របាយការណ៍បឋមដែលផ្តល់ដោយអ្នកនាំពាក្យក្រសួងទេសចរណ៍ បង្ហាញថា ចំនួនភ្ញៀវទេសចរសរុបប្រចាំឆ្នាំ២០១៩ មានចំនួនប្រមាណជាង៦លាននាក់ ដែលកើនឡើង៨ភាគរយ បើធៀបនឹងឆ្នាំ២០១៨។
អ្នកនាំពាក្យក្រសួងទេសចរណ៍ លោក តុប សុភ័ក បានអះអាងថា របាយការណ៍បឋមរបស់ក្រសួង បង្ហាញថាឆ្នាំ២០១៩កន្លងមក កម្ពុជាទទួលបានភ្ញៀវទេសចរ ចំនួន៦លាន ៧សែននាក់។ លោកថា ចំនួនភ្ញៀវទេសចរទស្សនាខេត្តសៀមរាប មានការថយចុះពិតមែន តែភ្ញៀវទៅលេងខេត្តព្រះសីហនុ កែប កំពត មណ្ឌលគិរី រតនគិរី ក្រចេះ និងខេត្តស្ទឹងត្រែង មានការកើនឡើង។ អ្នកនាំពាក្យរូបនេះបានបញ្ជាក់ថា ឆ្នាំ២០១៩ ភ្ញៀវបានកើនខ្លាំងទៅតំបន់ទេសចរណ៍បែបធម្មជាតិ ជាប្រភេទអេកូទេសចរណ៍ និងសហគមន៍ទេសចរណ៍ ដែលគ្រប់គ្រង និងទទួលផលដោយពលរដ្ឋក្នុងសហគមន៍ ។
លោក តុប សុភ័ក បានបញ្ជាក់ថា៖ «ក្រៅអំពីគេមកមើលបេតិកភណ្ឌ វត្ថុបុរាណ ប្រាង្គប្រាសាទអ្វីដែលជាបុរាណ ក៏គេចង់ងាកទៅមើលអ្វីដែលជាលក្ខណៈកែច្នៃ ឬក៏លក្ខណៈធម្មជាតិដែលមានការរៀបចំបានល្អ។ សំខាន់បំផុត គឺគេបានផ្លាស់ប្តូរនូវទំនៀមទម្លាប់ប្រពៃណី ឬក៏ស្វែងយល់ពីការរស់នៅរបស់ប្រជាពលរដ្ឋតាមមូលដ្ឋានហ្នឹង។ ទេសចរណ៍ផ្នែកអេកូទេសចរណ៍ ផ្នែកសហគមន៍ទេសចរណ៍ហ្នឹង គឺវាជួយដល់សុខភាពដែរ មានខ្យល់ដកដង្ហើមអីស្រស់ថ្លា យើងងាកចេញពីធ្វើការហត់នឿយក្នុងទីក្រុង គឺងាកទៅហ្នឹង»។
កាលពីឆ្នាំ២០១៨ កម្ពុជាទទួលបានភ្ញៀវទេសចរ ៦លាន ២សែននាក់ ដែលកើនឡើង១០.៧% បើប្រៀបធៀបនឹងឆ្នាំ២០១៧ ដែលមានន័យថា កំណើនទេសចរនៅឆ្នាំ២០១៩ បានថយចុះជាង២% បើប្រៀបធៀបនឹងឆ្នាំ២០១៨។
លោក តុប សុភ័ក លើកឡើងថា មូលហេតុនៃការធ្លាក់ចុះនៃកំណើនភ្ញៀវទេចរគឺជាបញ្ហាសកលដែលកើតឡើងស្ទើរគ្រប់ប្រទេស ពុំមែនមានតែនៅកម្ពុជាមួយឡើយ។
លោក តុប សុភ័ក មានប្រសាសន៍ថា៖ «យើងតែងតែមានកិច្ចប្រជុំ គេហៅថា ការផ្លាស់ប្តូរកិច្ចប្រជុំប្រទេសក្នុងតំបន់។ ប្រទេសអាស៊ានយើងហ្នឹងក៏ដូចជាប្រទេសផ្សេងៗទៀត ដែលយើងមានទំនាក់ទំនងទេសចរណ៍ហ្នឹង គឺគេតែងតែរកដំណោះស្រាយនៅពេលដែលជួបបញ្ហា»។
