អតីតយោធិនពិការម្នាក់ បានប្ដឹងអតីតមេបញ្ជាការរងភូមិភាគ៥ ពីបទប្រើប្រាស់ហិង្សា និងគំរាមអាយុជីវិត ប៉ុនប៉ងសម្លាប់ក្នុងជម្លោះដីធ្លីមួយកន្លែង ស្ថិតនៅស្រុកបាណន់ ខេត្តបាត់ដំបង។
ថ្លែងប្រាប់ វីអូឌី តាមទូរស័ព្ទ កាលពីថ្ងៃទី ២៤ មករា អតីតយោធិនពិការមួយរូប គឺ លោក យី ប៊ុនលី ឲ្យដឹងថា អតីតមេបញ្ជាការរបស់ខ្លួនប្រើហិង្សាមកលើរូបលោក ក្នុងពេលស្វែងរកដំណោះស្រាយបញ្ហាដីធ្លី។ លោកបន្តថា នៅចំពោះសមាជិកក្រុមប្រឹក្សាឃុំចែងមានជ័យ មេបញ្ជាការយោធភូមិភាគ៥ ដែលចូលនិវត្តន៍ព្យាយាមហក់ទះកំផ្លៀងលោក ក្នុងពេលប្រជុំពិគ្រោះយោបល់ ដើម្បីរកដំណោះស្រាយ រឿងទំនាស់ដីធ្លី។
លោកបន្ថែមថា៖«ហេតុអីបានជាដើមបណ្ដឹងខ្ញុំគាត់មករំលោភបំពាន់លើដីដែលមានសាលដីការក្សាការពារ។អ៊ីចឹងហេតុអីអ៊ំអត់មានដំណោះស្រាយឲ្យខ្ញុំ។គ្រាន់តែខ្ញុំនិយាយដល់ចំណុចហ្នឹង ហើយអ៊ំមេឃុំអត់ទាន់ដោះស្រាយផង ស្រាប់តែហក់ទះខ្ញុំមួយដៃបណ្ដោយ។វាយខ្ញុំផ្អើលឆោឡោនៅក្នុងសាលាឃុំតែម្ដង។អានេះឯងជាសាច់រឿងពិតនោះ។ដល់អ៊ីចឹងហើយគេវាយខ្ញុំរួចហើយ កូនក៏ស្រែកគំរាមបន្ថែមថាវាយឯងឲ្យងាប់បណ្ដោយ ហើយបាញ់ឯងចោលបណ្ដោយទៅ ស្រាប់តែស្រែកគំរាមយើងអ៊ីចឹងតែម្ដង » ។
បើតាមលោក យី ប៊ុនលី ឲ្យដឹងថា មេបញ្ជាការរងភូមិភាគ៥ឈ្មោះលោក ឃុំ ហ៊ាន បានទៅចាប់ដីសាធារណៈរបស់រដ្ឋដែលជាប្រភេទដីព្រៃទំនេរ។ដីនេះមានទំហំ ៣៨ ហិកតា ស្ថិតនៅភូមិបុស្សខ្នុរ ឃុំចែងមានជ័យ ស្រុកបាណន់ ខេត្តបាត់ដំបង។ស្របពេលជាមួយគ្នានោះ បើតាមលោក ប៊ុនលី ឲ្យដឹងថានៅអំឡុងឆ្នាំ១៩៩៦លោកក៏បានចាប់ដីក្បែរគ្នានោះ ចំនួន ៥ ហិកតារដែរ។ប្រភពបន្តថា មេបញ្ជាការរងភូមិភាគ៥ ពេលនោះបានផ្ដាំឲ្យលោកជួយមើលដីឲ្យផង ព្រោះដីនៅជាប់ព្រំគ្នា។
បើតាមលោក យី ប៊ុនលី នៅគ្រាដែលខ្លួនមើលថែទាំដីឲ្យនេះ លោក ឃុំ ហ៊ាន ដែលជាអតីតមេបញ្ជាការរបស់លោក បានសន្យាផ្ដល់ដីចំនួន៥ហិកតា ដែលជាចំណែកដីរបស់គាត់ ក្នុងចំណោមដីទាំង៣៨ហកិកតាបន្ថែមទៀតផង។
ជុំវិញរឿងរ៉ាវនេះ ភរិយាលោក ឃុំ ហ៊ាន គឺអ្នកស្រី សុវណ្ណ នារី បដិសេធថាក្រុមគ្រួសារអ្នកស្រី មិនដែលធ្លាប់បានសន្យាផ្ដល់ឲ្យលោក យី ប៊ុនលី ម្តងណាឡើយ។ផ្ទុយទៅវិញ មានតែអតីតយោធិនពិការនេះទេ ដែលប៉ុនប៉ងចង់បានទ្រព្យសម្បត្តិរបស់អ្នកស្រី។
