អ្នកធ្វើការផ្នែកវិស័យសារព័ត៌មានមួយចំនួន ជំរុញទៅរដ្ឋាភិបាលឱ្យលុបបំបាត់ការរើសអើង និងយាយីទៅលើអ្នកសារព័ត៌មាន ដើម្បីឱ្យពួកគេបានបំពេញវិជ្ជាជីវៈដោយគ្មានការភ័យខ្លាច ខណៈនាយករដ្ឋមន្ត្រីជួបអ្នកសារព័ត៌នៅថ្ងៃនេះ។
នៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន ជួបអ្នកសារព័ត៌មាននៅរាជធានីភ្នំពេញនាថ្ងៃទី១៤ ខែមករានេះ ប៉ុន្តែ ជំនួបនោះដូចឆ្នាំមុនៗដែរ អ្នកសារព័ត៌មានមិនអនុញ្ញាតឱ្យចោទសួរ ឬឡើងថ្លែងពីទុក្ខកង្វល់របស់ពួកគេ ប្រាប់នាយករដ្ឋមន្ត្រីដើម្បីស្វែងរកដំណោះស្រាយឡើយ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅ ខេមបូចា លោក ម៉ៃ ទិត្យថារ៉ា មានប្រសាសន៍ថា លោកចង់ឱ្យរដ្ឋាភិបាលពង្រឹងយន្តការបញ្ចប់ការធ្វើទុក្ខបុកម្នេញ ការវាយដំ ឃាត់ខ្លួន និងការរារាំងការងាររបស់អ្នកសារព័ត៌មាន និងធានាតម្លាភាពនៅក្នុងការផ្តល់អាជ្ញាប័ណ្ណដល់ប្រព័ន្ធផ្សព្វផ្សាយ ជាដើម។
លោកថា៖ «សម្រាប់ខេមបូចា ប្រសិនបើមានឱកាសជួបជាមួយសម្ដេចនាយករដ្ឋមន្ត្រី ខេមបូចានឹងស្នើសុំឱ្យបញ្ឈប់ការរុកកួនអ្នកសារព័ត៌មាន តែការពារពួកគាត់ ដើម្បីស្តារលំហសេរីភាពអ្នកសារព័ត៌មានឱ្យបានប្រសើរឡើងវិញ ហើយក៏អាចស៊ើបអង្កេតចំពោះអ្នកសារព័ត៌មានដែលត្រូវបានធ្វើឃាតកន្លងមកដែលអ្នកខ្លះមិនទាន់ទទួលបានយុត្តិធម៌នៅឡើយទេ»។
សាស្ត្រាចារ្យផ្នែកសារព័ត៌មាននៅសកលវិទ្យាល័យកម្ពុជា លោក មឿន ឈានណារិទ្ធិ មានប្រសាសន៍ថា លោកចង់ឱ្យរដ្ឋាភិបាលបង្កើតវិទ្យាស្ថានសិក្សាផ្នែកសារព័ត៌មាន ដើម្បីបណ្ដុះបណ្ដាលវិជ្ជាជីវៈដល់អ្នកសារព័ត៌មាន និងចង់ឃើញអ្នកសារព័ត៌មានមានសុវត្ថិភាពទាំងផ្លូវកាយ និងផ្លូវច្បាប់ គ្មានការគំរាមកំហែងពីអាជ្ញាធរ ដូចមានចែងក្នុងគោលនយោបាយរបស់រដ្ឋាភិបាល។
លោកថា៖ «ទន្ទឹមនឹងអ្នកសារព័ត៌មានគាត់អនុវត្តនូវវិជ្ជាជីវៈរបស់គាត់ល្អប្រសើរដែរហ្នឹង ក៏យើងចង់ឱ្យអាជ្ញាធរឱ្យគាត់យល់ឱ្យបានច្បាស់លាស់ និងពេញលេញអំពីសិទ្ធិ និងសេរីភាពអ្នកសារព័ត៌មានផងដែរ»។
ក្រសួងព័ត៌មាន កាលពីដើមខែមករានេះ បានជួបក្រុមអ្នកសារព័ត៌មានមកពីជាង៤០ស្ថាប័ន ស្វែងរកមិតយោបល់ ជ្រើសរើសយកបញ្ហាអាទិភាពដាក់ជូនរដ្ឋាភិបាល ដើម្បីស្វែងរកដំណោះស្រាយ។
