សមត្ថកិច្ចខេត្តបាត់ដំបង បានឃាត់ខ្លួនប្រជាការពារភូមិដែលប្រើអំពើហិង្សាលើជនពិការវ័យជិត៦០ឆ្នាំម្នាក់ ក្រោយមានការចែកចាយវីដេអូហេតុការណ៍ហិង្សានោះតាមបណ្តាញសង្គម។
ក្នុងវីដេអូឃ្លីបរយៈពេលជាង៣នាទី ដែលគេបានចែកចាយតាមបណ្តាញសង្គមហ្វេសប៊ុក លោក ឃុន ខុម អាយុ៥៧ឆ្នាំ ជាជនពិការជើងម្ខាងដាច់ត្រឹមភ្លៅ ត្រូវបានប្រជាការពារភូមិម្នាក់វាយឱ្យរងរបួសបាក់កដៃទាំងសងខាង ហើយរងរបួសជើង និងបែកក្បាលហូរឈាម កាលពីថ្ងៃទី២៩ ខែមករា ឆ្នាំ២០២០ ស្ថិតក្នុងភូមិអ្នកតាទ្វា ឃុំឬស្សីក្រាំង ស្រុកមោងឬស្សី។
កាលពីម្សិលមិញនេះ ស្នងការនគរបាលខេត្តបាត់ដំបង លោក អ៊ុច សុខន បានប្រកាសចាត់វិធានការចំពោះអ្នកដែលប្រើប្រាស់អំពើហិង្សាលើជនពិការអាយុ៥៧ឆ្នាំនោះ។
ស្នងការនគរបាលរងទទួលបន្ទុកផែ្នកព្រហ្មទណ្ឌ លោក ជេត វណ្ណី ប្រាប់វីអូឌីថា សមត្ថកិច្ចបានឃាត់ខ្លួន និងបញ្ជូនជនសង្ស័យដែលជាប្រជាការពារភូមិនោះទៅស្នងការខេត្តហើយ ដើម្បីកសាងសំណុំរឿងបញ្ជូនទៅសាលាដំបូងខេត្តបាត់ដំបង ឱ្យអនុវត្តទៅតាមនីតិវិធីច្បាប់រកយុត្តិធម៌ជូនជនរងគ្រោះ។
ស្នងការរងរូបនេះឱ្យដឹងថា ក្នុងករណីហិង្សារនេះ មានប្រជាការពារភូមិតែម្នាក់ប៉ុណ្ណោះ ឈ្មោះ កែវ ព្រើន ដែលបានប្រើហិង្សាលើជនពិការនោះ។
លោកបន្ថែមថា៖ «ខ្ញុំគ្រាន់តែបញ្ជាក់ថា ក្នុងរឿងនេះយើងកំពុងតែធ្វើការហើយ អ្នកណាប្រព្រឹត្ត អ្នកនោះទទួលខុសត្រូវមុខច្បាប់។ កុំថាឡើយប្រជាពលរដ្ឋធម្មតា សូម្បីតែប្រជាការពារ ប៉ូលីស ឬអ្នកណាក៏ដោយឱ្យតែអនុវត្តបទល្មើស យើងនឹងអនុវត្តតាមនីតិវិធីច្បាប់ហើយ»។
លោក ខុម សំណាង ត្រូវជាកូនរបស់លោក ឃុន ខុម ប្រាប់វីអូឌីថា លោក ឃុន ខុម រងរបួសដោយសារប្រជាការពារភូមិប្រើអំពើហិង្សា ខណៈដែលជនពិការរូបនោះមានបញ្ហាសរសៃប្រសាទ ទៅហែកស្លាករបស់ប្រជាការពារភូមិនៅក្នុងភូមិ។
លោក ខុម សំណាង ឱ្យដឹងថា បច្ចុប្បន្ន ឪពុករបស់លោកកំពុងសម្រាកព្យាបាលនៅមន្ទីរពេទ្យខេត្តពោធិ៍សាត់ដោយរបួសខ្លាំងត្រង់ក្បាល ជើង និងបាក់កដៃទាំងសងខាង។
