ ហើយសាងសង់លើស២ជាន់។
ក្នុងពិធីផ្សព្វផ្សាយច្បាប់ស្ដីពីសំណង់សម្រាប់អ្នកវិជ្ជាជីវៈក្នុងវិស័យសំណង់ នាថ្ងៃនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ថ្លែងថា សំណង់អគារកម្ពស់៧ជាន់ដែលបានបាក់រលំកាលពីពេលថ្មីៗនេះ ដោយសារ ម្ចាស់សំណង់សង់លើសច្បាប់អនុញ្ញាត និងកាត់បន្ថយចំនួនដែកដែលអ្នកជំនាញកំណត់។
លោកថា៖ «សំណង់របស់ ឯក សារុន មនុស្សហ្នឹងមកពីបារាំង មិនមែនដំឡូងមូលទេ វិស្វករសិក្សាគម្រោងប្លង់គូរឱ្យគាត់១៦សរសៃ ដែកគ្រឿងផ្គុំសំណង់ គាត់យកទៅដកចេញ ៨ចេញ ទុកតែ៨ទេ ជាប់មកពីត្រង់ណា។ ខេត្តសម្រេចឱ្យ៥ជាន់ គាត់បន្ថែមបាន២ទៀត។ ជាធម្មតាភាពរឹងមាំនៃសំណង់ យើងសង់សំណង់ច្រើនហើយ។ បេតុងយ៉ាងហោច ២០ថ្ងៃ ទៅ២៨ថ្ងៃ ទើបអាចដោះជន្ទល់បាន នេះអត់ទេ ប្រញាប់ជប់លៀងតែ១០ថ្ងៃដោះចេញ»។
ប៉ុន្តែ ក្នុងសន្និសីទសារព័ត៌មាននៅជិតអគារដែលបាក់រលំនៅក្រុងកែប កាលពីថ្ងៃទី៥ ខែមករា លោកនាយករដ្ឋមន្ត្រី ហ៊ុន សែន ថ្លែងថា ការបាក់រលំអគារនេះជាកំហុសរបស់មេការសំណង់សង់អគារមិនត្រឹមត្រូវតាមបច្ចេកទេស។
លោក ហ៊ុន សែន ថា៖ «គេត្រូវការប្លង់សេ គេត្រូវការ២៧ – ២៨ថ្ងៃ ទើបអាចដកក្ដារពុម្ពបាន ក៏ប៉ុន្តែ តាមដែលយើងទទួលព័ត៌មាន មិនដល់១០ថ្ងៃទេ គាត់ដកក្តារពុម្ពចេញតែម្ដង ដើម្បីឈានទៅចាក់អាលើទៀត។អ៊ីចឹង មេការរូបនេះ គាត់បានទទួលមរណភាពទាំងខ្លួនមេការនេះ ទាំងកូនមេការនេះ អ៊ីចឹងមិនអាចទៅចាប់គាត់ឱ្យមកសងអ្នកណាទេ ក្រៅពីយើងផ្ដល់ថវិកាទៅក្រុមគ្រួសារ ព្រោះនេះជាសោកនាដកម្មកើតឡើង ជាកំហុសរបស់មេការ»។
ក្រោយមានហេតុការណ៍បាក់សំណង់អគារបណ្ដាលឱ្យមនុស្សស្លាប់ជាបន្តបន្ទាប់នៅខេត្តមួយចំនួន នៅថ្ងៃទី៩ ខែមករា ឆ្នាំ២០២០ ក្រសួងរៀបចំដែនដី នគរូបនីយកម្ម និងសំណង់ ចាត់តាំងមន្ត្រីក្រោមឱវាទចំនួន ១៦៣នាក់ ឱ្យត្រួតពិនិត្យសំណង់នៅតាមបណ្ដារាជធានី-ខេត្ត។
ប្រធានសម្ព័ន្ធសហជីពកម្មករសំណង់ និងព្រៃឈើកម្ពុជា លោក សុខ គីន ជំរុញទៅរដ្ឋាភិបាល និងស្ថាប័នតុលាការធ្វើការស៊ើបអង្កេតករណីនេះឱ្យបានច្បាស់លាស់ មុននឹងធ្វើសេចក្ដីសន្និដ្ឋាន។
