រដ្ឋមន្ត្រីក្រសួងមហាផ្ទៃ លោក ស ខេង ស្នើដល់អង្គការមិនមែនរដ្ឋាភិបាលឱ្យបង្ហាញតម្លាភាពការងារជាមួយរដ្ឋាភិបាល ដោយថា ការមិនបង្ហាញព័ត៌មាន ហើយចេញរបាយការណ៍រិះគន់ពីការមិនទទួលបានកិច្ចសហការពីរដ្ឋ ជារឿងមើលបំណាំគ្នា និងគ្មានភាពជាដៃគូ។
ថ្លែងក្នុងពិធីបើកវេទិកាស្ដីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល នៅព្រឹកថ្ងៃទី០៣ ខែកុម្ភៈនេះ លោក ស ខេង បានថ្លែងថា ចាប់ពីខែវិច្ឆិកា ឆ្នាំ២០១៩ ដល់ខែមករា ឆ្នាំ២០២០ ក្រសួងមហាផ្ទៃបានទទួលការរាយការណ៍ពីកិច្ចមិនសហការរបស់រដ្ឋបាលថ្នាក់ក្រោមជាតិ ជាមួយអង្គការសង្គមស៊ីវិលចំនួនតែ២ករណីប៉ុណ្ណោះ ខណៈអង្គការខ្លះបង្ហាញព័ត៌មានថា មានច្រើនករណីជាងនេះ។
លោកបន្ថែមថា៖ «ចំណុចនេះ យើងខ្ញុំមិនបដិសេធទេ! តែយើងខ្ញុំមានចម្ងល់ថា ហេតុអ្វីប្រសិនជាមានករណីបែបនេះ ហើយគាត់បូកសរុបយកទៅផ្សព្វផ្សាយ តែគាត់មិនបានផ្ដល់ព័ត៌មាននេះ មកឱ្យសមត្ថកិច្ច របស់រាជរដ្ឋាភិបាល។ អ៊ីចឹង វាប្រៀបដូចជាគាត់លាក់ព័ត៌មាន អ៊ីចឹង ទំនាក់ទំនងរបស់យើង វាមិនតម្លាភាព វាមិនមែនជាការសាងភាពជាដៃគូ តែវាជាការមើលបំណាំ»។
លោក ស ខេង ស្នើដល់អង្គការ សមាគមទាំងអស់ឱ្យបង្ហាញតម្លាភាព និងព័ត៌មានជាមួយរដ្ឋាភិបាល ដើម្បីឱ្យរដ្ឋអាចដោះស្រាយបញ្ហានេះបានទាំងអស់គ្នា។
អ្នកនាំពាក្យសមាគមអាដហុក លោក សឹង សែនករុណា មានប្រសាសន៍ថា អង្គការលោកតែងតែសហការ និងផ្ដល់ព័ត៌មានដល់ក្រសួងមហាផ្ទៃជានិច្ចនៅពេលមានបញ្ហានៅថ្នាក់មូលដ្ឋាន តែលោកថា ការមិនគោររពតាមសេចក្តីណែនាំរបស់ក្រសួងមហាផ្ទៃ ដោយមន្ត្រីរដ្ឋាភិបាលទៅវិញទេ ទើបជាបញ្ហានៃកិច្ចសហការនេះ។
លោកថា៖ «ក៏ប៉ុន្ដែ យើងឃើញហើយ អាជ្ញាធរមួយចំនួនគឺគាត់មិនគោរពតាម (សេចក្តីណែនាំរបស់ក្រសួងមហាផ្ទៃ) ហ្នឹងហើយជាបញ្ហាមួយដែលយើងជួបប្រទះ ហើយយើងធ្វើកិច្ចអន្តរាគមន៍ហ្នឹងដោយផ្ទាល់នៅមូលដ្ឋាន កិច្ចការខ្លះយើងទទួលបានកិច្ចអន្តរាគមន៍ ហើយនឹងមានកិច្ចសហប្រតិបត្តិការអញ្ចឹងទៅ»។
នាយកប្រតិបត្តិអង្គការគណៈកម្មាធិការសហប្រតិបត្តិការដើម្បីកម្ពុជា (CCC) លោក សឿង សារឿន មានប្រសាសន៍ថា បញ្ហានៃកិច្ចមិនសហការនេះមិនមែនមកពីសង្គមស៊ីវិលនោះទេ។ លោកបន្ថែមថា សង្គមស៊ីវិលតែងតែរាយការណ៍ជាញឹកញយពីបញ្ហាដែលខ្លួនជួបប្រទះនៅថ្នាក់មូលដ្ឋានទៅក្រសួង តែពុំសូវមានការឆ្លើយតបជាវិជ្ជមានណាមួយនោះទេ ខណៈមន្ត្រីមូលដ្ឋានក្រោយពីអង្គការ សមាគមបានរាយការណ៍ទៅក្រសួង មន្ត្រីមូលដ្ឋានបានបង្ហាញអាកប្បកិរិយាលែងចង់សហការជាមួយអង្គការក្រៅរដ្ឋាភិបាលថែមទៀត។
លោកថា៖ «សង្គមស៊ីវិលភាគច្រើនដែលគាត់មិនចង់រាយការណ៍មកក្រសួងមហាផ្ទៃ ព្រោះជីវិតការងាររបស់អង្គការសមាគមមូលដ្ឋានដែលគាត់ធ្វើការងារនៅមូលដ្ឋាន គឺគាត់មិនចង់មានបញ្ហាអ្វីជាមួយអាជ្ញាធរមូលដ្ឋានទេ! ដែលជាទូទៅជាទម្លាប់នៅពេលដែលយើងរាយការណ៍ទៅលើ ច្រើនតែនាក់ដែលយើងរាយការណ៍ហ្នឹងមិនបានបង្កការសហការអីទៀតទៅអញ្ចឹង មានរហូតដល់ការគិតមិនប្រក្រតីអីចំពោះគ្នាទៅវិញទៅមកទៀត។ អ៊ីចឹង បានជាយើងទុកឱ្យរដ្ឋអំណាចរបស់គាត់រាយការណ៍ទៅដោយខ្លួនគាត់ទៅ»។
បើតាមលោក សឿង សារឿន បញ្ហានៃភាពមិនសហការនេះ គឺបណ្ដាលមកពីភាពគ្មានឯករាជ្យរបស់មន្ត្រីមូលដ្ឋាន ដែលលោកថា នៅពេលដែលមន្ត្រីសាធារណៈមានការងារបក្សផង និងការងារសាធារណៈផង វាបណ្ដាលឱ្យមន្ត្រីទាំងនោះធ្វើការតាមទំនោរបក្សជាជាងកិច្ចការសាធារណៈ ដែលលោកថា ជារឿងមិនគួរមាននោះទេក្នុងប្រព័ន្ធរដ្ឋបាលសាធារណៈកម្ពុជា។
តាមរបាយការណ៍ក្រសួងមហាផ្ទៃ គិតត្រឹមខែធ្នូ ឆ្នាំ២០១៩ កម្ពុជាមានសមាគម និងអង្កការមិនមែនរដ្ឋាភិបាលចំនួន ៥ ៥៦៤ស្ថាប័ន ក្នុងនោះមានសមាគមជាង ២ ២៤៨ ដែលចុះបញ្ជី និងធ្វើការនៅកម្ពុជា៕
