ក្រសួងរៀបចំដែនដី នគរូបនីយកម្ម និងសំណង់ បានដាក់ផែនការចុះបញ្ជីដីធ្លីជូនពលរដ្ឋឱ្យបាន៩៤ភាគរយនៅឆ្នាំ២០២០នេះ និងចុះបញ្ជីឱ្យបញ្ចប់១០០ភាគរយនៃក្បាលដី ប៉ាន់ស្មានសរុបចំនួន៧លានក្បាលដីនៅឆ្នាំ២០២១។
ក្នុងរបាយការណ៍បូកសរុបលទ្ធផលឆ្នាំ២០១៩ និងលើកទិសដៅការងារឆ្នាំ២០២០ ក្រសួងរៀបចំដែនដីឱ្យដឹងថា គិតត្រឹមខែធ្នូ ឆ្នាំ២០១៩ ក្រសួងបានចេញបណ្ណកម្មសិទ្ធដីធ្លីចំនួន ៥ ៦២៥ ៦៨៦បណ្ណ ស្មើនឹង៨០,៣៧ភាគរយនៃក្បាលដី ប៉ាន់ស្មាន៧លានក្បាលដី។
ក្រសួងបញ្ជាក់ថា ការចុះបញ្ជីដីធ្លីលក្ខណៈជាប្រព័ន្ធសម្រេចបាន ៥ ០០៨ ១០៥បណ្ណ ដោយចែកបណ្ណជូនពលរដ្ឋបានចំនួន ៤ ៦៦៣ ០៥៦បណ្ណ និងចុះបញ្ជីដីធ្លីលក្ខណៈដាច់ដោយដុំសម្រេចបាន ៦១៧ ៥៨១បណ្ណ ក្នុងនោះដីរដ្ឋបាន ១៨៥៤បណ្ណ ដែលមានដីទំហំ ៧៧៨ ៧២៥ហិកតា ដីឯកជនបាន ៦១៤ ៩០៨បណ្ណ និងដីសហគមន៍ជនជាតិដើមភាគតិចបាន ៣០សហគមន៍ស្មើនឹង ៨១៩បណ្ណ ដែលមានដីទំហំ ៣១៦០៥ហិកតាសម្រាប់ប្រជាពលរដ្ឋ ៣០៣៣គ្រួសារ។
អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បានសាទរចំពោះក្រសួងដែលប្តេជ្ញានេះ ប៉ុន្តែ លោកមិនសង្ឈឹមថា ក្រសួងធ្វើបានសម្រេចជាស្ថាពរ១០០ភាគនោះទេ។
មន្ត្រីសិទ្ធិមនុស្សរូបនេះលើកឡើងថា ក្បាលដីមួយចំនួនរបស់ប្រជាពលរដ្ឋកំពុងជាប់ពាក់ព័ន្ធជាមួយជម្លោះមិនទាន់បានដោះស្រាយចប់នៅឡើយ។ លោក វណ្ណ សុផាត បន្តថា ដើម្បីចុះបញ្ជីដីធ្លីជូនពលរដ្ឋឱ្យបានចប់ជាស្ថាពរ១០០ភាគរយ លុះត្រាតែ រដ្ឋាភិបាលដោះស្រាយវិវាទដីធ្លីឱ្យបានចប់ជាមុនសិន។
លោកបន្ថែមថា៖ «ខ្ញុំគិត គាត់ពន្លឿនយ៉ាងម៉េចក៏មិនអាចចុះបញ្ជីចប់បានជាស្ថាពរដែរ ព្រោះដីសព្វថ្ងៃនេះ វាមានបញ្ហាចម្រូងចម្រាសច្រើន។ ប៉ុន្តែ យើងស្វាគមន៍គាំទ្រការប្តេជ្ញាចិត្តរបស់គាត់។ អ៊ីចឹងជាអនុសាសន៍របស់យើង គឺគាត់ត្រូវតែដោះស្រាយវិវាទដីធ្លីរបស់ប្រជាពលរដ្ឋដែលកំពុងតែឡើងមកតវ៉ាសព្វថ្ងៃនេះ ឱ្យចប់សិន ទើបអាចចុះបញ្ជីដីធ្លីចប់បាន»។