លោកថា៖ «ចង់ឱ្យរដ្ឋាភិបាលធ្វើការស៊ើបអង្កេតរកព័ត៌មានហ្នឹង ឱ្យច្បាស់ ប្រសិនបើបុគ្គលហ្នឹង ឬស្ថាប័នណាប្រព្រឹត្តអំពើកំហុសដែលផ្ទុយពីច្បាប់ គួរតែអនុវត្តទៅតាមច្បាប់ ព្រោះយើងរាល់ថ្ងៃគ្រាន់តែជាការសន្និដ្ឋាននេះខុស អ្នកនោះខុស ប៉ុន្តែ យើងអត់របាយការណ៍ណាពិតប្រាកដជាក់លាក់អ្នកណាជាអ្នកទទួលកំហុសហ្នឹង»។
លោកបន្តថា ប្រសិនបើរដ្ឋាភិបាល និងតុលាការមិនមានវិធានការទៅលើបុគ្គលដែលសង់សំណង់រំលោភច្បាប់ទេ លោកថា ការសាងសង់រំលោភច្បាប់ នឹងកើតឡើងជាថ្មីទៀត ហើយអ្នកដែលរងគ្រោះគឺជាកម្មករសំណង់។
អ្នកជំនាញផ្នែកច្បាប់ លោកមេធាវី សុក សំអឿន មានប្រសាសន៍ថា ប្រសិនបើសំណង់សង់រំលោភច្បាប់នោះ លោកថា អ្នកដែលទទួលខុសត្រូវ គឺម្ចាស់អគារ និងវិស្វរក។
លោកថា៖ «ពីព្រោះធម្មតាក្រុមសំណង់ក្ដី វិស្វករក្ដី ត្រូវមើលលិខិតអនុញ្ញាត ប៉ុន្តែ គ្រាន់តែម្ចាស់ដីខុសធ្ងន់ជាងគេ ព្រោះយើងជាម្ចាស់ដី តែមិនមែនជារឿងព្រហ្មទណ្ឌទេ»។
លោកបន្តថា ដើម្បីដឹងច្បាស់ថា តើការបាក់រលំអគារបណ្ដាលមកពីអ្វីនោះ លោកថា ស្ថាប័នពាក់ព័ន្ធគួរតែធ្វើការស៊ើបអង្កេត ដោយថា ការបាក់រលំអគារនេះ អាចបណ្ដាលមកពីសង់ខុសបច្ចេកទេស ហើយអ្នកដែលទទួលខុសត្រូវចំពោះរឿងនេះ គឺវិស្វករ និងមេការ។
សំណង់អគារកម្ពស់៧ជាន់មួយកន្លែងនៅក្រុងកែប បានបាក់រលំសង្កត់មនុស្សស្លាប់ចំនួន៣៦នាក់ ក្នុងនោះមានកុមារ៦នាក់ និងរបួស២៣នាក់ កាលពីថ្ងៃទី៣ ខែមករា ឆ្នាំ២០២០ គឺម្ចាស់សំណង់ឈ្មោះ ឯក សារុន និង ឈីវ សុធី ជាប្ដីប្រពន្ធ។
បើតាមមន្ត្រីតុលាការខេត្តកំពត លោក ម៉ាន់ បូរេត អះអាងកាលពីថ្ងៃទី០៧ ខែមករា ឆ្នាំ២០២០ ថា ម្ចាស់សំណង់អគារដែលបានបាក់រលំនៅខេត្តកែបនោះ ត្រូវបានដោះលែងឱ្យនៅក្រៅបណ្ដោះអាសន្ន ក្រោយពីត្រូវបានចោទប្រកាន់ពីបទមនុស្សឃាតដោយអចេតនា។
នេះជាលើកទី៣ហើយនៃការបាក់រលំអគារក្នុងរយៈពេល៦ខែ គឺកាលពីថ្ងៃទី០២ ខែធ្នូ ឆ្នាំ២០១៩ សំណង់អគារសាលាធម្មសភានៅវត្តមួយក្នុងខេត្តសៀមរាប ក៏បានបាក់រលំបណ្ដាលឱ្យបាត់បង់ជីវិតមនុស្ស៣នាក់ និងរងរបួសធ្ងន់ស្រាលចំនួន១៣នាក់។ កាលពីថ្ងៃទី២២ ខែមិថុនាឆ្នាំមុន សំណង់អគារកម្ពស់៧ជាន់មួយទៀតនៅខេត្តព្រះសីហនុ បានបាក់រលំបណ្ដាលឱ្យកម្មករ២៨នាក់ស្លាប់ និងរងរបួស២៦នាក់ផងដែរ៕