អ្នកស្រីបន្ថែមថា៖ «អត់ទេ ខ្ញុំអត់ដែលបានសន្យាអ្វីទាំងអស់។នេះការបំផ្លើសទាំងស្រុង។ខ្ញុំធ្លាប់ឲ្យដីទៅគាត់៥ហិកតាររួចហើយ ហើយគាត់បានលក់ឲ្យទៅរួចបាត់ហើយ។ហើយគាត់ថែមទាំងឈប់រស់នៅជាមួយខ្ញុំយូរឆ្នាំទៀតផង។ហើយអ្វីដែលគាត់និយាយនេះគឺបំផ្លើសទាំងអស់។និយាយរួមទៅខ្ញុំមានឯកសារដីដែលចែកឲ្យទៅគាត់ ហើយបន្ទាប់មកគាត់លក់ឲ្យទៅគេ ខ្ញុំក៏មានឯកសារថែមទៀតផង » ។
ផ្ទុយពីការលើកឡើង របស់ភាគីលោក ឃុំ ហ៊ាន នេះ លោក យី ប៊ុនលី អះអាងថា ការសន្យាផ្ដល់ដី៥ហិកតារ ជាថ្នូរក្នុងការជួយមើលថែរក្សាដីឲ្យនេះ គឺភាគីទាំងសង្ខាងពុំមានលិខិតស្នាមត្រឹមត្រូវទេ ពោលការសន្យាធ្វើឡើងផ្ទាល់មាត់រៀងៗខ្លួនប៉ុណ្ណោះ។
ក្រោយពេលអំពើហិង្សាកើតឡើងភ្លាមៗ នៅថ្ងៃព្រឹកថ្ងៃទី ២៤ មករា ដដែល លោក យី ប៊ុនលី បានសម្រេចចិត្តទៅដាក់ពាក្យបណ្ដឹង ប្រឆាំងលោក ឃុំ ហ៊ាន និងកូនប្រុសពីបទ « ប្រើប្រាស់ហិង្សា និងគំរាមកំហែង » នៅប៉ុស្តិ៍នគរបាលរដ្ឋបាលឃុំចែងមានជ័យ ។បើតាមលោក ប៊ុនលី បញ្ជាក់ថា ហេតុការណ៍ហិង្សានេះ បើកុំកើតឡើងនៅក្នុងសាលាឃុំ ហើយនៅចំពោះមុខសមាជិកក្រុមប្រឹក្សាឃុំផង ម្ល៉េះក្រុមគ្រួសារ អតីតមេបញ្ជាការដែលចូលនិវត្ត អាចនឹងវាយធ្វើបាបលោករហូតដល់ស្លាប់ផងក៏ថាបានដែរ។
បើទោះជាបែបនេះក្ដី ភរិយាលោក ឃុំ ហ៊ានគឺអ្នកស្រី សុវណ្ណ នារី អះអាងថា នេះជាការចោទប្រកាន់ខុសការពិតទាំងស្រុង។បើតាមអ្នកស្រី នារី បញ្ជាក់ថា ក្រុមគ្រួសាររបស់អ្នកស្រី មានតែព្យាយាមសម្របសម្រួលដោយសន្តិវិធី ដើម្បីបញ្ចប់ទំនាស់ប៉ុណ្ណោះ។ម្យ៉ាងវិញទៀត លោក យី ប៊ុនលី នេះក៏ត្រូវជាសាច់ញាតិក្នុងឋានៈជាបងប្អូនជីដូនមួយផង ហេតុនេះអ្នកស្រីគ្មានហេតុផលណា ដែលមានចេតនាអាក្រក់បែបនេះឡើយ។
អ្នកស្រីបន្ថែមថា៖«និយាយទៅពន្យុះ គឺពន្យុះឲ្យយើងវាយគាត់។ឥឡូវនិងគាត់ដាក់ពាក្យបណ្ដឹងថាយើងស្រែកថាវាយវាឲ្យងាប់។ដូច្នេះវាផ្ទុយគ្នា។ប៉ុន្តែខ្ញុំមានកំណត់ហេតុពីអាជ្ញាធរអស់ហើយ មានតែប៉ុណ្ណឹងទេ អត់មានអីវែងឆ្ងាយទេ។តែគាត់ព្យាយាមមកខិតជិតយើង ឲ្យយើងប្រើហិង្សា ប៉ុន្តែយើងយល់ពីច្បាប់ យើងអត់យកដៃទៅប៉ះពាល់គាត់ទេ។ប៉ុន្តែគាត់បែរជាស្រែកថាយើងវាយគាត់ទៅវិញ » ។