អ្នកនាំពាក្យក្រសួងព័ត៌មាន លោក ផុស សុវណ្ណ មានប្រសាសន៍ថា កង្វល់មួយចំនួនដែលក្រុមអ្នកសារព័ត៌មានបានលើកឡើង ក្រសួងបានដាក់ជូនទៅរដ្ឋាភិបាលហើយ ដូចជាការស្នើឱ្យអ្នកសារព័ត៌មាន មានធានារ៉ាប់រងជំងឺ ត្រូវការមេធាវីការពារពេលមានបញ្ហាកើតឡើង ស្នើឱ្យប្រើច្បាប់ស្ដីពីរបបសារព័ត៌មានដើម្បីការពារពួកគេជាដើម ។
លោកថា៖ «យើងមានជជែកដែរ ពីការតម្រូវឱ្យប្រើប្រាស់ច្បាប់ស្ដីពីរបបសារព័ត៌មាន ក្រមព្រហ្មទណ្ឌដែលមានចែង យើងក៏មានដាក់ចំនុចអស់ទាំងហ្នឹងទៅរដ្ឋាភិបាលដែរ»។
អ្នករាយការណ៍ព័ត៌មានឱ្យវិទ្យុសំឡេងសហរដ្ឋអាមេរិក លោក ស៊ុន ណារិន មានប្រសាសន៍ថា ការបើកឱកាសឱ្យអ្នកសារព័ត៌មានចោទសួរទៅនាយករដ្ឋមន្ត្រីផ្ទាល់ៗ ពីកិច្ចអន្តរាគមន៍លើកង្វល់របស់ពួកគេ ជាប្រសិទ្ធភាពក្នុងការទប់ស្កាត់កង្វះខាតរបស់ស្ថាប័នពាក់ព័ន្ធ។
លោកថា៖ «កាលពីឆ្នាំមុន យើងឃើញមានការជួបជុំដែរ ក្នុងពេលហ្នឹងសេរីភាពសារព័ត៌មានក៏មានការធ្លាក់ចុះ មានការចាប់អ្នកសារព័ត៌មានដែរ ប៉ុន្តែ យើងឃើញថា មិនមានការលើកឡើងចំៗដោះស្រាយបញ្ហាអស់ទាំងហ្នឹងទេ ខ្ញុំគិតថា គួរមានការដោះស្រាយបញ្ហាហ្នឹង ធ្វើយ៉ាងម៉េចធានាថា អ្នកសារព័ត៌មានហ្នឹងគាត់អាចធ្វើព័ត៌មានបានដោយគ្មានការភ័យខ្លាច ដោយសេរី និងគ្មានការកៀបសង្កត់»។
អតីតអ្នកយកព័ត៌មានវិទ្យុអាស៊ីសេរីដែលកំពុងជាប់បណ្ដឹង លោក យាង សុធារិន្ទ ចង់ឃើញរដ្ឋាភិបាល ទប់ស្កាត់ការប្រើប្រាស់ប្រព័ន្ធច្បាប់ដើម្បីរឹតបន្តឹងសេរីភាពអ្នកសារព័ត៌មាន។
លោកថា៖ «បើខ្ញុំជួបគាត់ ខ្ញុំនឹងលើកឡើងអ៊ីចេះថា សូមសម្រេចរកយុត្តិធម៌ឱ្យអ្នកសារព័ត៌ដែលរងការចោទប្រកាន់ដោយគ្មានភស្តុតាង ឱ្យពួកគាត់ប្រកបមុខបរឡើងវិញ ឱ្យសារព័ត៌មានដែលបានបិទហ្នឹងមានឱកាសឱ្យមកបើកការិយាល័យឡើងវិញ ដើម្បីមានឱកាសបម្រើប្រជាពលរដ្ឋ»។
អង្គការអ្នកសារព័ត៌មានគ្មានព្រំដែន (RSF) នៅឆ្នាំ២០១៩ បានដាក់ចំណាត់ថ្នាក់សេរីភាពសារព័ត៌មានរបស់កម្ពុជានៅអន់ថយនៅឡើយ ក្នុងលំដាប់ថ្នាក់លេខ១៤៣ ក្នុងចំណោមប្រទេសចំនួន១៨០។
ការវាយយម្លៃពីសេរីភាពអ្នកសារព័ត៌មានធ្លាក់ចុះនេះ អង្គការនោះ លើកឡើងពីការបិទស្ថានីយ៍វិទ្យុប្រមាណជា៣០ កាលពីចុងឆ្នាំ២០១៧ និងការបង្ខំចិត្តបិទទ្វារបស់កាសែត ឌឹខេមបូឌាដេលី និងការផ្លាស់ប្តូរម្ចាស់កាសែតភ្នំពេញប៉ុស្តិ៍ ហើយធ្វើឱ្យការបោះឆ្នោតឆ្នាំ២០១៨ ស្ងប់ស្ងាត់៕
