លោកនាយករដ្ឋមន្ត្រី ហ៊ុន សែន បានប្រកាសផ្តល់មេធាវីសម្រាប់ការពារក្ដីដល់អ្នកកាសែត ដែលប្រឈមមុខនឹងបណ្ដឹងផ្លូវច្បាប់ណាមួយអំឡុងពេលពួកគេអនុវត្តវិជ្ជាជីវៈសារព័ត៌មាន ប៉ុន្តែ លោកថា សេវាការពារក្ដីមួយនេះ នឹងត្រូវបានផ្ដល់ជូនអាស្រ័យលើលក្ខណៈវិនិច្ឆ័យដាច់ដោយឡែក។
លោកនាយករដ្ឋមន្ត្រីបានប្រកាសអំពីការផ្ដល់មេធាវីការពារក្ដីសម្រាប់អ្នកកាសែតបែបនេះ ក្នុងជំនួបលើកទី៤ រវាងលោក និងក្រុមអ្នកសារព័ត៌មានជិត ៦ពាន់នាក់ កាលពីល្ងាចថ្ងៃម្សិលមិញនេះ។
លោក ហ៊ុន សែន ថ្លែងថា៖ «អ្នកសារព័ត៌មានបំពេញវិជ្ជាជីវៈរបស់គេ ត្រូវបានទទួលការប្តឹងពីអ្នកនេះពីអ្នកនោះ យើងត្រូវចេញមុខការពាឱ្យ ប៉ុន្តែ មេធាវីនេះមានសិទ្ធិបដិសេធចំពោះការស្នើសុំអ្នកសារព័ត៌មានណា ដែលជេរម្ដាយគេ ដែលបំភ្លៃការពិត»។
ក្នុងពិធីនោះដែរ លោក ហ៊ុន សែន បានប្រាប់ទៅអ្នកសារព័ត៌មានទាំងអស់ ឱ្យប្រកាន់ក្រមសីលធម៌មិនប្រើសម្ដីជេរប្រមាថ បំពានសិទ្ធិអ្នកដទៃ និងផ្សព្វផ្សាយបំភ្លៃការពិតនោះឡើយ។
លោក ហ៊ុន សែន បានប្រកាសថា លោកបានប្រគល់សិទ្ធទៅប្រធានក្រុមមេធាវីស្ម័គ្រចិត្តរបស់លោក គឺលោក គី តិច ជាអ្នកចាត់ចែង និងទទួលខុសត្រូវ។
ហើយទន្ទឹមនឹងការប្រកាសផ្តល់មេធាវីការពារក្ដីដល់អ្នកសាព័ត៌មាននេះ លោក ហ៊ុន សែន ក៏ស្នើឱ្យលោក គី តិច ត្រូវពិនិត្យឱ្យបានច្បាស់លាស់អំពីអង្គហេតុ និងអង្គច្បាប់ មុនទទួលយកសំណើសុំការពារពីសាព័ត៌មាន។
វីអូឌីមិនអាចសុំការបញ្ជក់បន្ថែមពីលោក គី តិច ប្រធានក្រុមមេធាវីស្ម័គ្រចិត្តរបស់លោកនាយករដ្ឋមន្ត្រីបានទេនៅថ្ងៃនេះ ដោយទូរសព្ទចូលហើយ តែលោកចុចបិទ។
នាយកប្រតិបត្តិនៃសម្ព័ន្ធអ្នកសារព័ត៌មានកម្ពុជា (ខេមបូចា) លោក ម៉ៃ ទិត្យថារ៉ា បានសាទរចំពោះការសម្រេចបែបនេះរបស់លោកនាយករដ្ឋមន្ត្រី ហ៊ុន សែន ដោយចាត់ទុកថា ជាចំណុចល្អមួយសម្រាប់អ្នកសារព័ត៌មាន នៅពេលពួកគេប្រឈមមុខនឹងការចោទប្រកាន់ផ្សេងៗ។
