មជ្ឈមណ្ឌលសិទ្ធិមនុស្សកម្ពុជា លើកឡើងថាច្បាប់មួយចំនួននៅក្នុងប្រទេសកម្ពុជាមានការរឹតត្បិតសេរីភាព និងបង្កការប៉ះពាល់ដល់សិទ្ធិជាមូលដ្ឋានប្រជាពលរដ្ឋ ផ្ទុយពីបទដ្ឋានអន្តរជាតិ។
ការអះអាងរបស់មជ្ឈមណ្ឌលសិទ្ធិមនុស្សកម្ពុជា ធ្វើឡើងក្នុងរបាយការណ៍ពិនិត្យមើលទៅលើច្បាប់ជាតិ និងការអនុវត្តស្របតាមច្បាប់អន្តរជាតិដែលចេញផ្សាយនេះ។
ច្បាប់ទាំងនោះរួមមាន រដ្ឋធម្មនុញ្ញកម្ពុជា ក្រមព្រហ្មទណ្ឌ ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តពីសមាគម និងអង្គការមិនមែនរដ្ឋាភិបាល ច្បាប់ស្តិពីការធ្វើបាតុកម្មដោយសន្តិវិធី ច្បាប់ស្តីពីគណបក្សនយោបាយ ច្បាប់ស្តីពីទូរគមនាគមន៍ និងច្បាប់សហជីពជាដើម។
មជ្ឈមណ្ឌលសិទ្ធិមនុស្សកម្ពុជា រកឃើញថាកម្ពុជាមិនទាន់អនុវត្តស្របតាមច្បាប់សិទ្ធិមនុស្សអន្តរជាតិ និងបទដ្ឋានស្តីពីសេរីភាពមូលដ្ឋាន ដែលកម្ពុជាផ្តល់សច្ចាប័នដូចជា កតិកាសញ្ញាអន្តរជាតិស្តីពីសិទ្ធិពលរដ្ឋ និងនយោបាយនៅឡើយ។
មជ្ឈមណ្ឌលសិទ្ធិមនុស្សកម្ពុជាលើកឡើងក្នុងរបាយការណ៍នោះថា៖«ការវិភាគនេះបង្ហាញថា បទប្បញត្តិមួយចំនួននៅក្នុងក្របខ័ណ្ឌច្បាប់ជាតិនៅកម្ពុជា មិនអនុលោមពេញលេញជាមួយច្បាប់សិទ្ធិមនុស្សអន្តរជាតិ និងបទដ្ឋានស្តីពីសេរីភាពមូលដ្ឋានទេ។ នេះជាប្រការព្រួយបារម្ភ ជាពិសេសទាក់ទិននឹងទិដ្ឋភាពសិទ្ធិមនុស្សនៅកម្ពុជានាពេលបច្ចុប្បន្ន ដែលត្រុវបានចាត់ទុកថា ជាការរំលោភបំពានទោលើការអនុវត្តដ៏ស្របច្បាប់នៃសេរីភាពមូលដ្ឋានក្នុងរយៈពេលប៉ុន្មានឆ្នាំចុងក្រោយនេះ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន ទទួលស្គាល់ថា ច្បាប់ដែលបង្កើតឡើងតែងតែមានការខ្វះចន្លោះ។ ប៉ុន្តេលោកបង្ហាញការស្វាគមន៍ បើសង្គមស៊ីវិលមានបំណងស្នើសុំវិសោធនកម្មមាត្រាខ្លះឲ្យស្របតាមបទដ្ឋានអន្តរជាតិ។
លោកមានប្រសាសន៍ថា៖ «ច្បាប់ធ្វើហើយមិនមែនល្អឥតខ្ចោះនោះទេ អាស្រ័យទៅលើការអនុវត្ត ប្រសិនបើជួបការលំបាក មានចំណុចខ្វះខាតត្រង់ណាគាត់អាចលើកពិគ្រោះយោបល់ជាមួយរដ្ឋាភិបាលតាមរយៈវេទិការរដ្ឋាភិបាល និងសង្គមស៊ីវិលបានឲ្យតែមានមូលដ្ឋានច្បាស់លាស់មិនមានបញ្ហាអ្វីទេ ក្នុងការធ្វើវិសោធនកម្មធ្វើម៉េចឲ្យច្បាប់វាឆ្លើយតបបានទៅនឹងសេចក្តីត្រូវការពិតប្រាកដរបស់ប្រជាពលរដ្ឋ ហើយវិវត្តន៍ទៅតាមការរីកចំរើន និងបរិបទរបស់សង្គមកម្ពុជា»។
CCHR ផ្តល់ជាអនុសាសន៍ដល់រដ្ឋាភិបាលធ្វើវិសោធនកម្មទៅលើច្បាប់ទាំងអស់ខាងលើនេះ ដោយដកចេញចំណុចដែលរឹតត្បិតសេរីភាព ដើម្បីផ្តល់សិទ្ធិសេរីភាពដល់ប្រជាពលរដ្ឋស្របតាមរដ្ឋធម្មនុញ្ញ និងបទដ្ឋានអន្តរជាតិ ទើបទទួលបានផលវិជ្ជមាន៕