ទីប្រឹក្សានៃសមាគមទេសចរណ៍កម្ពុជា លោក ហូ វណ្ណឌី បានថ្លែងបញ្ជាក់ថា ចរន្តសកលដែលអាចប៉ះទង្គិចដល់វិស័យទេចរណ៍ទើបតែកើតឡើងកាលពីពេលថ្មីៗនេះប៉ុណ្ណោះ គឺដោយសារជម្លោះរវាងប្រទេសអាមេរិក និងប្រទេសអ៊ីរ៉ង់។ លោកបន្តថា ដោយឡែក ឆ្នាំ២០១៩ ពុំមានបញ្ហាអ្វីធំដុំឡើយ ព្រោះប្រទេសវៀតណាម និងថៃ នៅតែអាចរក្សាកំណើនភ្ញៀវទេសចរប្រចាំឆ្នាំរបស់ខ្លួនបានល្អដដែល។ លោក វណ្ណឌី ក៏ទទួលស្គាល់ដែរថា ការធ្លាក់ចុះកំណើនទេសចរមកកម្ពុជានៅឆ្នាំ២០១៩ ជាចំនួនតិចតួចប៉ុណ្ណោះ ប៉ុន្តែ ពុំបង្កជាបញ្ហាធ្ងន់ធ្ងរដល់អ្នកដែលធ្វើការក្នុងវិស័យនេះនៅឡើយទេ។
លោក ហូ វណ្ណឌី បានពន្យល់ថា៖ «ការថមថយនេះតិចតួចទេ ប៉ុន្តែ យើងអត់ចង់ឃើញតួលេខថមថយទេ ព្រោះវាធ្វើឱ្យប៉ះពាល់ទៅដល់អ្នករកទទួលទានក្នុងវិស័យហ្នឹង ជាពិសេសវិស័យសណ្ឋាគារ និងវិស័យដឹកជញ្ជូន ជាពិសេសក្រុមហ៊ុនអាកាសចរណ៍ ហើយនិងផ្លូវគោក និងផ្លូវទឹក ជាដើម។ ថមថយកាន់តែខ្លាំង វានឹងធ្វើឱ្យប៉ះពាល់ស៊ីជម្រៅកាន់តែច្រើនទៅដល់អន្តរវិស័យទៅទៀត»។
បើតាមអ្នកប្រឹក្សាយោបល់ នៃសមាគមទេចរណ៍កម្ពុជា ដើម្បីស្ដារវិស័យទេសចរណ៍នៅក្នុងប្រទេសកម្ពុជាបានល្អប្រសើរ រដ្ឋាភិបាលត្រូវផ្តោតការយកចិត្តទុកដាក់ លើការរក្សាទេសភាព ទិដ្ឋភាព គុណភាព និងសោភ័ណ្ឌភាពនៅតាមតំបន់រមណីយដ្ឋាននានា។ លោកបន្ថែមថា បញ្ហាបន្ទាប់មកទៀត គឺដោះស្រាយបញ្ហាសណ្ដាប់ធ្នាប់ អនាម័យ និងកាត់បន្ថយបញ្ហាគ្រោះថ្នាក់ចរាចរណ៍។
ទោះយ៉ាងណាក៏ដោយ ថ្លែងនៅក្នុងពិធីជួបជុំលើកទី៤ ជាមួយអ្នកសារព័ត៌មាន នៅឯមជ្ឈមណ្ឌលកោះពេជ្រ កាលពីថ្ងៃទី១៤ ខែមករា លោកនាយករដ្ឋមន្ត្រី ហ៊ុន សែន បានឆ្លើយតបទៅនឹងមតិរិះគន់មួយចំនួនទាក់ទងនឹងការធ្លាក់ចុះភ្ញៀវទេសចរក្នុងខេត្តសៀមរាប ថា ជាការទិតៀនផ្អែកលើគំនិតចង្អៀតចង្អល់។ លោកថា ដ្បិតភ្ញៀវបានធ្លាក់ចុះក្នុងខេត្តដែលសម្បូរប្រាសាទបុរាណ តែចំនួនមនុស្សទៅលេងខេត្តជាប់មាត់សមុទ្រ និងខេត្តប៉ែកឦសានប្រទេសកម្ពុជាមានការកើនឡើង។
លោកនាយករដ្ឋមន្ត្រី បានប៉ាន់ប្រមាណថា ចំនួនភ្ញៀវទេសចរប្រចាំឆ្នាំ២០១៩ មានការកើនឡើងរហូតដល់ជាង១០% ឯណោះ។
លោកនាយករដ្ឋមន្ត្រី ហ៊ុន សែន បន្ថែមថា៖ «តើនៅទូទាំងព្រះរាជាណាចក្រកម្ពុជា ទេសចរណ៍បានធ្លាក់ ឬទេសចរណ៍បានកើន ត្រូវមើលរបៀបនេះ សូមកុំមើលដើមឈើមួយដើមៗ ត្រូវមើលព្រៃទាំងមូល ទើបជាការត្រឹមត្រូវ។ យើងមានអ្នកទេសចរតែជាង៦លាននាក់ ចឹងទេគេមិនអាចទៅលេងសៀមរាបម្ដងហើយម្ដងទៀត ដោយមិនប្តូរគោលដៅនោះទេ។ នេះជាបញ្ហាដែលត្រូវយកមកគិតជាកញ្ចប់»៕