ទាក់ទិនដីទំនាស់៥ហិតការក្នុងចំណោមដីទាំង៣៨ ហិកតារនេះ កាលពីថ្ងៃទី ៥ ខែ កក្កដា ឆ្នាំ២០១៩ ចៅក្រមស៊ើបសួរនៃតុលាការខេត្តបាត់ដំបងលោក រ័ត្ន ស៊ីថា បានចេញដីការក្សាការពារ។ការសម្រេចចេញដីកានេះ ជាការឆ្លើយតបទៅនឹងបណ្ដឹងរបស់លោក ឃុំ ហ៊ាន ដែលប្ដឹងចូលទៅតុលាការ នៅអំឡុងឆ្នាំ២០១៩ ដែលចោទប្រកាន់ថា ក្រុមគ្រួសារលោក យី ប៊ុនលី ប៉ុនប៉ងចូលកាន់កាប់ដីដោយខុសច្បាប់។
នាយករងប៉ុស្តិ៍នគរបាលចែងមានជ័យលោក រើម រឿត បញ្ជាក់ថា ខាងនគរបាលយុត្តិធម៌បានទទួលរួចហើយនូវបណ្ដឹងរបស់លោក យី ប៊ុនលី។លោកបន្តថា ក្រោយបញ្ចប់ពិធីបុណ្យចូលឆ្នាំចិនរួចនេះ លោកនឹងប្រមូលភស្តុតាងបន្ថែមទៀតសិន មុននឹងត្រូវកសាងសំណុំរឿងបញ្ជូនទៅតុលាការ។
លោកបន្តថា៖« មិនទាន់បានទេ ព្រោះខ្ញុំសួរគេអត់ទាន់បានអស់ទេ។គេចាប់សែនចិនអស់ហើយ។យើងសួរនាំអត់ទាន់អស់ទេ ដល់ចប់ចូលឆ្នាំចិនបានយើងចាប់ដំណើរការទៀត។ឥឡូវនេះម្នាក់ៗរវល់សែនចិនអស់ហើយ យើងទៅសួរពីណាគេបាន។ឥឡូវនេះកៀកឆ្នាំចិនហើយគេកំពុងចាប់សែនចិនទៀត » ។
ដោយឡែកមេឃុំចែងមានជ័យលោក បឿន ឌិញ បញ្ជាក់ថា តាមពិតហិង្សានេះ ដូចមិនជាធ្ងន់ធ្ងរ ហើយបង្កទៅជារបួសស្នាមអ្វីទេ។លោកបន្តថាបើពិនិត្យទៅលើអង្គហេតុ អតីតយោធិនពិការ អាចជាមនុស្សដែលប្រកាន់ច្រើន ហើយជាអ្នកចូលកាន់កាប់ដីរបស់លោក ឃុំ ហ៊ាន មែន។
លោកបន្ថែមថា៖« អត់ទេមានវាយអីណាដល់ទេ គ្រាន់តែចង្អុលមុខហើយយកដៃផាត់ទៅ។នេះក្រុមប្រឹក្សាខ្ញុំគាត់ឃើញ ដោយខ្ញុំរវល់អោនចុះយកឯកសារ។ឃុំ ហ៊ាន គាត់ចង្អុលតែប៊ុនលី យកដៃទៅផាត់ទៅរួចហើយវាប៉ះពាល់ថ្ពាល់តិចតួចហ្នឹងណា។វាអត់មានអីធំដុំទេ រួចហើយពួកខ្ញុំបំបែកចេញទៅ។វាអត់មានប៉ះពាល់អីធំដុំទេ » ។
ក្រសួងរៀបចំដែនដី នគររូបនីយកម្ម និងសំណង់ បានចេញរបាយការណ៍សង្ខេប ស្ដីពីវិវាទដីធ្លីនៅទូទាំងប្រទេស កាលពីឆ្នាំ២០១៨។យោងតាមរបាយការណ៍នេះបង្ហាញថា គិតត្រឹមចុងឆ្នាំ២០១៨ ជម្លោះដែលផ្ដើមចេញពីដីធ្លី ហើយមិនទាន់បានដោះស្រាយនៅសល់ប្រមាណ ១ពាន់ ៥រយករណីទៀតនៅឡើយ។គិតមកដល់ពេលនេះ នៅមិនទាន់មានរបាយការណ៍ថ្មីជាផ្លូវការណាមួយ ដែលបង្ហាញពីដំណោះស្រាយ ទាក់ទិនវិវាទដីធ្លីនេះ បន្ថែមទៀតនៅឡើយដែរ៕