លោកបន្ថែមថា៖ «បើគាត់ធ្វើខុសលើសលស់អី យើងអាចចាប់គាត់ដាក់ខ្នោះព្រមានគាត់ទៅ។ តែហេតុអីទៅវ៉ៃគាត់ដល់ហ្នឹងបាក់ដៃអីចឹង។ ឥលូវគាត់និយាយបាន ប៉ុន្តែ ដៃគាត់កម្រើកអត់បាន បាក់ដៃ។ ពេទ្យគេនឹងដាក់ដែកនៅសប្តាហ៍ក្រោយ»។
លោក លុច្យ ផានិត ត្រូវជាចៅរបស់លោក ឃុន ខុម និយាយថា ជីតារបស់លោកក្រីក្រណាស់ ហើយជាបុរសពិការពោះមាយ និងមានជំងឺសរសៃប្រសាទប្រចាំកាយទៀតផង។ បច្ចុប្បន្ន កំពុងរស់នៅជាមួយបងប្អូននៅក្នុងស្រុកមោងឬស្សី។ លោកថា ពេលកំពុងសម្រាកព្យាបាលនៅមន្ទីរពេទ្យនេះ គឺពុំមានលុយសម្រាប់បង់ថ្លៃសេវាជូនពេទ្យនោះទេ។ លោក ផានិត អំពាវនាវទៅសមត្ថកិច្ចជួយរកយុត្តិធម៌ដល់ជនរងគ្រោះដែលជាជីតាឱ្យបានពិតប្រាកដ។
លោកបន្ថែមថា៖ «គាត់នៅជាមួយបងប្អូន ទៅនេះគេឱ្យបាយមួយចាន ទៅនោះគេឱ្យបាយមួយចានទៅ។កូនចៅក្រដើរចោលគាត់ទៅស៊ីឈ្នួលកាច់ដំឡូងឱ្យគេ ឈឺរកតែលុយមកមើលឪពុកមិនចង់បានផង។ ខ្ញុំសូមសំណូមពរដល់សមត្ថកិច្ចចាត់វិធានការផ្លូវច្បាប់ទៅលើជនប្រព្រឹត្តឱ្យខានតែបាន ព្រោះទង្វើនេះ មិនអាចលើកលែងបានទេ ព្រោះគាត់ជាជនពិការផង បើសិនមានជើង ខ្ញុំមិនថាទេ។ គាត់កំបុតជើង គាត់មានអីតតាំង ហើយទៅគាត់បាក់កដៃអស់ហើយហ្នឹង។ ពេទ្យនិយាយថា អាចដល់ថ្នាក់កាត់មិនដឹង»។
វីអូឌីមិនអាចសុំការបកស្រាយពីប្រជាការពារភូមិដែលប្រើហិង្សាលើជនពិការនោះបានទេជុំវិញការណីនេះ។
នាយករងអង្គការលីកាដូទទួលបន្ទុកផ្នែកឃ្លាំមើលសិទ្ធិមនុស្ស លោក អំ សំអាត បានថ្កោលទោសទង្វើហិង្សារបស់ប្រជាការពារភូមិនេះ។
មន្ត្រីឃ្លាំមើលការរំលោភសិទ្ធិមនុស្សរូបនេះលើកឡើងថា កន្លងមក ប្រជាការពារភូមិ និងសន្តិសុខខណ្ឌមួយចំនួនបានបញ្ចេញអាកប្បកិរិយាមិនល្អ ដោយបានប្រើអំពើហិង្សាទៅលើប្រជាពលរដ្ឋជាញឹកញាប់ ប៉ុន្តែ មិនត្រូវអនុវត្តទៅតាមផ្លូវច្បាប់នោះទេ ដែលលោកចាត់ទុកទង្វើទាំងនេះថា ជាគំរូអាក្រក់មួយនៅក្នុងសង្គម។
លោកបន្ថែមថា៖ «អីចឹង ករណីនេះ សមត្ថកិច្ចត្រូវតែស៊ើបអង្កេត និងចាប់យកជនដៃដល់មកអនុវត្តទៅតាមផ្លូវច្បាប់ ដើម្បីកុំមានជាគំរូអាក្រក់ដល់អ្នកដទៃទៀត។ ព្រោះយើងមើលការវាយដំនេះ វាធ្ងន់ធ្ងរណាស់ រហូតគាត់មានការបាក់ដៃ ហើយគាត់ជាជនពិការទៀតនោះ»៕