តំណាងប្រជាពលរដ្ឋនៅខេត្តកោះកុង អ្នកស្រី ផាវ ញើង ដែលអះអាងថា សហគមន៍របស់គាត់មានជម្លោះដីធ្លីជាមួយក្រុមហ៊ុន ហេង ហ៊ុយ ជាង១០ឆ្នាំ មិនទាន់ទទួលបានដំណោះស្រាយ និងមានបណ្ណកម្មសិទ្ធត្រឹមត្រូវនោះ មិនជឿថា រដ្ឋាភិបាលធ្វើបាននោះទេ។
តំណាងពលរដ្ឋរូបនេះ អះអាងថា ក្រសួងរៀបចំដែនដីបានដោះស្រាយដីធ្លីជូនពួកគាត់រយៈពេលបីឆ្នាំហើយ ដោយតម្រូវឲ្យអាជ្ញាធរមូលដ្ឋានចុះវាស់វែង និងធ្វើបណ្ណកម្មសិទ្ធិឲ្យប្រជាពលរដ្ឋ ប៉ុន្តែ ពេលនេះអាជ្ញាធរថ្នាក់ក្រោមទាំងនោះមិនបានអនុវត្តតាមឡើយ។
អ្នកស្រីបន្ថែមថា៖ «ទាល់តែពួកខ្ញុំទៅយំ ទៅស្រែកមុខក្រសួងរៀបចំដែនដីជាង១ពាន់នាក់ បានឃើញមន្ត្រីភូមិបាលស្រុកស្រែអំបិល៤នាក់ចុះមកផ្ទះខ្ញុំដើម្បីពិភាក្សាជជែករឿងចុះបញ្ជីដីធ្លី។ បើសិនណា ការចុះបញ្ជីនៅថ្ងៃនេះ មួយខែទៀតអត់ឃើញប្លង់ទេ ពួកខ្ញុំនឹងទៅតវ៉ាដល់ក្រសួងម្តងទៀត។ ព្រោះរឿងនេះវាអយុត្តិធម៌ចំពោះពួកខ្ញុំណាស់»។
កាលពីថ្ងៃទី៣១ ខែធ្នូ ឆ្នាំ២០១៩ ប្រជាពលរដ្ឋជិត១ពាក់នាក់ មកខេត្តចំនួន៦ ដែលកំពុងមានជម្លោះដីធ្លីជាមួយក្រុមហ៊ុនឯកជន បានឡើងតវ៉ាមុខក្រសួងរៀបចំដែនដី ដើម្បីដាក់ញត្តិសុំទៅក្រសួងរៀបចំដែនដី នគរូបនីយកម្ម និងសំណង់ ជួយដោះស្រាយបញ្ចប់វិវាទដីធ្លីជូនពួកគេ ដោយពលរដ្ឋទាំងនោះអះអាងថា ជម្លោះដីធ្លីរបស់ពួកគេបានអូសបន្លាយជិត២០ឆ្នាំទៅហើយ។
ក្នុងរបាយការណ៍បូកសរុបលទ្ធផលឆ្នាំ២០១៩ និងលើកទិសដៅការងារឆ្នាំ២០២០ បានឱ្យដឹងថា ចាប់តាំងពីឆ្នាំ២០១៦ ដល់ខែធ្នូ ឆ្នាំ២០១៩ ក្រសួងទទួលបានបណ្ដឹងវិវាទដីធ្លីចំនួន ២០៩៦ករណី ដោយដោះស្រាយបានចំនួន ៤៧៨ករណី ក្នុងនោះបានដោះស្រាយបញ្ចប់ជាស្ថាពរ ២១១ករណី ធ្វើលិខិតឆ្លើយតបទៅម្ចាស់បណ្ដឹង និងបង្វែរទៅសមត្ថកិច្ចពាក់ព័ន្ធផ្សេងដោះស្រាយចំនួន ២៦៧ករណី ហើយក្រសួងកំពុងដំណើរការដោះស្រាយ ១៦១៨ករណី៕