ប៉ុន្តែ លោកក៏មានការបារម្ភថា អ្នកសារព័ត៌មានវិជ្ជាជីវៈដែលហ៊ានសរសេររិះគន់ពីចំណុចអវិជ្ជមានរបស់រដ្ឋាភិបាល អាចនឹងមិនទទួលបានសេវានេះទេ ដោយសារមេធាវីទាំងនោះភ័យខ្លាច មិនហ៊ានចេញមុខការពារ។
លោក ម៉ៃ ទិត្យថារ៉ា ប្រាប់ថា៖ «ខ្ញុំគិតថា អញ្ចេះទេ ដើម្បីឱ្យមានតម្លាភាពសម្រាប់អ្នកសារព័ត៌មាន និងមេធាវី គ្រាន់តែភាគីទាំងពីរហ្នឹង ហ៊ានធ្វើរឿងដែលកើតឡើងពិតប្រាកដ ដោយពុំមានការភ័យខ្លាច។ ឧទាហរណ៍ថា អ្នកនេះធ្វើការឱ្យកាសែតនេះ ដែលហ៊ានរិះគន់រដ្ឋាភិបាល ខ្លួនមិនហ៊ានការពារក្ដីឱ្យ ខ្លាចប៉ះពាល់ដល់ផលប្រយោជន៍។ អ៊ីចឹង សុំឱ្យភាគីទាំងពីរហ្នឹង លុះត្រាតែហ៊ានធ្វើការប្រកបដោយវិជ្ជាជីវៈរបស់ពួកគាត់ផ្តល់ដោយពុំមានការភ័យខ្លាច»។
បច្ចុប្បន្ននេះ អតីតអ្នកយកព័ត៌មានឱ្យអតីតកាសែតខេមបូឌា ដេលី ២រូប មានលោក អូន ភាព និងលោក Zsombor Peter កំពុងប្រឈមមុខនឹងការចោទប្រកាន់ពីបទញុះញង់ទៅតាមបណ្ដឹងពីអាជ្ញាធរមូលដ្ឋានខេត្តរតនគិរី ក្រោយពីអ្នកកាសែតទាំងពីរនាក់នោះចុះទៅយកព័ត៌មាននៅមុនការបោះឆ្នោតឃុំ-សង្កាត់ ឆ្នាំ២០១៧។
ចំណែកអតីតបុគ្គលិកវិទ្យុអាស៊ីសេរី ២រូប លោក អ៊ួន ឈិន និងលោក យាង សុធារិន្ទ (ហៅ យាង សុជាមេត្តា) កំពុងស្ថិតក្រោមការចោទប្រកាន់ពីបទធ្វើចារកម្មបម្រើឱ្យរដ្ឋបរទេស ក្រោយពីត្រូវបានសមត្ថកិច្ចរាជធានីភ្នំពេញ ចាប់ខ្លួនកាលពីចុងឆ្នាំ២០១៧។ សំណុំរឿងរបស់ពួកគេត្រូវបានតុលាការបញ្ជាឱ្យបើកការស៊ើបអង្កេតឡើងវិញ។
លោក យាង សុធារិន្ទ បានលើកឡើងថា វាជាការល្អដែលរដ្ឋាភិបាលផ្តល់មេធាវីដើម្បីការពារក្ដីជូនអ្នកសារព័ត៌មានវិជ្ជាជីវៈ ប៉ុន្តែ លោកថា វានឹងមិនបានផលប្រយោជន៍ទេ ប្រសិនបើប្រព័ន្ធតុលាការមិនល្អ មិនឯករាជ្យនោះ។
លោក យាង សុធារិន្ទ និយាយថា៖ «ទោះបីជាខំផ្តល់មេធាវីឱ្យគាត់យ៉ាងណាក៏ដោយ ប្រសិនបើប្រព័ន្ធតុលាការហ្នឹង អត់យុត្តិធម៌ទៅហើយ វាមិនអាចជួយអ្វីបានដល់អ្នកកាសែតទេ។ អ៊ីចឹង សម្រាប់ខ្ញុំ អ្វីដែលរដ្ឋាភិបាលគួរធ្វើ គឺពង្រឹងប្រព័ន្ធយុត្តិធម៌ហ្នឹងឱ្យល្អ វាជាជាងផ្តល់មេធាវី។ តែប្រព័ន្ធអត់ល្អ វាក៏មិនល្អដែរ»៕
