លោកនាយករដ្ឋមន្ត្រី ហ៊ុន សែន បានអំពាវនាវទៅដល់ប្រជាពលរដ្ឋទូទៅ និងសមត្ថកិច្ចពាក់ព័ន្ធទាំងអស់ ឱ្យបង្កើនការប្រុងប្រយ័ត្នចំពោះការឆ្លងជំងឺប្រភេទថ្មីដែលកំពុងផ្ទុះឡើងនៅប្រទេសចិន ហើយបានឆ្លងរីករាលដាលទៅដល់ប្រទេសជាច្រើន។
លោកនាយករដ្ឋមន្ត្រី ហ៊ុន សែន បានអំពាវនាវបែបនេះនៅលើទំព័រហ្វេសប៊ុករបស់លោកនៅរសៀលថ្ងៃអាទិត្យនេះ។
លោក ហ៊ុន សែន រៀបរាប់នៅលើទំព័រហ្វេសប៊ុករបស់លោកថា៖ «សូមបងប្អូនប្រជាពលរដ្ឋមានការប្រុងប្រយ័ត្នខ្ពស់ ជាពិសេសក្នុងពេលធ្វើដំណើរទៅក្រៅប្រទេស និងក្នុងប្រទេសដែលកំពុងមានមេរោគកូរ៉ូណាឆ្លង»។
សារព័ត៌មានសិង្ហបុរី Channel News Asia បានចុះផ្សាយថា មានប្រទេសចំនួន ១៤ហើយនៅទូទាំងពិភពលោក បានរកឃើញការឆ្លងនៃមេរោគកូរ៉ូណានេះ ក្នុងនោះមានទាំងប្រទេសថៃ ម៉ាឡេស៊ី សិង្ហបុរី និងវៀតណាម ដែលនៅក្បែរខាងកម្ពុជាផងដែរ។
ខណៈដែលមេរោគថ្មីនេះកំពុងតែរីករាលដាលទៅដល់ប្រទេសជិតខាងកម្ពុជានោះ លោក ហ៊ុន សែន ក៏បានជំរុញទៅមន្ត្រីពាក់ព័ន្ធទាំងអស់ ឱ្យបង្កើនការត្រួតពិនិត្យរាល់អ្នកដំណើរទាំងអស់ចូលមកកម្ពុជា។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បាននិយាយនៅក្នុងសេចក្ដីប្រកាសព័ត៌មាននៅថ្ងៃនេះថា មិនទាន់មានជំងឺរលាកសួតដែលបង្កឡើងដោយវីរុសកូរ៉ូណានេះ ត្រូវបានរកឃើញនៅក្នុងប្រទេសកម្ពុជានោះឡើយគិតត្រឹមថ្ងៃទី២៦ ខែមករានេះ។
ទីភ្នាក់ងារព័ត៌មានបារាំង AFP បានរាយការណ៍ថា ចំនួនមនុស្សស្លាប់ដោយសារមេរោគដែលមានប្រភពមកពីទីក្រុងវូហាននោះ បានកើនឡើងលើស ៥០នាក់នៅក្នុងប្រទេសចិន ហើយគិតត្រឹមថ្ងៃអាទិត្យនេះ ខណៈដែលករណីឆ្លងជាង ៣០០ករណីទៀត ត្រូវបានរកឃើញ។
AFP ដែលបានដកស្រង់សម្ដីរបស់អាជ្ញាធរចិន បានចុះផ្សាយថា សម្រាប់ប្រទេសចិនតែមួយ មនុស្សជិត ២ពាន់នាក់ហើយ ត្រូវបានរកឃើញថា បានឆ្លងមេរោគប្រភេទថ្មីនេះនៅទូទាំងប្រទេស៕
