ក្រសួងសុខាភិបាលកម្ពុជាបានប្រកាសអំពីការរកឃើញករណីឆ្លងវីរុសកូរ៉ូណាថ្មីជាលើកដំបូងនៅថ្ងៃនេះ ដែលធ្វើឱ្យកម្ពុជាក្លាយជាប្រទេសទី១៥ហើយ ដែលការឆ្លងវីរុសនេះបានកើតមានឡើង។
ការរកឃើញករណីឆ្លងវីរុសកូរ៉ូណាថ្មីជាលើកដំបូងនេះ ត្រូវបានប្រកាសឱ្យដឹងពីសំណាក់រដ្ឋមន្ត្រីសុខាភិបាល លោក ម៉ម ប៊ុនហេង នៅក្នុងសន្និសីទសារព័ត៌មាននៅរាជធានីភ្នំពេញ នៅល្ងាចថ្ងៃនេះ។
លោក ម៉ម ប៊ុនហេង បានថ្លែងថា៖ «ក្រសួងសុខាភិបាលកម្ពុជាសូមជម្រាបជូនសាធារណជនទាំងអស់ឱ្យបានជ្រាបថា គិតមកត្រឹមម៉ោង ៣រសៀលថ្ងៃទី២៧ ខែមករា ឆ្នាំ២០២០នេះ ក្រសួងបានស្រាវជ្រាវរកឃើញមានការបញ្ជាក់ពីវិទ្យាស្ថានប៉ាស្ទ័រកម្ពុជានូវករណីវិជ្ជមានវីរុសកូរ៉ូណាប្រភេទ ២០១៩ (2019-nCoV) នៅលើបុគ្គលកជនជាតិចិនម្នាក់ឈ្មោះ ចា ជិនហួរ ភេទប្រុស អាយុ ៦០ឆ្នាំ ធ្វើដំណើរមកពីទីក្រុងវូហាន ជាមួយក្រុមគ្រួសារ ៤នាក់»។
បើតាមរដ្ឋមន្ត្រីសុខាភិបាលកម្ពុជា ករណីឆ្លងវីរុសកូរ៉ូណាប្រភេទថ្មីនេះ ត្រូវបានរកឃើញនៅលើបុរសជនជាតិចិន ដែលបានធ្វើដំណើរតាមជើងហោះហើរត្រង់ពីទីក្រុងវូហានមកកាន់ខេត្តព្រះសីហនុ។
បើតាមសេចក្ដីប្រកាសព័ត៌មាន បុរសជនជាតិចិនរូបនោះ និងគ្រួសាររបស់គាត់ ៣រូបទៀត បានធ្វើដំណើរមកដល់ខេត្តព្រះសីហនុកាលពីថ្ងៃទី២៣ ខែមករា ឆ្នាំ២០២០។
វីរុសកូរ៉ូណាប្រភេទថ្មីនេះ បានផ្ទុះឡើងលើកដំបូងនៅក្នុងទីក្រុងវូហាន ក្នុងខេត្តហ៊ឺប៉ី ប្រទេសចិន ហើយកំពុងរីករាលដាលបន្ត ដោយបានសម្លាប់មនុស្សដល់ទៅ ៨១នាក់ហើយ ហើយវាបានឆ្លងទៅមនុស្សដល់ទៅជាង ២,៧៦១ករណីហើយនៅក្នុងប្រទេសនេះ គិតត្រឹមល្ងាចថ្ងៃទី២៧ ខែមករា ឆ្នាំ២០២០។
សារព័ត៌មានសិង្ហបុរី CNA បានរាយការណ៍ថា វីរុសកូរ៉ូណាប្រភេទថ្មីនេះ ត្រូវបានចម្លងទៅដល់ប្រទេស និងដែនដីចំនួន ១៤ហើយ មានសហរដ្ឋអាមេរិក បារាំង អូស្ត្រាលី ជប៉ុន កូរ៉េខាងត្បូង នេប៉ាល់ ដែនដីកោះតែវ៉ាន់ តំបន់រដ្ឋបាលពិសេសម៉ាកាវ និងហុងកុង ម៉ាឡេស៊ី សិង្ហបុរី ថៃ និងវៀតណាម ដែលបានរកឃើញការឆ្លងវីរុសនេះដល់ទៅ ៥៦ករណី។
ការរកឃើញករណីឆ្លងវីរុសកូរ៉ូណាប្រភេទថ្មីលើកដំបូងនៅកម្ពុជានេះ បានធ្វើឱ្យក្លាយក្លាយជាប្រទេស និងដែនដីទី១៥ហើយ ដែលការចម្លងវីរុសកូរ៉ូណាប្រភេទថ្មីនេះ ត្រូវបានរកឃើញនោះ៕
