លោកនាយករដ្ឋមន្ត្រី ហ៊ុន សែន ប្រកាសថា លោកនឹងធ្វើដំណើរទៅទីក្រុងវ៉ូហាន ខេត្តហ៊ើប៉ី ប្រទេសចិន ដើម្បីសួរសុខទុក្ខជនជាតិខ្មែរដែលរស់នៅទីនោះ ប្រសិនជារដ្ឋាភិបាលចិនអនុញ្ញាត ដើម្បីផ្ចាញ់អ្នករិះគន់លោក។
ថ្លែងសំណេះសំណាលជាមួយពលរដ្ឋខ្មែរនៅប្រទេសកូរ៉េខាងត្បូងនៅរសៀលនេះ លោក ហ៊ុន សែន បានថ្លែងថា លោកនឹងធ្វើដំណើរទៅទីក្រុងវ៉ូហាន ជាទីផ្ទុះវីរុសរលាកផ្លូវដង្ហើមធ្ងន់ធ្ងរកូរ៉ូណា ។
លោក ហ៊ុន សែន ថ្លែងថា៖ «ហើយមិនបាច់ចាំឌឺទេ ចូលមើល Comment (មតិយោបល់) ឡើងវិញទៅ ព្រោះគេនិយាយមិនធ្ងន់ទេ ប៉ុន្តែគេឌឺ។ គេថា លោក ហ៊ុន សែន យកចិត្តទុកដាក់ចំពោះប្រជាជនគ្រប់ទីកន្លែង គាត់នឹងទៅសួរសុខទុក្ខនិស្សិតខ្មែរនៅវ៉ូហាន។ ឥលូវឆ្លើយត្រលប់ទៅវិញ អញនឹងទៅ ឱ្យតែខាងរដ្ឋាភិបាលចិនផ្តល់ឱកាសឱ្យទៅ។ ត្រលប់ពីហ្នឹងទៅវិញ មិនទាន់ទៅប្រទេសក៏បានដែរ ចុះទៅវ៉ូហានតែម្តង។ សាកល្បងទាក់ទងមើល»។
ទោះយ៉ាងណា លោកមិនបានបញ្ជាក់ថា លោកចង់ទៅពេលណាឱ្យច្បាស់លាស់? ឬ លោកបានស្នើទៅភាគីចិន ដើម្បីទៅទីក្រុងវ៉ូហាននេះឬនៅទេ?
ការឆ្លើយតបរបស់លោក ហ៊ុន សែន នៅពេលនេះ គឺបន្ទាប់ពីលោកថ្លែងបញ្ជាក់ពីការមិនបិទជើងយន្តហោះ និងជម្លៀសពលរដ្ឋពីប្រទេសចិន ដោយថា ដើម្បីរក្សាសេដ្ឋកិច្ច និងនយោបាយល្អរវាងកម្ពុជាចិន។ ក្រោយពីមានការបញ្ជាក់នេះ ត្រូវបានអ្នកបញ្ចេញមតិក្នុងហ្វេសបុកមួយចំនួននាំគ្នារិះគន់ការសម្រចចិត្តរបស់លោក។
ជំងឺរលាកសួតធ្ងន់ធ្ងរដែលបណ្ដាលមកពីវីរុសកូរ៉ូណា បានផ្ទុះឡើងដំបូងកាលពីថ្ងៃទី៣១ ខែធ្នូ ឆ្នាំ២០១៩ ក្នុងទីក្រុងវ៉ូហាន ក្នុងខេត្តហ៊ើប៉ី ប្រទេសចិន ដែលវីរុសនេះត្រូវបានអង្គការសុខភាពពិភពលោកប្រកាសដាក់ភាពអាសន្នកាលពីចុងសប្ដាហ៍មុន ក្រោយពីវាបានសម្លាប់មនុស្សរាប់រយនាក់ ខណៈអ្នកឆ្លងកើនដល់ជិត ២ម៉ឺននាក់៕
