លោកនាយករដ្ឋមន្ត្រី ហ៊ុន សែន បានប្ដេជ្ញាជំរុញសេចក្ដីព្រាងច្បាប់ស្ដីពីសិទ្ធិទទួលបានព័ត៌មាន ឱ្យចេញនៅក្នុងឆ្នាំនេះ បន្ទាប់ពីសេចក្ដីព្រាងច្បាប់នេះ ត្រូវបានផ្ដួចផ្ដើមឡើងអស់រយៈពេលយ៉ាងតិច ៦ឆ្នាំមកហើយនោះ។
លោកនាយករដ្ឋមន្ត្រីបានប្រកាសបែបនេះ នៅក្នុងពិធីសំណេះសំណាលជាមួយក្រុមអ្នកសារព័ត៌មានជិត ៦ពាន់នាក់ កាលពីល្ងាចថ្ងៃម្សិលមិញនេះ។
លោក ហ៊ុន សែន ថ្លែងថា៖ «អ្វីដែលជាក់លាក់ គឺច្បាប់ស្ដីពីសិទ្ធិទទួលបានព័ត៌មាន ត្រូវចេញឱ្យបាននៅក្នុងឆ្នាំ២០២០។ ឥឡូវ វានៅតែក្រសួងយុត្តិធម៌ទេ។ ក្រសួងយុត្តិធម៌ មិនត្រូវការពេលប៉ុន្មានទេ គ្រាន់តែយកទៅផ្ទៀងផ្ទាត់ជាមួយក្រមរដ្ឋប្បវេណី និងយកទៅផ្ទៀងផ្ទាត់ជាមួយនឹងក្រមព្រហ្មទណ្ឌ ដើម្បីឱ្យមានសុគ្គតភាព [ភាពស្របគ្នា] រវាងច្បាប់ទាំងឡាយជាមួយគ្នាតែប៉ុណ្ណោះ ទៅលើបទប្បញ្ញតិស្ដីពីទោសប្បញ្ញតិ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានប្រាប់ថា សេចក្ដីព្រាងច្បាប់មួយនេះ កំពុងស្ថិតនៅក្រោមការពិនិត្យផ្ទៀងផ្ទាត់ទៅលើខ្លឹមសារនៃទោសប្បញ្ញត្តិជាមួយក្រសួងព័ត៌មាន មុននឹងបញ្ជូនទៅទីស្ដីគណៈរដ្ឋមន្ត្រីនាពេលឆាប់ៗនេះ។
លោក ជិន ម៉ាលីន ប្រាប់ថា៖ «ជានីតិវិធី ក្រសួងយុត្តិធម៌ នឹងត្រួតពិនិត្យមើលផ្នែកនៃទោសប្បញ្ញត្តិ។ ឥឡូវនេះ ក្រសួង [យុត្តិធម៌] កំពុងធ្វើការជាមួយក្រសួងព័ត៌មាន ដើម្បីពិភាក្សា និងកែសម្រួល។ សួរថា ពេលណា យើងក៏អត់ដឹងដែរ អាស្រ័យទៅលើស្ថានភាពជាក់ស្តែង ទំហំការងារ»។
អ្នកសារព័ត៌មានសេរី លោក ម៉ម មុនីរតន៍ ប្រាប់ថា លោកចង់ឃើញសេចក្ដីព្រាងច្បាប់នេះលេចចេញជារូបរាងឱ្យបានឆាប់ ប៉ុន្តែ លោកលើកឡើងថា មាត្រាមួយចំនួននៃសេចក្ដីព្រាងច្បាប់នេះ នៅតែមានការរឹតត្បិតសេរីភាពអ្នកសារព័ត៌មាន ក្នុងការស្នើសុំព័ត៌មានពីស្ថាប័នរដ្ឋ។
លោក ម៉ម មុនីរតន៍ និយាយថា៖ «នៅក្នុងសេចក្ដីព្រាងច្បាប់បានកំណត់ថា ប្រសិនបើអ្នកដែលត្រូវស្នើសុំ យល់ឃើញថា អ្នកកាសែតសុំព័ត៌មានធ្វើឱ្យមានការរំខាន គេមានសិទ្ធិប្តឹងបកមកវិញ ហើយអ្នកស្នើសុំព័ត៌មាន ពោលអ្នកកាសែត អាចប្រឈមនឹងការជាប់ទោសទណ្ឌ។ ដូច្នេះ ខ្លឹមសារទាំងអស់នេះ ខ្ញុំយល់ថា វាជាចេតនាអាក្រក់ដែលមិនមែនជារឿងល្អសម្រាប់អ្នកសែតទេ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា លោក ម៉ៃ ទិត្យថារ៉ា លើកឡើងថា កង្វះច្បាប់មួយនេះ បានធ្វើឱ្យអ្នកសារព័ត៌មាននៅក្នុងប្រទេសកម្ពុជា ជួបប្រទះបញ្ហាលំបាកក្នុងការស្វែងរកព័ត៌មានរសើបៗពីមន្ត្រីរដ្ឋាភិបាលមួយចំនួន ដែលត្រូវយកមកផ្សព្វផ្សាយ។
លោក ម៉ៃ ទិត្យថារ៉ា៖ «ការជំរុញឱ្យបញ្ចប់ច្បាប់ស្ដីពីសិទ្ធិទទួលបានព័ត៌មានក្នុងពេលឆាប់ៗនេះ គឺជាចំណុចមួយល្អ។ ចំណុចល្អហ្នឹងមិនមែនសម្រាប់តែអ្នកសារព័ត៌មានទេ គឺសម្រាប់ស្ថាប័នអង្គការក្រៅរដ្ឋាភិបាល អង្គការជាតិ និងអន្តរជាតិ ពីព្រោះគាត់ងាយស្រួលក្នុងការសុំព័ត៌មានពីក្រុមហ៊ុនឯកជន ឬខាងស្ថាប័នរដ្ឋាភិបាល។ គាត់អាចទទួលបានព័ត៌មានបានគ្រប់ជ្រុងជ្រោយ»។
កាលពីដើមឆ្នាំមុន អង្គការ និងសមាគមចំនួន១៩ បានផ្ញើលិខិត៤ ដាច់ដោយឡែកពីគ្នា ទៅស្ថាប័នកំពូលរបស់រដ្ឋ និងរដ្ឋាភិបាល ដើម្បីឱ្យស្ថាប័នទាំងនោះជំរុញដំណើរការតាក់តែងច្បាប់ និងអនុម័តសេចក្ដីព្រាងច្បាប់មួយនេះ ដោយថា ដើម្បីលើកកម្ពស់អភិបាលកិច្ចល្អ និងសិទ្ធិទទួលបានព័ត៌មាន។
សេចក្ដីព្រាងច្បាប់មួយនេះ ត្រូវបានផ្ដួចផ្ដើមឡើងនៅក្រោយការបោះឆ្នោតជាតិឆ្នាំ២០១៣ ហើយសេចក្ដីព្រាងច្បាប់នេះ ត្រូវបានរៀបចំតាក់តែងរួមគ្នារវាងក្រសួងព័ត៌មាន អង្គការវប្បធម៌វិទ្យាសាស្ត្រ និងអប់រំនៃអង្គការសហប្រជាជាតិ (យូណេស្កូ) ស្ថានទូតនៃប្រទេសស៊ុយអែត និងក្រុមអង្គការសង្គមស៊ីវិលដែលធ្វើការលើវិស័យសារព័ត៌មាននៅកម្ពុជា ចាប់តាំងពីឆ្នាំ២០១៤មក៕
